[1] Ayiwa Matigi ko: «Sankolo ye ne ka masasigilan ye, dugukolo ye ne sen kɔrɔ dalan ye. Ayiwa, aw dun na so jumɛn jɔ ne ye? Aw dun na yɔrɔ jumɛn di ne ma ka kɛ ne sigi so ye?
[2] Fɛn o fɛn bɛ yen, ne ye olu bɛɛ da. U bɛɛ bɛ yen ne de barika la.» Matigi ko ten. «Nka min ka di ne ye, o ye mɔgɔ majiginlen nimisabaatɔ ye, min bɛ siran ne ka kuma ɲɛ.
[3] «Min bɛ misi faga, o fana bɛ mɔgɔ faga. Min bɛ sagaden faga ka kɛ saraka ye, o fana bɛ wulu tɔn kari. Min bɛ mugu saraka bɔ, o fana bɛ lɛ joli bɔ. Min bɛ suma diyalan mana wusu, o fana bɛ boli sɔn. U bɛ u yɛrɛw ka siraw ɲɛnatɔmɔ. U ka ko haramulenw ka di u ye haali.
[4] O de kosɔn u halakili na diya ne ye. U bɛ siran tɔɔrɔ minw ɲɛ, ne na olu bi u kan, k'a masɔrɔ ne ye u wele tuma min na, mɔgɔ si ma ne jaabi. Ne kumana, u ma ne lamɛn, nka u ye ko jugu kɛ ne ɲɛ kɔrɔ, ko min man di ne ye, u ye o kɛ.»
[5] Aw minw bɛ siran Matigi ɲɛ, a' ye a ka kuma lamɛn. «Aw balima minw ye aw janfa ka aw gɛn ne tɔgɔ kosɔn, k'a fɔ ko Matigi ka a nɔɔrɔ jira walisa u ka aw ka se sɔrɔli ye, nka u na maloya ka u kun suuli.
[6] Wɔyɔkanba bɛ bɔ dugu kɔnɔ, mankanba bɛ bɔ Alabatosoba kɔnɔ. O ye Matigi kan ye, a bɛ a juguw sara ka kɛɲɛ ni u ka kɛwalew ye.
[7] Sani tin ka a minɛ, a jiginna, sani tin tɔɔrɔ ka a sɔrɔ, a ye denkɛ bange.
[8] Jɔn ye o bɔɲɔgɔnko mɛn fɔlɔ? Jɔn ye fɛn dɔ ye min bɔlen bɛ o fɛ? Yala jamana dɔ bangera tile kelen na wa? Yala siya dɔ bɛ se ka bange yɔrɔ nin kelen wa? O bɛɛ n'a ta, tin ye Sion minɛ, yɔrɔ nin kelen a ye denkɛ bange.
[9] Ne na kɔnɔ dafa ni ne tɛna a bange ko ɲɛnabɔ wa? Matigi ye o fɔ. Den sɔrɔ ye ne nɔ ye, ne na muso bali bange la wa?» I ka Ala ye o fɔ.
[10] «Aw minw bɛ Jerusalɛm kanu, aw ka sewa a kosɔn ka ɲagalikan bɔ a kosɔn. Aw minw kasira Jerusalɛm kosɔn, aw ka ɲagalikanba bɔ a fɛ,
[11] walisa aw ka dusu suma sɔrɔ ka aw wasa, i ko den bɛ balo nɔnɔ la ka wasa cogo min na, walisa aw ka a ka hɛrɛ dɔn ani a nɔɔrɔ dafalen.»
[12] Ayiwa Matigi ko: «Ne na hɛrɛ lase Jerusalɛm ma i ko baji woyo, ka siyaw ka nafolotigiya lase yen i ko ba karilen ji woyo. Aw na balo u sin na, u na aw ta u bolow la ka aw sigi u sen kan.
[13] Den ba bɛ a den dusu saalo cogo min na, ne na aw dusu saalo Jerusalɛm kɔnɔ ten.
[14] Aw na o bɛɛ ye, aw dusukun na fa ɲagali la. Aw farikolo na kuraya i ko bin nugulen kura. Matigi na a ka sebaaya jira a ka jɔnw la yen, nka a na dimin a juguw kɔrɔ.»
[15] A filɛ, Matigi bɛ na tasuma manaba cɛma, a ka wotorow bɛ i ko fununfununba. A ka dimiyaba na yɛlɛma ka kɛ jenili kɛ tasuma ye. A ka kɔrɔfɔli na kɛ i ko tasuma manaba.
[16] Matigi na kiri tigɛ Hadamadenw bɛɛ kan ni tasuma ani npan ye. Fagalenw na caya.
[17] Matigi ko: «Minw bɛ u yɛrɛ saniya ka u jɛya nakɔw kɔnɔ ani minw bɛ tugu ɲɔgɔn kɔ ka lɛ sogo dun ka fɛn haramulenw ani ɲinɛw sogo dun, olu bɛɛ na halaki ɲɔgɔn fɛ.
[18] Ne kɔni, ne bɛ u ka kɛwalew ni u ka miiriliw dɔn. «Siyaw bɛɛ ni kan sifaw bɛɛ fɔbaaw lajɛ tuma sera. Olu bɛɛ na kɛ ne nɔɔrɔ ye.
[19] Ne na taamashyɛn kɛ ka dafa u cɛma. Ni u la fɛn o fɛn kisira ne ka kiri ma, ne na olu ci siyaw ma, Tarsisi ni Pul ani Lud, o mɔgɔ tɛgɛ ka di kala bɔnni la, ani Tubal ni Javan. Ne na u ci kɔgɔji dala jamana janw na, olu minw ma ne ko mɛn, u ma ne nɔɔrɔ ye. Ne ka cidenw na ne nɔɔrɔ jira siyaw cɛma.
[20] «U bɛ na ni aw balimaw ye ka bɔ siyaw bɛɛ cɛma, i ko nili fɛn min dira Matigi ma. U bɛ na ni aw balimaw ye sow kan ani wotorow ni jɔw kɔnɔ ani falibaw ni ɲaamɛw kan. U bɛ na ni aw balimaw ye ne ka kulu senuma kan Jerusalɛm. U bɛ na i ko Israɛl bɔnsɔn bɛ na ni nili fɛnw ye daga saniyalenw kɔnɔ Matigi ka so kɔnɔ.
[21] Ne na sarakalasebaaw ni Levitew ɲɛnatɔmɔ u cɛma.» Matigi ko ten.
[22] K'a masɔrɔ Matigi ko: «Ne na sankolo kuraw ni dugukolo kura minw da, olu na to yen cogo min na, o cogo la aw bɔnsɔn ni aw tɔgɔ na to ne ɲɛ kɔrɔ ten.»
[23] Matigi ko: «Kalo kura o kalo kura ani lafiɲɛ don o lafiɲɛ don dafɛnw bɛɛ bɛna u biri ne kɔrɔ ka ne bato.
[24] Ni mɔgɔw bɔra dugu kɔnɔ tuma min na, mɔgɔ minw murutira ne ma, u na olu suw ye, k'a masɔrɔ u ntumu tɛ sa, u jenili kɛ tasuma tɛ dufa. U na kɛ dafɛnw bɛɛ ɲiginna fɛn ye.»