[1] Mɔgɔ minw bɛ sariya tilenbaliw sigi ani minw bɛ kiri tilenbaliw sɛbɛn,
[2] walisa ka ne ka mɔgɔw faantanw ka jo bɔsi u la, ka u jalaki kiri la, ka muso cɛ salenw kɛ fɛn cɛtaw ye, ka bi falatɔw kan, bɔnɛ bɛ olu ye.
[3] Ni aw ka hakɛw sara tuma sera, ni bɔnɛ sera aw ma ka bɔ yɔrɔ jan, aw na mun kɛ o don na? Aw na boli ka taa jɔni sɛgɛrɛ ko a ka aw dɛmɛ? Aw na aw ka nafolow mara yɔrɔ jumɛn?
[4] Fɛn wɛrɛ si tɛ aw ɲɛ ni zu ni jɔnya ni fagali tɛ. Hali o, a ka dimiya tɛna ban, a bolo mɔɔnɔbɔlen na to aw kama.
[5] Bɔnɛ bɛ Asirika ye, a kɛra ne ka dimiya bere ye, a bolo bere kɛra ne ka gosili kɛlan ye.
[6] Ne na a ci siya Ala ɲɛsiranbali kama. Ne diminna mɔgɔ minw kɔrɔ, ne na a ci a ka o mɔgɔw ka fɛnw bɔsi u la, ka u foroki u senw kɔrɔ i ko dugu bɔlɔnw na bɔgɔ.
[7] Nka o tɛ Asirikaw sago ye, u ma miiri o la. U tɛ foyi miiri u kɔnɔ ni jamaba farafarali ni olu halakili tɛ.
[8] A ko: «Ne ka kuntigiw bɛɛ kelen-kelen tɛ masakɛ ye wa?
[9] Ne ma Kalno ni Karkemis dugubaw minɛ wa, ka Hamat ni Arpad ka Samari ni Damasi fana minɛ wa?
[10] Ne bolo ye bato fɛn barikantanw ka masayaw gosi, k'a sɔrɔ olu tun ka ca ka tɛmɛn Jerusalɛm ni Samari kɔnɔ boliw kan.
[11] Ne ye min kɛ Samari ni a kɔnɔ boliw la, ne tɛ se ka o ɲɔgɔn kɛ Jerusalɛm ni a kɔnɔ boliw la wa?»
[12] Nka Matigi tilara a ka kɛwalew kɛli la Sion kulu ni Jerusalɛm la tuma min na, a ko: «Ne yɛrɛ na ne ka kiri bi Asiri masakɛ kan a ka kɛwalew kosɔn ka kɛɲɛ ni a dusukun ka kuncɛbaya ni a ka yɛrɛ bonya ye.»
[13] Asiri masakɛ y'a fɔ ko: «Ne ye o bɛɛ kɛ ni ne bolo barikama ni ne yɛrɛ ka hakilitigiya ye, k'a masɔrɔ ne hakili ka di. Ne ye siyaw dancɛw yɛlɛma ka mɔgɔw ka nafolo bɔsi u la. I ko cɛ ja gɛlɛn, ne ye masakɛw jigin ka bɔ u ka masasigilanw kan.
[14] Ne bolo ye mɔgɔw ka nafolo minɛ i ko mɔgɔ bɛ kɔnɔ ɲaa minɛ i bolo cogo min na, ka mɔgɔw ka nafolo cɛ i ko mɔgɔ bɛ kɔnɔfan caman cɛ cogo min na. Ne yɛrɛ ye dugukolo minɛ ka kɛ ne ta ye. Fɛn si ma a kamanfura lamaga, fɛn si ma a da yɛlɛ, fɛn si ma kasi.»
[15] Nka jele bɛ a yɛrɛ bonya jiritigɛla kama wa? Jiri tigɛ si bɛ a yɛrɛ bonya jirisila kama wa? Bere tɛ a tigi kɔrɔta, beretigi bɛ bere kɔrɔta.
[16] O de kosɔn Matigi, Kɛlɛbolow Matigi na Asiri masakɛ ka cɛ farinw gosi ni sɔgɔsɔgɔninjɛ ye k'u faga. Tasumaba na wuli ka a nɔɔrɔba jeni.
[17] Israɛl nɔɔrɔ kɛnɛ na kɛ tasuma ye. A ka Senuma na kɛ tasuma mana ye. O na Asiri ni a ka nwɔniw ni a ka nɔnfɔn nwɔnimaw bɛɛ jeni ka u ban don kelen na.
[18] Ka bɔ duguma fo ka se san fɛ, u bɛɛ na jeni. U ka foro ɲumanw ni u ka rezɛn nakɔw na jeni ka u ban, i ko bana jugu bɛ mɔgɔ ban cogo min na.
[19] O tuma la u ka kungo kɔnɔ jiriw tɔ tɛna kɛ bɛrɛ ye, hali denmisɛn na se ka u dan ka u dama dɔn.
[20] O don na Israɛl tɔ tolen minw ɲɛnama tora Yakuba ka so kɔnɔ, olu tɛna u jigi da u tiɲɛnbaaw kan tun, nka u na u jigi da Matigi, Israɛl ka Senuma ka tilennenya bɛɛ kan.
[21] U tɔ minw tora, olu na kɔsegin, ɔwɔ, Yakuba ka so tɔ tolen na kɔsegin Sebaayatigi Ala ma.
[22] O bɛɛ n'a ta, hali ni e, Israɛl mɔgɔw kɛra i ko kɔgɔji dala cɛncɛn, u tɔ tolenw dɔɔnin dɔrɔn na kɔsegin. Halakiliba min latigɛra aw ye, o na tilennenya caya i ko ji woyo.
[23] Tiɲɛnniba min latigɛra, Kɛlɛbolow Matigi na o lase jamana yɔrɔw bɛɛ ma.
[24] Matigi, Kɛlɛbolow Matigi ko: «Ne ka mɔgɔw, aw minw sigilen bɛ Sion, aw kana siran Asirikaw ɲɛ ni u bɛ aw gosi ni busan ye ka u ka bere kɔrɔta aw kama tuma min na i ko Misirakaw delila k'a kɛ cogo min na ka kɔrɔ.
[25] K'a masɔrɔ ni waati dɔɔnin tɛmɛnna, ne ka dimiya na ban. Ne dusu na bɔ o mɔgɔw kama ka u halaki.»
[26] O tuma la Kɛlɛbolow Matigi na wuli u kama ni busan ye i ko a ye Madiankaw gosi Orɛb fara yɔrɔ la cogo min na. A na a ka bere yankan kɔgɔji san fɛ, o na wuli i ko a ye min kɛ Misira jamana la.
[27] O don na Asirikaw ka doni girin na jigin ka bɔ i kun. U ka zu na bɔ i kan na, o zu na kari i barika kosɔn.
[28] Juguw sera Ajat, u ye Migron cɛ tigɛ, u ye u ka minanw to Mikmas.
[29] U tɛmɛnna kulu cɛ tigɛ sira fɛ, u sigira Geba. Rama bɛ yɛrɛyɛrɛ, Saul ka Gibea bolila.
[30] Galim kɔnɔ mɔgɔw, aw ka kulokan bɔ. Lakiskaw, aw ka lamɛnni kɛ. Anatɔtkaw, bɔnɛ bɛ aw ye.
[31] Madmenakaw bolila. Gebimkaw bɛ dogo yɔrɔ ɲini.
[32] O don na juguw na u jɔ Nob. U na u bolo kɔrɔta Sion kulu kama, Jerusalɛm ka tintin kɔni.
[33] Matigi, Kɛlɛbolow Matigi na jiribolo misɛnw caron ni fariya ye. A na bolo kunbaw tigɛ, u kɔrɔtalenw na majigin.
[34] A na tu kɔnɔ jiriw tigɛ ni jele ye. Liban na bi Sebaayatigi bolo barika fɛ.