[1] O don na Matigi na sakɔrɔ Leviatan, sa kurulen bolitɔ gosi ni a ka npanba barikama gɛlɛnma ye ka o kɔgɔji dafɛnba faga.
[2] O don na, aw ka dɔnkili da rezɛn nakɔ ko la.
[3] Ne, Matigi na a kɔlɔsi, k'a sɔn tuma bɛɛ. Ne na a kɔlɔsi su fara tile kan walisa fɛn si kana a tiɲɛn.
[4] Dimiya si tɛ ne kɔnɔ tun. Ni nwɔni ni nɔnfɔn nwɔnimaw tun ye ne kɛlɛbaaw ye, ne tun na u kɛlɛ, ne tun na u jeni ɲɔgɔn fɛ,
[5] fo ni u ye ne kɛ u dogo yɔrɔ ye ka hɛrɛ ɲini ne fɛ, ɔwɔ, ka hɛrɛ ɲini ne fɛ.
[6] Don dɔ la, Yakuba dili na nugukunw bɔ, Israɛl na feere ka woyo. U denw na dugukolo yɔrɔw bɛɛ fa.
[7] Ala ye a ka mɔgɔw gosi i ko a ye u juguw gosi cogo min na wa? Israɛl bɔnsɔn fagara i ko u fagabaaw fagara cogo min na wa?
[8] I ye u tɔɔrɔ ka u ci ka taa jɔnya la yɔrɔ jan na, ka taa ni u ye i ka kɔrɔn fɛ fiɲɛ fɛ, nka a ma tɛmɛn a dan kan.
[9] O de y'a to Yakuba ka tilenbaliya kafarila, nin de ye a ka jurumu kafari bɛɛ nɔ ye. A ka saraka bɔlanw kabakurunw bɛɛ bɛ don buguri la i ko laso kabakurunw mugumugu. Boliw ni tile bato samasenw tɛna jɔ tun.
[10] Dugu barikama halakira, mɔgɔ sigi sow lankolon bilalen don i ko kungokolon. Misi bɛ taa bin dumu yen, o na i da ka jiribolow ɲimi.
[11] Ni a jiribolow jara, u na karikari, musow bɛ taa ka u jeni, k'a masɔrɔ hakili tɛ a ka mɔgɔw fɛ, o de kosɔn u Dabaa ma hinɛ u la. Min ye u da, o tɛ makari u la.
[12] O don na Matigi na a ka suman tinsan gosili daminɛ, k'a daminɛ Ufrate ba da la fo ka taa se Misira kɔji ma. A na aw, Israɛl bɔnsɔn kelen-kelen lajɛ yɔrɔ kelen na.
[13] O don na buruba na fyɛ. O tuma la minw tununnen bɛ Asiri jamana kɔnɔ ani minw bɛ jɔnya la Misira jamana kɔnɔ, olu bɛɛ na kɔsegin ka u biri Matigi ɲɛ kɔrɔ kulu senuma kan Jerusalɛm.