[1] Matigi Ala Ni bɛ ne kan, k'a masɔrɔ Matigi ye ne mun ko ne ka taa kibaru duman fɔ faantanw ye. A ye ne ci ka taa mɔgɔ jigitigɛlenw jigi tugu, ka jɔnw hɔrɔɲali ko welewele da, k'a fɔ kasola mɔgɔw ye, ko u na bɔ kaso la,
[2] Matigi na a ka ɲumaya jira a ka mɔgɔw la san min na, ka o welewele da. Matigi na a mɔnɛbɔ a juguw la don min na, ka o fana welewele da. A ye ne ci ka mɔgɔ ɲɛgwanbaatɔw dusu suma.
[3] Sion kɔnɔ mɔgɔ minw bɛ ɲɛgwan na, a ye ne ci ka masafugula di olu ma bugurijɛ nɔ na, ka sewa tulu di u ma kasi nɔ na, ka tanuli dɔnkili di u ma dusukasi nɔ na, walisa u ka wele ko tilennenya jirisunw, Matigi ye o jiri minw turu a nɔɔrɔ kama.
[4] U na tiɲɛn yɔrɔ kɔrɔw jɔ, yɔrɔ minw lankoloɲalen mɛnna, u na olu lawuli. Dugu minw cira kabini tuma jan, u na olu jɔ ko kura.
[5] Dunanw na kɛ aw ka bagan gɛnnaw ye, jamana wɛrɛ mɔgɔw na kɛ aw ka sɛnɛkɛlaw ni rezɛn nakɔ sɛnɛbaaw ye.
[6] Nka aw na wele ko: «Matigi ka sarakalasebaaw». Mɔgɔ na aw wele ko: «An ka Ala ka baaradenw». Aw na ɲagali siyaw ka nafolow kosɔn, u ka saramaya na di aw ma.
[7] Aw ye maloya min sɔrɔ, aw na o ɲɔgɔn bonyali fila sɔrɔ. Aw tun wayibana kosɛbɛ, nka aw na ɲagali aw niyɔrɔ ɲuman ko la. O cogo la aw na niyɔrɔ fila-fila sɔrɔ u ka jamana la. Aw niyɔrɔ na kɛ sewa banbali ye kudayi.
[8] K'a masɔrɔ ne, Matigi, tiɲɛ kow ka di ne ye haali. Ne bɛ binkanni ni tilenbaliya kow haramu. Ne na baraji dafalen di aw ma, ka ne ka layidu wulibali ta aw ye badaa.
[9] Aw bɔnsɔnw na lakodɔn yɔrɔw bɛɛ la, olu ta denw na lakodɔn siyaw bɛɛ fɛ. Mɔgɔ minw bɛɛ bɛ u ye, olu n'a dɔn ko Matigi dubara siya min ye, o don.
[10] Ne bɛ ɲagali Matigi la. Ne dusukun bɛ ɲagali kosɛbɛ ne ka Ala kosɔn, k'a masɔrɔ a ye kisili dulɔki don ne la ka tilennenya dulɔki don ne kan na, i ko kɔɲɔcɛ min masirilen bɛ ni kunna jala ye, i ko kɔɲɔmuso masirilen bɛ ni a ka masiri fɛnw ye.
[11] Dugukolo bɛ a kan fɛn faletaw falen cogo min na, nakɔ bɛ a kɔnɔ fɛn dannenw falen cogo min na, Matigi Ala na tilennenya ni tanuli falen siyaw bɛɛ ɲɛ na o cogo la.