[1] Min natɔ don ka bɔ Edɔm masadugu la Bozra ni fini bilenman ye a la, o ye jɔn ye? Fini nɔɔrɔmaw bɛ a kan na, a kun kɔrɔtalen bɛ taama a ka sebaayaba la. Matigi ko: «O ye ne ye, ne nana tilennenya la, kisili se bɛ ne de ye.»
[2] Mun kɛra fo i ka finiw bilenna i ko mɔgɔ min bɛ forokili kɛ rezɛn ji bɔ yɔrɔ la?
[3] Ne kelenpe ye forokili kɛ rezɛn ji bɔ yɔrɔ la, hali nin mɔgɔw la kelen tun tɛ ne fɛ. Ne ye u foroki ne ka dimiya kosɔn, ne dusu bɔlenba ye u cɔngɔ ne sen kɔrɔ. U joliw seriserila ne ka finiw kan, ne ka finiw bɛɛ nɔrɔnkɔra.
[4] A tun bɛ ne dusu la ka ne mɔnɛbɔ bi, ne ka kunmabɔlenw kisi san sera.
[5] Ne ye filɛli kɛ, nka mɔgɔ si ma ne dɛmɛ, o ye ne kabakoya. Mɔgɔ si ma sɔrɔ k'a janto ne la. O tuma la ne yɛrɛ bolo ye ne tila, ne ka dimiya ye ne mara.
[6] Ne dusu bɔlen ye mɔgɔw foroki ne sen kɔrɔ. Ne diminnen ye u ɲɛnamini, ne ye u joli bɔn duguma.
[7] Ne na Matigi ka ɲumaya ko lakali, ka Ala tanu a ka ɲumaya kɛlenw ko la an ye, a ye ɲumaya minw bɛɛ kɛ Israɛl ka so ye, ka u minɛ ka kɛɲɛ ni a ka makari ni a ka ɲumayaba ye.
[8] A ko: «Ɔwɔ, ne ka mɔgɔw don, den minw tɛna kanntanya kɛ ne la.» A kɛra u Kisibaa ye.
[9] Ka u to u ka tɔɔrɔ kow la, a ma u dɛmɛbali to. A ɲɛ kɔrɔ mɛlɛkɛ ye u kisi. A yɛrɛ ye u kunmabɔ a ka kanuya ni a ka hinɛ kosɔn. A ye u kɔlɔsi ka u mara don tɛmɛnnenw na, a ma sɛgɛn.
[10] Nka u murutira ka a Ni Senu dusu kasi. A y'i yɛlɛma ka kɛ u jugu ye, a yɛrɛ ye u kɛlɛ.
[11] O tuma la a ka mɔgɔw hakili jiginna Musa ka waati tɛmɛnnen kɔrɔw la, ko: «Min ye u tigɛ Kɔgɔji Bilen na ka kɛ u kɔlɔsibaa ye, o bɛ min? Min ye Ni Senu bila u cɛma, o bɛ min?
[12] Ale yɛrɛ bolo nɔɔrɔma ye Musa kininbolo minɛ ka taa. Ale ye ji cɛ tila fila ye u ɲɛ, walisa a ka a tɔgɔ kɛ tɔgɔ banbali ye a yɛrɛ ye.
[13] Ale ye u ɲɛ minɛ ka ji dunbaw cɛ tigɛ i ko yɛlɛnkan so bɛ jɛkɛnɛ cɛ tigɛ cogo min na, u sen ma talon.
[14] Bagankulu bɛ jigin ka taa jɛkɛnɛ la cogo min na, Matigi Ni ye u ɲɛ minɛ o cogo la.» Ayiwa i ye i ka mɔgɔw ɲɛ minɛ walisa i ka i tɔgɔ kɛ tɔgɔ nɔɔrɔma ye i yɛrɛ ye.
[15] E Ala min bɛ sankolow kɔnɔ, ka i to i sigiyɔrɔ senuma nɔɔrɔma la, i ka nin filɛ. I ka kanuyaba ni i ka sebaayaba bɛ min? I ka ɲumaya ni i ka makari mabɔra an na.
[16] O bɛɛ n'a ta Matigi, e de ye an Fa ye, hali ni Ibrahima ma an dɔn, hali ni Israɛl ma jɔ an tigiya la, nka Matigi, e de ye an Fa ye. An ye o min tɔgɔ wele ko: «An Kunmabɔbaa» tuma bɛɛ.
[17] Matigi, mun kosɔn i b'a to an ka fili ka mabɔ i ka siraw la? Mun kosɔn i b'a to an dusukun ka gɛlɛya fo an tɛ siran i ɲɛ? I ka kɔsegin an ma an kanuya kosɔn, an minw ye i ka jɔnw ni i ka mɔgɔw ye.
[18] O ciyɛn jamana ma mɛn an bolo, i ka mɔgɔ senumaw kɔni. An juguw ye i batosoba senuma cɔngɔ u sen kɔrɔ.
[19] An ye siya fililen ye i fɛ kabini tuma jan, i ko mɔgɔ minw ma wele i tɔgɔ la. E, ni i tun bɛ sankolow fara ka jigin, kuluw tun na yɛrɛyɛrɛ i ɲɛ kɔrɔ.