[1] E muso kɔna, i ka ɲagalikanba bɔ. Tin tɛ e min minɛ, i ka sewa ka dɔnkili da. K'a masɔrɔ Matigi ko muso min tora a kelen na, o denw na caya ka tɛmɛn muso cɛtigi denw kan.
[2] I ka i ka finiso yɔrɔ bonya, i ka i ka finiso finiw bonya. I kana a dɔgɔya, i ka a jurukisɛw janya ka a bɔlɔw gengen.
[3] K'a masɔrɔ i na jiidi ka taa kinin ni numan fɛ. I bɔnsɔn na siyaw ka dugukolo ta ciyɛn ye ka mɔgɔ sigi dugu cilenw bɛɛ la ko kura.
[4] I kana siran k'a masɔrɔ i tɛna maloya. I kana i kun biri k'a masɔrɔ i tɛna dɔgɔya. I na ɲinɛ i denmisɛnma la maloya kow kɔ, i hakili tɛna jigin i ka muso cɛ saleɲa mafiɲɛyali kow la tun.
[5] K'a masɔrɔ i furucɛ ye i Dabaa ye. A tɔgɔ ko, Kɛlɛbolow Matigi. I Kunmabɔbaa ye Israɛl ka Senuma de ye, a tɔgɔ ko, dugukolo bɛɛ ka Ala.
[6] Matigi bɛ i wele ka na i ko muso bilalen, ɲɛnasisilen, i ko kamalen muso gɛnnen.
[7] I ka Ala ko: «Ne ye i bila waati dɔɔnin, nka ne na i ladon ne ka makariba kosɔn.
[8] Ne ye ne ɲɛda dogo i la ne ka dimiya waati la, nka ne bɛ na hinɛ i la ne ka ɲumaya banbali kosɔn.» I Kunmabɔbaa Matigi ko ten.
[9] Ne ye min kɛ Nuhun tile la, ne bɛ o ɲɔgɔn kɛ bi fana, ne ye ne kali ko jiba tɛna dugukolo tunun tun. Ne bɛ o ɲɔgɔn layidu ta i ye bi, ko ne tɛna dimin i kɔrɔ tun, ne tɛna i poroporo tun.
[10] Hali ni kuluw bɔra u nɔw na, hali ni tintinw lamagara, i ka kanuya min bɛ ne la, o tɛ se ka yɛlɛma. Ne ka hɛrɛ layidu min tara i ye, o tɛna lamaga. Matigi min bɛ makari i la, o ko ten.
[11] E min tɔɔrɔla fo ka i bi fiɲɛba fɛ, i ma dusu suma sɔrɔ. Nka ne na i jɔ ni kabakurun sɔngɔ gɛlɛnw ye, ne na i ju sigi safir kabakurun kan.
[12] Ne na i seleke jɔ ni rubi kabakurun ye, i dala konw na kɛ eskarbukile kabakurun ye. I lamini kogow na jɔ ni kabakurun sɔngɔ gɛlɛnw ye.
[13] Matigi na i denw bɛɛ kalan. I denw na hɛrɛ dafalen sɔrɔ.
[14] I ka tilennenya na dafa. Hakili ɲaami kow bɛɛ na mabɔ i la, k'a masɔrɔ i tɛna siran fewu. Hakili ɲaami kow bɛɛ na ban, sabu siran ko si tɛna gɛrɛ i la.
[15] Ni u bɛ ɲɔgɔn lajɛ i kama, o tɛna kɛ ne nɔ ye. Mɔgɔ minw nana jɛ siri i kama, olu na bi i ɲɛ kɔrɔ.
[16] Numu min bɛ fan fyɛ, ka a yɛrɛ ka baara minan dila, ne ye o da. Ne ye tiɲɛnnikɛla fana da ka a ka baara kɛ tiɲɛnni ye.
[17] O de kosɔn kɛlɛkɛ minan minw bɛ dila i kama, olu bɛɛ na kɛ nafantanw ye. Nɛnkun minw bɛ wuli i kama kiri la, i na olu bɛɛ jalaki. O na kɛ Matigi ka jɔnw ciyɛnw ye ani ne ye kisili min latigɛ u ye. Matigi ko ten.