[1] Matigi ye a ka ɲɛnatɔmɔlen Sirus bolo minɛ k'a fɔ a ye ko: «Ne na siya wɛrɛw kolo i ye, ka masakɛw ka masayaw tiɲɛn ka da yɛlɛ i ye, walisa mɔgɔ si kana se ka o tugu.
[2] Ne na bila i ɲɛ ka sira labɛn k'a dakɛɲɛ. Ne na nsiranɛgɛ konw kari ka kon balabala nɛgɛw tigɛ.
[3] Ne na nafolo dogolen di i ma, ani nafolo min maralen bɛ yɔrɔ dogolenw na, walisa i k'a dɔn ko ne, Matigi, Israɛl ka Ala de ye i tɔgɔ wele.
[4] Ne ye i wele i tɔgɔ la ka i bila baara la, ne ka jɔnkɛ Yakuba ani ne ka ɲɛnatɔmɔlen Israɛl kanuya kosɔn. Ne ye nin bonya tɔgɔ di i ma, hali k'a sɔrɔ i ma ne dɔn.
[5] «Ne ye Matigi de ye, dɔ wɛrɛ si tɛ yen. Ala wɛrɛ si tɛ ne kɔ. Ne ye barika don i la, hali k'a sɔrɔ i ma ne dɔn,
[6] walisa kɔrɔn fɛ mɔgɔw ni tilebi fɛ mɔgɔw k'a dɔn ko Ala wɛrɛ si tɛ ne kɔ. Ne ye Matigi ye, dɔ wɛrɛ si tɛ yen.
[7] Ne bɛ kɛnɛyeelen bɔ ka dibi don, ka hɛrɛ kɛ ka bɔnɛ fana kɛ. Ne, Matigi de ye o bɛɛ kɛ.
[8] Sankolow, aw ka tilennenya toni ka bɔ san fɛ i ko ngomi. Sankabaw, aw ka tilennenya bi i n'a fɔ sanji. Dugukolo k'a da yɛlɛ walisa kisili ni tilennenya ka falen ka bɔ duguma ɲɔgɔn fɛ. Ne, Matigi ye o fɛnw da.»
[9] Mɔgɔ min bɛ a Dabaa sɔsɔ, bɔnɛ bɛ o ye, o bɔgɔn daga kelen min bɛ daga tɔw cɛma. Bɔgɔn dɔginnen b'a fɔ a dilabaa ye, ko a bɛ mun kɛ wa? Bolo la baara b'a fɔ a dilabaa ye, ko bolo t'i la wa?
[10] Mɔgɔ min b'a fɔ a fa ye ko: «I ye mun bange?» k'a fɔ a ba ye ko: «I ye mun wolo?» bɔnɛ bɛ o tigi ye.
[11] Matigi, Israɛl ka Senuma ni a Dabaa ko: «Jɔn bɛ se ka ko nataw fɔ ne ye? Aw bɛ se ka ci fɔ ne ye, ne denkɛw ni ne bolo baara ko la wa?
[12] Ne de ye dugukolo da ka a kan mɔgɔw dila. Ne bolo ye sankolow fɛnsɛ, ne bɛ a kɛnɛyeelen bɛɛ kun na.»
[13] Kɛlɛbolow Matigi ko: «Ne ye Sirus ɲɛnatɔmɔ k'a kɛ i kunmabɔbaa ye, ne na a ka siraw labɛn. A na ne ka dugu Jerusalɛm jɔ ko kura, ka ne ka mɔgɔ minɛlenw lasegin, ni kunmabɔ wari ni surɔ fɛnw tɛ.»
[14] Matigi ko: «Misira nafolo ni Etiopi nafolo ani Seba mɔgɔ jamanjanw na kɛ aw ta ye. O mɔgɔw sirilen nɛgɛ jɔlɔkɔw la, u na tugu aw nɔ fɛ. U na u biri aw kɔrɔ ka u ka tɔɔrɔ kow fɔ aw ye ko: ‹Ala tɛ sɔrɔ yɔrɔ wɛrɛ si la ni aw ka yɔrɔ tɛ. Ala wɛrɛ si tɛ ale kɔ.›
[15] Israɛl ka Ala, e min bɛ kisili kɛ, tiɲɛ la, i ye Ala dogolen ye.
[16] Boli dilabaaw bɛɛ maloyara ka u kun suuli, u bɛɛ maloyalen kɔseginna ɲɔgɔn fɛ.
[17] Matigi ye Israɛl kisi ni kisili banbali ye. Aw tɛna maloya, aw tɛna kunna siri badaa badaa.»
[18] Matigi ye sankolow da, ale ye dugukolo dilabaa Ala ye. A ye dugukolo dila ka a sabati. A ma a da ka a lankolon bila, nka a ye a da walisa mɔgɔw ka sigi a kan. Nka sisan a ko: «Ne ye Matigi ye, Ala wɛrɛ si tɛ yen.
[19] Ne ma kuma dogo la, wala dugukolo yɔrɔ dibima la. Ne m'a fɔ Yakuba bɔnsɔn ye ko: ‹Aw bɛ ne ɲini gwansan.› Ne ye Matigi ye, ne bɛ ko tilennen fɔ, ne bɛ tiɲɛ fɔ.
[20] «Aw ka ɲɔgɔn lajɛ ka na. Aw siya tɔ tolenw ka gɛrɛ yan na. Mɔgɔ minw bɛ u ka jiri boliw ta ka u biri o bato fɛn fufafuw kɔrɔ, k'a sɔrɔ u tɛ se ka mɔgɔ kisi, hakili tɛ olu fɛ.
[21] «Ayiwa, a' ye aw ta fɔ ka aw fɛtaw jira, aw ka ɲɔgɔn ye nin kow la. Ko minw kɛra bi, jɔn ye o kow fɔ kabini tuma jan? Jɔn ye o fɛnw bɛɛ lakali sani u ka se? Aw m'a dɔn ko ne de ye o kɛ wa? Ne ye Matigi ye. Ala wɛrɛ si tɛ ne kɔ, Ala tilennen ani Kisibaa wɛrɛ si tɛ ne kɔ.
[22] Dugukolo kan mɔgɔw bɛɛ, a' ye aw yɛlɛma ka na ne ma, walisa aw ka kisi, k'a masɔrɔ ne ye Ala ye, dɔ wɛrɛ si tɛ yen.»
[23] Ne tun ye ne kali ne yɛrɛ la, kuma jɛlen bɔra ne yɛrɛ da la, o tɛ se ka yɛlɛma ko: «Kunberew bɛɛ na kuru ne ɲɛ kɔrɔ, nɛnkun bɛɛ na u jo ne la.
[24] U n'a fɔ ne ko la ko: ‹tilennenya ni barika bɛ Matigi kelenpe fɛ.› Minw bɛɛ diminna ne kɔrɔ, olu maloyalen bɛ na ne ma.
[25] Israɛl bɔnsɔn bɛɛ na tilennenya sɔrɔ Matigi fɛ. U na ɲagaliba sɔrɔ.»