[1] यहोवा के परसंसा करव। यहोवा के नांव के परसंसा करव; हे यहोवा के सेवकमन, ओकर परसंसा करव,
[2] तुमन, जऊन मन यहोवा के घर म सेवा करथव, तुमन, जऊन मन हमर परमेसर के घर के अंगना म सेवा करथव।
[3] यहोवा के परसंसा करव, काबरकि यहोवा ह बने अय, ओकर नांव के परसंसा करव, काबरकि येह मन ला भाथे।
[4] यहोवा ह याकूब ला अपन खुद के होय बर चुन ले हवय, इसरायल ला अपन कीमती संपत्ति होय बर चुन ले हवय।
[5] मेंह जानत हंव कि यहोवा ह महान ए, ये घलो कि हमर परभू ह जम्मो देवतामन ले महान ए।
[6] यहोवा ला जऊन बात बने लगथे, ओह ओला अकास अऊ धरती म, समुंदर अऊ ओकर जम्मो गहरई म करथे।
[7] ओह धरती के छोर ले बादरमन ला उठाथे; ओह बारिस के संग बिजली पठोथे अऊ अपन भंडारघर ले हवा ला बाहिर लानथे।
[8] ओह मिसर देस के पहिलांत, मनखे अऊ पसुमन के पहिलांत ला मार डारिस।
[9] हे मिसर देस, ओह तोर बीच म, फिरौन अऊ ओकर जम्मो सेवकमन के बिरूध चिनहां अऊ चमतकार देखाईस।
[10] ओह कतको जातिमन ला नास कर दीस अऊ कतको सक्तिसाली राजामन ला मार डारिस—
[11] याने कि अमोरीमन के राजा सीहोन, बासान के राजा ओग, अऊ कनान के जम्मो राजामन ला—
[12] अऊ ओमन के देस ला निज भाग के रूप म अपन मनखे इसरायलीमन ला दे दीस।
[13] हे यहोवा, तोर नांव सदा बने रहिथे, हे यहोवा, तोर खियाती जम्मो पीढ़ी म बने रहिथे।
[14] काबरकि यहोवा ह अपन मनखेमन के नियाय करही अऊ अपन सेवकमन ऊपर दया देखाही।
[15] आनजात के मूरतीमन मनखेमन के हांथ के बनाय सोन अऊ चांदी अंय।
[16] ओमन के मुहूं तो हवय, पर ओमन गोठियाय नइं सकंय, ओमन के आंखी तो हवय, पर देख नइं सकंय।
[17] ओमन के कान तो हवय, पर सुन नइं सकंय, अऊ न ही ओमन के मुहूं म सांस हवय।
[18] येमन ला बनानेवालामन येमन के सहीं हो जाहीं, अऊ येमन ऊपर भरोसा रखइया जम्मो झन घलो येमन सहीं हो जाहीं।
[19] हे जम्मो इसरायलीमन, यहोवा के परसंसा करव; हे हारून के घराना, यहोवा के परसंसा करव;
[20] हे लेवी के घराना, यहोवा के परसंसा करव; तुमन, जऊन मन ओकर भय मानथव, यहोवा के परसंसा करव।
[21] सियोन ले यहोवा के परसंसा होवय, ओकर परसंसा होवय, जऊन ह यरूसलेम म निवास करथे। यहोवा के परसंसा होवय।