[1] Masakɛ Ezekiasi ka masaya san tan ni naaninan la, Asiri masakɛ Sankerib taara daga Juda bɔnsɔn ka dugu barikamaw bɛɛ da la ka u minɛ.
[2] Asiri masakɛ ye Rabsake ni kɛlɛbolo barikama ci ka bɔ Lakis ka taa masakɛ Ezekiasi kama Jerusalɛm. Rabsake taara i jɔ san fɛ ji dingɛ bajalan da la, o bɛ fini jɛya foro sira da la.
[3] O tuma la, Hilkija denkɛ Eliakim, min tun bɛ masaya so kɔlɔsili la, a ni sɛbɛnnikɛla Sebna ni Asaf denkɛ tilew kibaru sɛbɛnnikɛla Joak taara Rabsake sɛgɛrɛ.
[4] Rabsake ye nin kuma fɔ u ye ko u k'a fɔ Ezekiasi ye, ko Asiri masakɛba ko: «I jigi bɛ mun kan?
[5] I ka kuma fɔlenw ye fuu ye, wajibi don mɔgɔ ka kɛlɛ kɛ ni hakilitigiya ni ja gɛlɛya ye. E dun jigi bɛ mun kan fo i murutira ne ma?
[6] A filɛ, i ye i jigi da bɔkala ɲɔɲɔlen min kan, Misira kɔni, ni mɔgɔ min sinsinna o la, a bɛ o tigi tɛgɛ sɔgɔ k'a jogin. Misira masakɛ Faraon bɛ ten a dannabaaw bɛɛ ta fan fɛ.
[7] «Ni i y'a fɔ ne ye ko aw jigi dalen bɛ Matigi, aw ka Ala kan, e Ezekiasi ye min ka batoli kɛ yɔrɔw ni a ka saraka bɔlanw bɔ yen k'a fɔ Juda ni Jerusalɛm ye ko u ka batoli kɛ nin saraka bɔlan ɲɛ kɔrɔ, o tɛ Matigi ye wa?
[8] Ayiwa, i ka layidu ta ne matigi Asiri masakɛ ye. Ne na yɛlɛnkan so waa fila di i ma ni i bɛ se ka mɔgɔw sɔrɔ ka yɛlɛn olu kan.
[9] Nka i bɛ se ka ne kuntigi ka kɛlɛ kuntigi bɛɛ la fitinin gɛn wa? I jigi bɛ Misira wotorow ni u ka sow kan.
[10] Matigi sago de m'a to ne wulila nin jamana minɛli ni a cili kama wa? Matigi de y'a fɔ ne ye ko ne ka taa nin jamana kama ka a halaki.»
[11] Eliakim ni Sebna ani Joak ye Rabsake jaabi ko: «I ka kuma i ka jɔnw fɛ Sirikaw ka kan na k'a masɔrɔ an bɛ o kan dɔn. I kana kuma an fɛ Yahutu kan na nin jama ɲɛ na kogo san fɛ.»
[12] Rabsake ye u jaabi ko: «Ne makɛ ye ci min di ne ma k'a fɔ, o ka kan ka fɔ aw ni aw makɛ dama ye wa? Yala aw m'a dɔn ko o fɔra kogo sanfɛ mɔgɔw fana ye walisa aw ni olu ka aw bo dun ka aw ɲɛgɛnɛ ji min wa?»
[13] O kɔ, Rabsake ye i madon u la ka pɛrɛn Yahutu kan na ko: «Masakɛba, Asiri masakɛ ye min fɔ, o filɛ nin ye.
[14] Ko aw kan'a to masakɛ Ezekiasi ka aw lafili, k'a masɔrɔ ale tɛ se ka aw tila ka bɔ ne bolo.
[15] Ezekiasi kana aw lafili ka aw jigi da Matigi kan, ko Matigi na aw tila, ko nin dugu tɛna ci Asiri masakɛ fɛ.
[16] Aw kana Ezekiasi lamɛn, k'a masɔrɔ Asiri masakɛ ko aw ka hɛrɛ ɲini a fɛ ka kolo a ye. Ni o kɛra, aw bɛɛ kelen-kelen na aw yɛrɛw ka rezɛn nakɔw mɔw dumu ka aw ka kɔlɔn ji min.
[17] O kɔ, ne na aw minɛ ka taa ni aw ye aw ka jamana bɔɲɔgɔnko la. Alikama ni diwɛn kura jamana don, dumuni fɛn ni rezɛn nakɔw jamana kɔni.
[18] Aw kan'a to Ezekiasi ka aw lafili ko Matigi na aw tila. Siya wɛrɛw ka bato fɛnw sera ka u tila ka bɔ Asiri masakɛ bolo wa?
[19] Hamat ni Arpad ka bato fɛnw bɛ min? Sefarvaim bato fɛnw bɛ min? Olu sera ka Samari tila ka bɔ ne bolo wa?
[20] O jamana wɛrɛw ka bato fɛnw la jumɛn sera ka u ka jamana tila ka bɔ ne bolo? Yala Matigi na se ka Jerusalɛm tila ka bɔ ne bolo wa?»
[21] Jama bɛɛ makunnen tora, u ma a jaabi hali kuma kelen na, k'a masɔrɔ masakɛ tun y'a fɔ ko: «Aw kana a jaabi.»
[22] Masaya so kɔlɔsibaa Hilkija denkɛ Eliakim ni sɛbɛnnikɛla Sebna ani tilew kibaru sɛbɛnnikɛla Joak kɔseginna ka taa masakɛ Ezekiasi yɔrɔ la ni u ka finiw faralen ye ka Rabsake ka kumaw bɛɛ lakali a ye.