[1] Matigi na dugukolo bɛɛ halaki k'a lankolonya. A na dugukolo yɛlɛma a kun jugu kan ka mɔgɔw bɛɛ jɛnsɛn.
[2] Mɔgɔw bɛɛ na dama kɛɲɛ, sarakalasebaa fara mɔgɔ gwansan kan, kuntigi fara baaraden kan, mamuso fara baarakɛ muso kan, feerelikɛla fara sannikɛla kan, juru donbaa fara juru tala kan, tɔnɔ ɲinina fara dibaa kan.
[3] Dugukolo na lankolonya, a na tiɲɛn ka ban, k'a masɔrɔ Matigi ye o fɔ.
[4] Dugukolo bɛ kasi, a barika banna. Diɲɛ ɲɛnasisira, a fɛn bɛɛ tiɲɛnna. Dugukolo kan mɔgɔbaw tiɲɛnna.
[5] Dugukolo kan sigibaaw y'a nɔgɔ, k'a masɔrɔ u banna sariyaw ma, ka ci fɔlenw mafiɲɛya, ka layidu wulibali tiɲɛn.
[6] O de kosɔn danga na dugukolo bɛɛ tiɲɛn k'a ban. A kan mɔgɔw bɛɛ ka tilenbaliya jalaki na bi u kan. O kosɔn dugukolo kan mɔgɔw bɛɛ na ban, u la bɛrɛ ɲɛnama tɛna to.
[7] Diwɛn ɲuman ɲɛnasisira, rezɛn sunw fɔsɔnfɔsɔnna, mɔgɔ nisɔndiyalen bɛɛ bɛ ɲɛnasisi.
[8] Dununw fɔkan banna, ɲɛnajɛkan tɛ mɛn tun, nkɔni fɔkan tɛ bɔ tun.
[9] Dɔnkili dakan tɛ bɔ diwɛn min waati la. Minni fɛn farinmaw kunayara minnikɛlaw da la.
[10] Dugu tiɲɛnnen lankoloɲara. Sow bɛɛ da tugura, mɔgɔ si tɛ don u kɔnɔ.
[11] Kulokan bɛ bɔ dugu bɔlɔnw na sabu diwɛn dɛsɛra. Ɲagalikan bɛɛ banna, dɔnkili dakan banna dugukolo kan.
[12] Foyi tɛ dugu kɔnɔ fɔ halakili, dugu donda la konw gosira ka u tiɲɛn.
[13] Ɔwɔ, bɛrɛ tɛna to dugukolo kan mɔgɔw la, a na kɛ i ko olive sun gosira, wala rezɛn mɔ karilen kɔ, mɔgɔ bɛ rezɛn nɔɔrɔ min ɲini.
[14] O tuma la minw na kisi, olu na pɛrɛn ɲagali kosɔn. Kɔgɔji dala mɔgɔw na Matigi nɔɔrɔ bonyali ko fɔ ko:
[15] «Kɔrɔn fɛ mɔgɔw bɛɛ ka Matigi bonya. Matigi, Israɛl ka Ala tɔgɔ ka bonya kɔgɔji gunw kan.»
[16] Mɔgɔ minw bɛ fo dugukolo dan na, an na olu dɔnkili dakan mɛn ko: «Mɔgɔ Tilennen ka bonya.» Nka ne ko: «Ne halakira! Ne halakira! Ne ta tiɲɛnna!» Janfanciw ye janfanciya kɛ, janfanciw ye janfanciyaba kɛ.
[17] Aw minw sigilen bɛ dugukolo kan, siran kobaw ni dingɛ dunba ni jan bɛ aw ɲɛ.
[18] Minw bɛ boli siran kobaw ɲɛ, olu na bi dingɛ kɔnɔ. Ni min yɛlɛnna ka bɔ dingɛ dunba kɔnɔ, jan na o tigi minɛ, k'a masɔrɔ sankolola ji da yɛlɛla, dugukolo jusigilanw yɛrɛyɛrɛla.
[19] Dugukolo cira ka ɲɔɲɔ. Dugukolo pɛrɛnna fo ka bɔ ɲɔgɔn na. Dugukolo yuguyugura kojugu.
[20] Dugukolo na talontalon i n'a fɔ dɔlɔtɔ, a na yigiyigi i ko gwa. A ka tilenbaliya doni na da a yɛrɛ kun. A na bi fo a tɛ se ka wuli tun.
[21] O don na Matigi na sankolola kɛlɛbolow ni dugukolo kan masakɛw ka hakɛw sara.
[22] U na cɛ ka bila kaso la, kaso da na tugu u da la. Tile caman tɛmɛnnen kɔ, u na sara u ka hakɛw kosɔn.
[23] Kalo na bilen, tile tɛna yeelen bɔ, k'a masɔrɔ Kɛlɛbolow Matigi na sigi a ka masaya la Sion kulu kan Jerusalɛm. A nɔɔrɔ na manamana a ka cɛkɔrɔbaw ɲɛ kɔrɔ.