[1] Bɔnɛ bɛ Samari ye, min koolilen bɛ i ko masafugula, a sigilen bɛ jɛkɛnɛ hinɛma cɛmancɛ la. Ale ye Efrayim dɔlɔtɔw ka yɛrɛbonya sababu ye. A ka masiri fɛn tɛ dɔ wɛrɛ ye, feere fɔsɔnfɔsɔnta kɔ a ka dɔlɔtɔw kun na.
[2] A filɛ, Matigi ye mɔgɔ barikama setigi dɔ lawuli, o bɔlen bɛ fiɲɛba la sanbɛlɛ tiɲɛnnikɛla fɛ ani sanjiba min bɛ kɔw kari. A na a bi duguma k'a tiɲɛn.
[3] Efrayim dɔlɔtɔw ka kuncɛbaya masafugula min bɛ yen, o na cɔngɔ mɔgɔw sen kɔrɔ.
[4] A filɛ, a ka masiri fɛn fɔsɔnfɔsɔnta min bɛ jɛkɛnɛ hinɛma cɛmancɛ la, o na cɔngɔ mɔgɔw sen kɔrɔ, o na kɛ i ko toroden min mɔna tɔw bɛɛ ɲɛ, sani samiyɛ ka se. Mɔgɔ b'a ye k'a kari ni a bolo ye k'a dun k'a ban.
[5] O don na Kɛlɛbolow Matigi na kɛ masafugula nɔɔrɔma ni masiri fɛn manamanata ye a ka mɔgɔ tɔ tolenw ye.
[6] A na tilennenya ni di kiritigɛlaw ma ka kiri tigɛ ni tilennenya ye. Mɔgɔ minw bɛ u juguw kunbɛn dugu dondaw la, a na kɛ olu barika ye.
[7] Juda jamana kɔnɔ mɔgɔw fana ɲɛnaminina diwɛn fɛ, minni fɛn farinmaw ye u lafili. Sarakalasebaaw ni kiraw bɛɛ bɛ talontalon dɔlɔ fɛ. U fara dɔlɔ ni minni fɛn farinmaw la. U bɛ fili kiraya ni kiri tigɛ cogo la.
[8] U ka dumunikɛ tabaliw bɛɛ fara fɔɔnɔ ni u ka nɔgɔlenya kow la. Hali yɔrɔ jɛlen si tɛ tabali kan tun.
[9] U y'a fɔ Esayi ko la ko: «Kira bɛ jɔn kalan hakilitigiya la ka faamuli di jɔni ma? Den minw da bɔra sin na wa, minw tɛ sin min tun wa?
[10] Fo a bɛ sɛbɛnden bila ka sɛbɛnden bila, ka kuma, ka kuma, ka kalan di, ka kalan di. Dɔɔnin bɛ kɛ yan, dɔɔnin bɛ kɛ yen.»
[11] Ayiwa, Matigi na kuma o mɔgɔw fɛ dunanw da la ani kan wɛrɛ la.
[12] A y'a fɔ u ye ko: «Yan ye lafiya yɔrɔ ye, aw k'a to mɔgɔ tɔɔrɔlenw ka u lafiya. Aw ka lafiya waati filɛ nin ye,» nka u ma sɔn ka lamɛnni kɛ.
[13] Matigi ka kuma tɛ dɔ wɛrɛ ye u ɲɛ na fɔ sɛbɛnden bilalen sɛbɛnden kan, kuma dalen kuma kan, kalan farala kalan kan, dɔɔnin bɛ kɛ yan, dɔɔnin bɛ kɛ yen. A laban na u na bi u kɔ kan ka u kɔ kari, jan na u sen minɛ, u na cɛ.
[14] O de kosɔn, aw nparabɔla minw sigilen bɛ Jerusalɛm, aw ka Matigi ka kuma lamɛn.
[15] Aw b'a fɔ ko, aw ni siya ye layidu ta ɲɔgɔn ye, ko aw ni lahara dugu ye layidu ta ɲɔgɔn ye. Aw ko, ni fiɲɛbana tiɲɛnnikɛla bɛ tɛmɛn tuma min na, a tɛna se aw ma, katuguni aw ye aw jigi da nkalonw kan ka aw dogo nkalon kɔrɔ.
[16] O de kosɔn Matigi Ala kumana ko: «A filɛ, ne ye kabakurun kɔrɔbɔlen kɛ jusigilan ye Sion, seleke la kabakurun, a sɔngɔ ka gɛlɛn. Jusigilan barikama don. Ni mɔgɔ min bɛ i jigi da o kan, o tɛna lamaga ka bɔ yen.
[17] Ne na tiɲɛ kɛ sumanikɛ juru ye, ka tilennenya kɛ kogo latilen juru ye. Aw jigi dara nkalon min kan, sanbɛlɛba na o ta k'a bɔ yen, jibaw na aw dogo yɔrɔ tunun.
[18] O tuma la, aw ni saya ye layidu min ta ɲɔgɔn ye, o na tiɲɛn. Aw ni lahara dugu ye layidu min ta, o fana na tiɲɛn. Ni tiɲɛnnikɛ fiɲɛbana bɛ tɛmɛn tuma min na, o na aw foroki a sen kɔrɔ.
[19] Ni a bɛ tɛmɛn tuma o tuma, sɔgɔma o sɔgɔma, su fara tile kan, a na aw minɛ. Ka o kibaru dɔrɔn mɛn, o na kɛ siran koba ye.
[20] Dali dlan ka surun, hali mɔgɔ tɛ se ka a yɛrɛ lafoni o kan, birifini bolo ka surun, hali a tɛ se ka mɔgɔ datugu.
[21] Matigi na wuli i ko min kɛra Perazim kulu kan, a na a ka dimiya jira i ko min kɛra Gabaon jɛkɛnɛ la, walisa a tun ma deli ka baara min kɛ, a ka o kɛ, a tun ma deli ka kɛwale min kɛ, a ka o kɛ.»
[22] Ayiwa sisan, aw kana nparabɔli kɛ walisa aw sirilanw kana gɛlɛya, k'a masɔrɔ ne ye Matigi, Kɛlɛbolowtigi Ala kan mɛn ko dugukolo halakili ko latigɛra.
[23] Aw ka aw tulo majɔ ka ne kan lamɛn. Aw ka lamɛnni kɛ ka ne ka kuma faamu.
[24] Mɔgɔ min bɛ sɛnɛ kɛ, a bɛ to ka dugukolo buruku tuma bɛɛ wa? A bɛ to ka bɔgɔ kuruw ci tuma bɛɛ wa?
[25] Ni a ye dugukolo dakɛɲɛ tuma min na, a tɛ malo seri ka tiga dan wa? A tɛ fini seri a dan na ka ɲɔ fana dan a dan na ka shɔ dan ɲɔ jukɔrɔ wa?
[26] Ala de ye a kalan o kɛ cogo ni o kɛ ko la.
[27] Kɔɔri tɛ gosi ni bere ye, tiga tɛ gosi ni wotoro sen ye, nka u bɛ ɲɔ gosi ni bere ye ka shɔ gosi ni busan ye.
[28] U bɛ alikama gosi, nka u tɛ to k'a gosi tuma bɛɛ. U bɛ wotoro sen tɛmɛn a kan, sow bɛ a cɔngɔ u sen kɔrɔ, nka u tɛ a si.
[29] O bɛɛ bɛ bɔ Kɛlɛbolow Matigi la, a ka ko latigɛlenw ye kabako ye, a hakili ka bon.