[1] Hilkija denkɛ Jeremi ka kuma filɛ. Benjamɛn jamana dugu Anatɔt sarakalasebaa dɔ tun don.
[2] Matigi ka kuma sera Jeremi ma, Amɔn denkɛ Josiasi, Juda bɔnsɔn ka masakɛ ka masaya san tan ni sabanan la.
[3] A kumana a fɛ fana Josiasi denkɛ Jojakim ka masaya waati la fo ka taa se Josiasi denkɛ Sedesiasi, Juda bɔnsɔn ka masakɛ ka masaya san tan ni kelennan ban tuma ma, fo ka taa se o kalo duurunan ma, Jerusalɛmkaw cɛ tuma la ka taa jɔnya la.
[4] Ayiwa, Matigi ka kuma sera ne ma, ko:
[5] «Sani ne ka i dila i ba dɛbɛ la, ne ye i dɔn. Sani i ka bange, ne ye i saniya ka a latigɛ ko i na kɛ siyaw ka kira ye.»
[6] O tuma la ne y'a jaabi ko: «E, Matigi Ala, ne tɛ se kuma la, sabu ne ye denmisɛn ye.»
[7] Matigi ko: «I kan'a fɔ ko i ye denmisɛn ye. Ne bɛ i ci mɔgɔ minw ma, i ka taa olu yɔrɔ. Ne bɛ ci minw fɔ i ye, i ka olu fɔ u ye.
[8] I kana siran u ɲɛ sabu ne bɛ i fɛ ka i tila.» Matigi ko ten.
[9] O kɔ, Matigi y'a bolo mɔɔnɔbɔ ka o maga ne da la k'a fɔ ne ye ko kura ko: «Ne ye ne ka kuma don i da la.
[10] A filɛ, ne ye i sigi siyaw ni masayaw bɛɛ kun na bi, walisa i ka u tufa ka bɔ u ka yɔrɔ la ka u tiɲɛn ka u halaki, ka u jɔ ka u turu.»
[11] Matigi ka kuma sera ne ma, ko: «Jeremi, i ɲɛ bɛ mun na?» Ne y'a jaabi ko: «Neɲɛ bɛ amande jiribolo la.»
[12] Matigi y'a fɔ ne ye ko: «I y'a ye k'a lasaa, k'a masɔrɔ ne na ne janto ne ka kuma fɔlen na k'a dafa.»
[13] Matigi ka kuma sera ne ma a siɲɛ filanan la, ko: «Iɲɛ bɛ mun na?» Ne y'a jaabi ko: «Neɲɛ bɛ daga kɔnɔ ji wulitɔ la, a funteni bɛ bɔ saheli fan fɛ ka se ne ma.»
[14] Matigi y'a fɔ ne ye ko: «Bɔnɛ ka bɔ saheli yanfan fɛ, ka bi jamana mɔgɔw bɛɛ kan.
[15] K'a masɔrɔ ne y'a fɔ ko, ne na siyaw bɛɛ ka masayaw wele ka bɔ saheli yanfan fɛ. Olu bɛɛ bɛ na ka u ka masasigilanw sigi Jerusalɛm dondaw la. U na a lamini kogow kooli, u na Juda bɔnsɔn ka duguw bɛɛ kɛlɛ.
[16] Ne na ne ka kiri tigɛ o jamana mɔgɔw kan u ka ko jugu kɛlenw kosɔn, k'a masɔrɔ u ye ne janfa ka suma diyalanw wusu bato fɛn wɛrɛw ye, ka u biri u yɛrɛw bolo baara nɔw kɔrɔ.
[17] O de kosɔn i ka wuli ka i cɛ siri. Ne na ko minw fɔ i ye, i ka olu fɔ u ye. I kana siran u ɲɛ. Ni o kɛra, ne n'a to i ka yɛrɛyɛrɛ u ɲɛ kɔrɔ.
[18] K'a daminɛ bi la, ne na i jɔ ka i kɛ i ko dugu barikama ka i kɛ i ko nɛgɛfin samasen ka i kɛ i ko nsiranɛgɛ kogo jamana bɛɛ kama, Juda bɔnsɔn ka masakɛw ni u ka kuntigiw ni u ka sarakalasebaaw ani jamana mɔgɔw bɛɛ kama.
[19] U na i kɛlɛ, nka u tɛna se sɔrɔ i kan, sabu ne bɛ i fɛ ka i tila.» Matigi ko ten.