[1] Masakɛ Ezekiasi ye o kuma mɛn minkɛ, a ye a ka finiw fara ka cafu fini don a la ka taa Matigi batosoba kɔnɔ.
[2] O kɔ, a ye masaya so kɔlɔsibaa Eliakim ni sɛbɛnnikɛla Sebna ani sarakalasebaa cɛkɔrɔbaw ci ka taa Amoz denkɛ, kira Esayi ka so. Cafu fini tun bɛ u kan na.
[3] U y'a fɔ kira ye ko: «Ezekiasi ko, bi ye tɔɔrɔ ni kɔrɔfɔli ni mafiɲɛyali don ye, k'a masɔrɔ denw sera bange ye, nka barika tɛ yen ka u bange.
[4] Asiri masakɛ ye a ka kɛlɛ kuntigi ci ka na Ala ɲɛnama neni. E, ni Matigi i ka Ala tun bɛ se ka o nenili kumaw mɛn ka u ɲankata o kosɔn. Ayiwa, i ka Matigi deli a ka mɔgɔ tɔ tolenw ye.»
[5] O tuma la masakɛ Ezekiasi ka baaradenw taara Esayi yɔrɔ.
[6] O y'a fɔ u ye ko: «Aw na min fɔ aw kuntigi ye, o filɛ nin ye, ko: ‹Matigi ko i ja kana tigɛ i ka kuma mɛnnenw kosɔn, Asiri masakɛ ka baaradenw ye ne dɔgɔyali kuma minw fɔ kɔni.
[7] A filɛ, ne na dusu sifa dɔ don a kɔnɔ, a na kibaru dɔ mɛn. A na kɔsegin a ka jamana kɔnɔ, ne na a faga ni npan ye yen.›»
[8] Asirikaw ka kɛlɛ kuntigi Rabsake y'a mɛn ko a makɛ bɔra Lakis ka taa daga Libina da la, o de kosɔn a taara a sɛgɛrɛ yen.
[9] O tuma la masakɛ Sankerib ye ci wɛrɛ sɔrɔ ko Etiopi masakɛ Tirhaka bɛ na daga a da la ka a kɛlɛ. O de kosɔn Sankerib ye ci bila Ezekiasi ma tun, ko u k'a fɔ Juda ka masakɛ Ezekiasi ye ko:
[10] «I jigi dalen bɛ i ka Ala min kan, i kana a to o ka i lafili ko Asiri masakɛ tɛna se ka Jerusalɛm minɛ.
[11] Asiri masakɛ ye se sɔrɔli minw kɛ jamana kɔnɔ, i ye olu mɛn. O jamanaw bɛɛ halakira. E dun bɛ se ka tila cogo di?
[12] Ne bɛnbaw ye siya minw halaki, ni olu sigilen tun bɛ Gozan ni Karan ni Rezɛf ani Edɛn, bɔnsɔn minw sigilen tun bɛ Telasar, olu la jumɛn ka bato fɛnw sera ka u tila?
[13] Hamat masakɛ ni Arpad masakɛ ni Sefarvaim masakɛ ni Hena ani Iva duguw ka masakɛw bɛ min?»
[14] Masakɛ Ezekiasi ye sɛbɛn minɛ cidenw bolo k'a kalan. O kɔ, a donna Alabatosoba kɔnɔ ka o sɛbɛn yɛrɛkɛ Matigi ɲɛ kɔrɔ.
[15] O kɔ, a ye Matigi deli ko:
[16] «Kɛlɛbolow Matigi, Israɛl ka Ala, e min sigilen bɛ serubɛnw san fɛ, e kelenpe ye Ala ye. I ye dugukolo kan masayaw bɛɛ ka Ala ye. E de ye sankolo ni dugukolo da.
[17] Matigi, i ka i tulo majɔ ka lamɛnni kɛ. I ka i ɲɛ dayɛlɛ ka filɛli kɛ. Sankerib ye Ala ɲɛnama nenili kuma minw fɔ, i ka olu lamɛn.
[18] Matigi, a jɛlen don ko Asiri masakɛ ye siyaw halaki ka u ka jamanaw tiɲɛn,
[19] ka u ka bato fɛnw fili tasuma la, nka olu tun tɛ bato fɛn sɛbɛw ye. Hadamaden bolo baara nɔw tun don, jiri dɛsɛnenw ni kabakurunw dɛsɛnenw tun don, olu bɛɛ tiɲɛnna.
[20] Ayiwa sisan, Matigi an ka Ala, i ka an kisi Sankerib ma, walisa dugukolo kan masayaw bɛɛ k'a dɔn ko e kelenpe de ye Ala ye.»
[21] O tuma la Amoz denkɛ Esayi ye ci bila ka ta'a fɔ Ezekiasi ye ko: «Matigi, Israɛl bɔnsɔn ka Ala ko: ‹I ye delili min kɛ Asiri masakɛ Sankerib ko la, ne ye o mɛn.
[22] Matigi ye kuma min fɔ a kama, o filɛ nin ye, ko: «Sion bɛ i dɔgɔya, a bɛ yɛlɛ bɔ i la. Jerusalɛm bɛ a kun kɔmi i kama ka tugu i la.
[23] I ye jɔn neni k'a lagosi? I ye i kan bɔ jɔn kama? I ye i ɲɛ jugu bɔ ne yɛrɛ la, Israɛl ka Senuma kɔni.
[24] I ye Matigi dɔgɔyali kumaw don i ka jɔnw da la k'a fɔ ko i yɛlɛnna Liban kulu kan ni i ka wotoro dama dɔnbali ye. Ko i na sedere jiri janw ni sipere jiri ɲumanw bɛɛ tigɛ. Ko i na se o kulu kuncɛ ma fo ka taa se a jiritu cɛmancɛ la.
[25] Ko i ye ji dingɛw sen ka o ji min, ko i na Misira bajiw bɛɛ ja ni i sentɛgɛw ye.
[26] «Ayiwa Sankerib, i m'a dɔn ko ne ye nin kow labɛn wa? Kabini tuma jan, ne ye nin kow dafali latigɛ. Sisan ne bɛ ne ka kɛwalew kɛ. Ne y'a latigɛ ko i ma nin dugu barikamaw tiɲɛn ka kɛ tomon ye.
[27] U kɔnɔ mɔgɔw siranna, u barika banna, u maloyara. U kɛra i ko kungo kɔnɔ bin nugu ni ɲugu kɛnɛ. U bɛ i ko so kunna bin, u bɛ i ko alikama min jara sani a ka kisɛ don.
[28] «Ni i bɛ i sigi, ni i bɛ bɔ, ni i bɛ don, ni i diminna ne kɔrɔ, ne ɲɛ bɛ i la.
[29] I diminna ne kɔrɔ, i ka kuncɛbaya kumaw sera ne tulo ma, o de kosɔn ne na ne ka nunna nɛgɛ don i nun na ka ne ka karafe don i da la. I nana sira min fɛ, ne na i lasegin o fɛ.
[30] «Ayiwa Ezekiasi, taamashyɛn min b'a to i k'a dɔn ko ne ka kumaw na dafa, o filɛ nin ye. Aw na balo ni aw ka foro la suman manaw ye ɲinan. A san filanan fana na kɛ ten nka a san sabanan la, aw na danni kɛ ka suman tigɛ ka rezɛn sunw turu ka u mɔ dun.
[31] Mɔgɔ tɔ minw tora Juda bɔnsɔn ka masaya so kɔnɔ, olu na kɛ i ko jiri, u na dili don ka nugu ka den ko kura.
[32] Ɔwɔ, mɔgɔ ɲɛnama tɔ tolenw na sɔrɔ Jerusalɛm. Mɔgɔ kisilenw na sɔrɔ Sion kulu kan. Ayiwa, Kɛlɛbolow Matigi na a ka kanuyaba min jira, o filɛ o ye.» ›
[33] «Matigi ye min fɔ Asiri masakɛ ko la, o filɛ nin ye ko a tɛna don nin dugu kɔnɔ, a ka biɲɛ tɛna bon yan. A tɛna na nin dugu kama ni nɛgɛ bɛnnan ye, yɛlɛnyɛlɛnnanw si tɛna jɔ dugu la.
[34] O masakɛ nana sira min fɛ, a na kɔsegin o fɛ. A tɛna don nin dugu kɔnɔ, ne, Matigi ko ten.
[35] Ne na nin dugu mara walisa a ka kisi ne yɛrɛ ni ne ka jɔnkɛ Dawuda kosɔn.»
[36] O tuma la Matigi ka mɛlɛkɛ dɔ donna Asirikaw ka kɛlɛ daga la ka u la cɛ waa kɛmɛ ni waa bisegin ni duuru faga. O dugusajɛ sɔgɔma da fɛ, mɔgɔw kununnen, u ma foyi ye yen mɔgɔ suw kɔ.
[37] O tuma la Asiri masakɛ Sankerib y'a ka daga wuli ka sira minɛ ka kɔsegin ka taa Ninivɛ. A ma bɔ yen tun.
[38] Don dɔ la k'a birilen to a ka bato fɛn Nisrok ɲɛ kɔrɔ, a denkɛw Adramalɛk ni Sarezɛr y'a faga ni npan ye. O kɔ, olu bolila ka taa Ararat jamana la. A denkɛ Esar-Hadon sigira masaya la a nɔ na.