[1] Amoz denkɛ Esayi ye yeli fɛn min ye Juda bɔnsɔn ni Jerusalɛm ko la Juda bɔnsɔn ka masakɛw Oziasi ni Jotam ni Akaz ani Ezekiasi tilew la, o filɛ nin ye.
[2] Matigi ko: «Sankolow, aw ka lamɛnni kɛ, dugukolo, i tulo majɔ, k'a masɔrɔ ne ye denw balo ka u lamɔ, nka u murutira ne ma.
[3] Misi bɛ a tigi dɔn, fali bɛ a tigi ka du dɔn, nka Israɛl ma foyi dɔn, hakili tɛ ne ka mɔgɔw fɛ.
[4] «Aw ye siya jurumutɔ ye, aw ka tilenbaliya kɛra doniba ye aw kun. Siya kojugukɛla don, denmisɛn juguw don. Aw ye Matigi, Israɛl ka Ala Senuma bila k'a mafiɲɛya. Aw segira kɔ ka mabɔ a la.
[5] Mun y'a to aw bɛ to ka muruti ka taa ɲɛ, k'a sɔrɔ bugɔ yɔrɔ wɛrɛw tɛ aw la tun? Aw kunkolo yɔrɔw bɛɛ joginna, aw dusukun barika bɛɛ banna.
[6] Ka bɔ aw sentɛgɛ la ka taa bila aw kunkolo la, kɛnɛya yɔrɔ si tɛ aw la, fɔ jogindaw ni bugɔli nɔw ani joliw. Fura ma kɛ u la, tulu ma mun u la, u ma siri.
[7] Aw ka jamana lankoloɲara, aw ka duguw jenina ni tasuma ye. Dunanw bɛ aw ka sɛnɛ fɛnw bɛɛ cɛ aw yɛrɛw ɲɛ na. Fɛn bɛɛ tiɲɛnna ka ban i ko juguw ye jamana tiɲɛn.
[8] Jerusalɛm tora a kelen na i ko gwa min bɛ rezɛn nakɔtu la, i ko togo min bɛ a dan na kɔnkɔnburu foro la. A bɛ i ko dugu min koolilen bɛ a juguw fɛ.
[9] Ni Kɛlɛbolow Matigi tun ma an dɔw mara, an tun na halaki i ko Sodɔmɛ ni Gomɔrɛ halakira cogo min na.
[10] «Jerusalɛm kuntigiw, aw minw bɛ i ko Sodɔmɛ ni Gomɔrɛ kuntigiw, a' ye aw tulo majɔ Matigi ka kuma la. A'ye aw ka Ala ka sariya lamɛn.»
[11] Matigi ko: «Aw ka saraka fagataw caman bɛ mun ɲɛ ne ye? Ne fara aw ka sagajigi saraka jenitaw ni aw ka misi tɔlɔlenw kɛn na. Ntura ni sagaden ni bakɔrɔ joli man di ne ye tun.
[12] Aw nana ne ɲɛ kɔrɔ tuma min na, jɔn y'a fɔ ko aw ka ne ka dukɛnɛ cɔngɔ aw sen kɔrɔ?
[13] Aw kana na ni nili fɛn fufafuw ye ne ɲɛ kɔrɔ tun. Ne ɲiginna aw ka suma diyalanw ni kalo kura lajɛliw ni lafiɲɛ don lajɛliw ni jama lajɛ senumaw la. Aw bɛ ɲɔgɔn lajɛ ka ko jugu minw kɛ, ne tɛ se ka ne ɲɛ da olu kan.
[14] Aw ka kalo kuraw ni aw ka seliw man di ne dusu ye fewu. U bɛ ne tɔɔrɔ, ne sɛgɛnna u muɲuli la.
[15] Ni aw ye aw bolow mɔɔnɔbɔ ka delili kɛ, ne bɛ ne ɲɛ datugu walisa ne kana na aw ye. Ni aw ye delilibaw kɛ, ne tɛna aw lamɛn, k'a masɔrɔ aw bolow nɔrɔkɔlen don mɔgɔ joli la.
[16] Aw ka aw ko ka aw saniya. Aw ka aw ka kɛwale juguw bɔ ne ɲɛ kɔrɔ ka ko jugu kɛli dabila.
[17] Aw ka ko ɲuman kɛ dege ka tilennenya ɲini ka mɔgɔ tɔɔrɔlenw dɛmɛ, ka ko tilennenw kɛ falatɔw ye, ka muso cɛ salenw lafasa.»
[18] Ayiwa Matigi ko: «Aw ka na, an ka ɲɔgɔn faamu. Hali ni aw ka jurumuw bilenna kosɛbɛ, u na jɛya i ko neje. Hali ni u bilenna fo ka fin, u na jɛya i ko sagasi jɛman.
[19] Ni aw ye kan minɛli kɛ ni dusukun ɲuman ye, aw na jamana dumuni ɲumanw dun.
[20] Nka ni aw ma sɔn, ni aw murutira, npan na aw halaki ka aw ban, k'a masɔrɔ Matigi da ye o fɔ.»
[21] A filɛ, nin dugu min tun ye kantigi ye, o kɛra i ko jatɔmuso. A falen tun bɛ tiɲɛ kow la, tilennenya sigilen tun bɛ a kɔnɔ, nka sisan a kɛra mɔgɔ fagalaw sigi yɔrɔ ye.
[22] I ka warijɛ kɛra i ko nɛgɛbo, i ka diwɛn yɛlɛmana ka kɛ ji ye.
[23] I ka kuntigiw kɛra mɔgɔ murutilenw ni sonyalikɛlaw ye. Surɔ fɛn ni daguli fɛn ko ka di u bɛɛ ye. U bɛɛ bɛ boli wari nɔ fɛ. U tɛ kiri tilennen tigɛ falatɔw ye, u tɛ u tulo majɔ muso cɛ salenw kasikan na.
[24] O de kosɔn Matigi, Sebaayabɛɛtigi, fɛn bɛɛ Dabaa, Israɛl ka Ala barikama ye nin fɔ, ko: «Ne na se sɔrɔ ne juguw kan, ka ne mɔnɛbɔ ne juguw la.
[25] Ne na ne bolo se i ma ko kura, ne na i saniya i ko nɛgɛ bɛ saniya cogo min na, ka i saniya ka bow bɛɛ bɔ i la.
[26] Ne na kiritigɛlaw di i ma i ko fɔlɔ cogo, ka laadibaaw di i ko waati tɛmɛnnen cogo. O kɔ, i na wele ko tilennenya dugu ani kantigiya dugu.»
[27] Sion na kunmabɔ ko tilennen fɛ, minw na dannaya kɛ, olu na kunmabɔ tilennenya barika la.
[28] Nka kuncɛbaw ni jurumukɛlaw na halaki ɲɔgɔn fɛ, minw bɛ Matigi bila, olu na halaki.
[29] Aw bɛ sensun minw kanu, aw na maloya olu kosɔn. Nakɔ minw ko tun ka di aw ye, aw na kunna siri olu kosɔn.
[30] Aw na kɛ i ko sensun fura fɔsɔnfɔsɔnnen, ka kɛ i ko nakɔ jintan.
[31] Cɛ barikama na kɛ i ko dɔgɔ jalen, a ka kɛwalew na kɛ i ko tasuma fyenke. U fila bɛɛ na jeni ɲɔgɔn fɛ, mɔgɔ si tɛna se ka o tasuma dufa.