[1] Mɔgɔ tilennenw bɛ sa, mɔgɔ si tɛ miiri a ko la. Mɔgɔ ɲumanw bɛ bɔ yen, nka mɔgɔ si t'a faamu ko a kisira tɔɔrɔ ma.
[2] A bɛ dun hɛrɛ la. Ɔwɔ, mɔgɔ minw taamana sira jɛlen fɛ, olu bɛ u da u ka lafiya yɔrɔ la.
[3] Nka aw, subagamusodenw, aw ka gɛrɛ yan na, aw jatɔmusodenw, mɔgɔ tilenbaliw.
[4] Aw bɛ yɛlɛ bɔ jɔn na? Aw bɛ aw nɛn labɔ jɔn kama ka a lagosi? Aw nkalontigɛlaw bɔnsɔn, aw tɛ kanbilalidenw ye wa?
[5] Boli nɛgɛ bɛ gwan aw la jirisunbaw ani jiri furamaw bɛɛ kɔrɔ. Aw bɛ aw ka denmisɛnw kan tigɛ ji woyo da la kulu furancɛw la.
[6] I bɛ kɔjila kabakurun nugulenw bato. Ɔwɔ, o ye i niyɔrɔ ye. I bɛ i ka saraka bɔntaw bɔn o kabakurunw kan ka u sɔn. O ɲɔgɔn boli batoli ko bɛ se ka diya ne ye wa?
[7] I bɛ i ka dalan da kulu jamanjanw san fɛ ka yɛlɛn yen ka i ka sarakaw lase yen.
[8] I ye i ka boliw dulon dala konw ni kondon jiriw la so kɔnɔ. Ka i mabɔlen to ne la, i ye birifini bɔ ka yɛlɛn dali dlan kan. I ye i ka dalan kɔrɔta san fɛ ka layidu ta bato fɛn fufafu ye. U ka jatɔya ko diyara i ye, i ye i yɛrɛ nɔgɔ u filɛli la.
[9] I taara masakɛ yɔrɔ la ni tulu ye ka suma diyalanw caya. I ye i ka cidenw ci ka taa jamana jan na, i jiginna ka don lahara dugu kɔnɔ.
[10] I ye i yɛrɛ sɛgɛn i ka sira taamali fɛ, i m'a fɔ ko: «Nin ye fuu de ye.» I ye barika sɔrɔ, o de kosɔn i ma ban cogo dɔn.
[11] Ayiwa, i dun bɛ siran jɔn ɲɛ? I bɛ siran jɔn ɲɛ fo i ye kanntanya kɛ ne la, fo i tɛ i hakili to ne la, wala ka miiri ne ko la? Yala i m'a dɔn ko ne ye ne makun kabini tuma jan wa? O de kosɔn i ma siran ne ɲɛ.
[12] Ayiwa, ne bɛ na i ka tilennenya ni i ka kɛtaw fɔ, nka olu tɛna foyi ɲɛ i ye.
[13] I tugura bato fɛn minw nɔ fɛ, ni i kasira tuma min na, olu ka na i kisi. Fiɲɛ na taa ni u bɛɛ ye, dafiɲɛ na u bɛɛ taa ka bɔ yen. Nka mɔgɔ min ye a yɛrɛ kalifa ne la, o tigi na jamana sɔrɔ ka kɛ ciyɛn ye ka sigi ne ka kulu senuma kan.
[14] A n'a fɔ ko: «Aw ka sira dila, aw ka sira dila k'a bɛɛ dakɛɲɛ. Aw ka sen talon fɛnw bɔ ne ka mɔgɔw ka sira la.»
[15] Kɔrɔtalenba min sigilen bɛ badaa masasigilan kan, ni a tɔgɔ ka senu, ale ko: «Ne sigilen bɛ san fɛ, yɔrɔ senuma kɔnɔ, nka ne sigilen bɛ mɔgɔ majiginlen nimisabaatɔ fɛ, ka mɔgɔ majiginlen ni kuraya, ka dusu nimisabaatɔ barika bonya.
[16] Ne tɛna to ka kɔrɔfɔli kɛ tuma bɛɛ, ne diminnen tɛna to badaa. Ni ne ye o kɛ, ne ye ni ani farisogo minw da, olu na halaki ka u ban ka bɔ ne ɲɛ kɔrɔ.
[17] «Ne diminna Israɛl bɔnsɔn kɔrɔ u ka wasabaliya juguw kosɔn ka u gosi. Ne diminnen ye ne ɲɛda dogo u la walisa ne kana u ye, k'a masɔrɔ kanbilalidenw bɛ taama ka kɛɲɛ ni u yɛrɛ dusukun dulenw ye.
[18] Nka ne ye u taama cogo kɔlɔsi, ne na u kɛnɛya. Ne na u ɲɛ minɛ ka u dusu saalo, i ko mɔgɔ dusu kasilenw dusu bɛ saalo cogo min na.
[19] Mɔgɔ min bɛ tanuli kɛ ni a dawolow ye, Matigi b'a fɔ o ye ko: ‹Mɔgɔ min yɔrɔ ka jan ani min yɔrɔ ka surun, hɛrɛ ka kɛ o ye, hɛrɛ ka kɛ o ye. Ɔwɔ, ne na a kɛnɛya.›
[20] Nka mɔgɔ jugu bɛ i ko kɔgɔji kuruw lamagatɔ, minw tɛ se ka u yɛrɛw minɛ. O jikuruw bɛ taa ka na ni ɲamaɲaman ye.
[21] Ne ka Ala ko: ‹Hɛrɛ si tɛ mɔgɔ juguw ye.›»