[1] Ne makunnen tɛna to Sion kanuya kosɔn, ne tɛna ne lafiya Jerusalɛm kanuya kosɔn, sani a ka kisili tilennen ka jira i ko kɛnɛbɔda, sani a ka kisili ka manamana i ko tamana.
[2] O tuma la siyaw na i ka tilennenya ye, masakɛw bɛɛ na i nɔɔrɔ ye. Tɔgɔ kura na da i la, Matigi yɛrɛ da na o ɲɛnatɔmɔ.
[3] I na kɛ nɔɔrɔ masa kunna jalamugu ye Matigi bolo, ka kɛ masafugula nɔɔrɔma ye i ka Ala bolo.
[4] I tɛna wele ko: «Bilalen», i ka dugukolo tɛna wele ko: «Yɔrɔ lankolon» tun. nka a na wele ko: «Matigi diyaɲe yɔrɔ». I ka dugukolo na wele ko: «Kɔɲɔmuso», k'a masɔrɔ i ko na diya Matigi ye, i ka dugukolo na maminɛ.
[5] Kamalen bɛ npogotigi furu cogo min na, ale na i furu o cogo la. Npogotigi ko ka di a maminɛ cɛ ye cogo min na, i ko na diya i ka Ala ye o cogo la.
[6] Jerusalɛm, ne ye kɔlɔsilikɛlaw sigi i lamini kogow kun na, olu tɛna u makun su fara tile kan. Aw minw bɛ Matigi tɔgɔ wele, aw kana aw lafiya.
[7] Aw kana a to Matigi ka i lafiya sani a ka Jerusalɛm jɔ ko kura k'a kɛ dugukolo bɛɛ nɔɔrɔ ye.
[8] Matigi ye i kali a kininbolo ni a bolo barikama la ko: «Ne tɛna i ka dumuni sigi i juguw kɔrɔ, jamana wɛrɛ denw tɛna i ka diwɛn sɛɛnɛlen ji min.
[9] Nka minw bɛ suman tigɛ, olu na dumuni kɛ, ka sewa u bolo baara nɔw la, ka Matigi tanu. Minw ye rezɛn nakɔ sɛnɛ, olu na o diwɛn min ne batosoba senuma dukɛnɛ la.»
[10] Jerusalɛmkaw, aw ka bɔ, aw ka tɛmɛn dondaw fɛ. Aw ka bɔ joona ka sira labɛn mɔgɔ nataw ye. Aw ka sira dakɛɲɛ, aw ka kabakurunw cɛ ka bɔ yen ka darapo siri k'a kɛ taamashyɛn ye siyaw ye.
[11] Matigi kan min mɛnna fo dugukolo dan na, ko aw k'a fɔ Sion mɔgɔw ye ko: «Aw ka Kisibaa bɛ na. A bɛ na ni a ka baraji ye. A ka tɔɔrɔ nafa bɛ a bolo.»
[12] Matigi ye minw kunmabɔ, olu na wele ko: «Siya Senuma». E Jerusalɛm na wele ko: «Dugu mandi» ani «Dugu min ma to a kelenna.»