[1] Mɔgɔ minw bɛ taa dɛmɛni ɲini Misira ka u jigi da yɛlɛnkan sow ni wotoro caman ni sotigiw barika kan, nka u tɛ u jigi da Israɛl ka Senuma kan ka Matigi ɲini, bɔnɛ bɛ olu ye.
[2] Ale fana ye hakilitigi ye. A bɛ tɔɔrɔw ci, a tɛ a ka kuma yɛlɛma fewu. A na wuli mɔgɔ juguw ka sow kama ka kojugukɛlaw ka dɛmɛni tiɲɛn.
[3] Misirakaw ye Hadamadenw dama ye, u tɛ Ala ye. U ka yɛlɛnkan sow ye farisogo dama ye, niw tɛ. Ni Matigi ye a bolo yankan, min bɛ dɛmɛni kɛ, o na bi, min bɛ dɛmɛ, o fana na bi. U fila bɛɛ na halaki ɲɔgɔn fɛ.
[4] Matigi y'a fɔ ne ye ko: «Ni waraba wala waraba kamalen bɛ gɔrɔntɔ a ka fɛn minɛlen kun na, hali ni saga gɛnnaw caman lajɛra a kama, a tɛna siran u pɛrɛnkan ɲɛ. A ja tɛna tigɛ u mankan caman kosɔn cogo min na, o cogo la Kɛlɛbolow Matigi na jigin ka kɛlɛ kɛ Sion kulu ni a tintin kan.
[5] Kɔnɔ bɛ a kamanfuraw sɛɛnɛ a ɲaa kun na cogo min na, Kɛlɛbolow Matigi na Jerusalɛm mara ten. A na a mara k'a kisi k'a kaman biri a kan k'a tila.»
[6] Ayiwa aw Israɛl bɔnsɔnw, aw murutira min ma kosɛbɛ, aw ka kɔsegin o ma.
[7] Aw yɛrɛ bolo ye warijɛ ni sanu boli minw dila ka aw jalaki, aw bɛɛ kelen-kelen na olu fili don dɔ la.
[8] Asirikaw na faga npan fɛ k'a sɔrɔ mɔgɔ nɔ tɛ. U na kɛ npan ka dumuni ye, nka Hadamaden ka npan tɛ. U na boli npan ɲɛ, u ka kɛlɛkɛ kamalenw na minɛ ka kɛ jɔnw ye.
[9] U la kɛlɛkɛ cɛ ja gɛlɛnba na boli siranba kosɔn. U ka kɛlɛ kuntigiw na boli ka darapo to yen. Matigi min ka tasuma bɛ Sion ni a ka gwantugu tasumaba bɛ Jerusalɛm, o ko ten.