[1] Siya minw tun bɛ taama dibi la, olu ye kɛnɛba ye. Minw sigilen tun bɛ jamana dibima kɔnɔ, kɛnɛ bɔra olu ye.
[2] Matigi, i bɛ nin siya kɛ siyaba ye. I ye ɲagali koba kɛ u ye. U bɛɛ bɛ ɲagali i ɲɛ kɔrɔ, i ko mɔgɔ bɛ ɲagali suman tigɛ tuma la cogo min na, i ko mɔgɔ bɛ ɲagalikan bɔ fɛn cɛlen tilatila tuma la.
[3] A zu girinman, ni bere min tun bɛ kɛ ka a gosi a kɔ la, ani faama ci kuntigi ka gwɛɲɛ, i ye olu kari, i ko i y'a kɛ Madiankaw tile la cogo min na.
[4] Kɛlɛkɛ cɛw senna sabaraw ni u kanna dulɔki minw ɲiginnen bɛ ni joli ye, olu bɛɛ na jeni tasuma mana fɛ ka u ban.
[5] K'a masɔrɔ den bangera an ye. Denkɛ dira an ma. Kuntigiya na da a kaman na. A tɔgɔ na da ko: «Kabako, ɲɛ Jirabaa, Sebaayatigi Ala, Badaa Fa, Hɛrɛ Kuntigi.»
[6] A ka kuntigiya na jiidi, a ka hɛrɛ tɛna ban Dawuda ka masasigilan kan ani a ka masaya la. Ala na a sabati ka a banba ni tiɲɛ ni tilennenya ye kabini sisan fo badaa. Ɔwɔ, Kɛlɛbolow Matigi na o kɛ ni a dusukun bɛɛ ye k'a dafa.
[7] Matigi ye kuma dɔ ci Yakuba ma, o bira Israɛl bɔnsɔn kan.
[8] Mɔgɔw bɛɛ na o dɔn, Efrayim ni Samarikaw kɔni, olu minw bɛ kuma ni kuncɛbaya ni yɛrɛ bonya ye.
[9] U ko: «Kogo bira, nka an na a jɔ ni kabakurun dɛsɛnenw ye. Toro sunw tigɛra, nka an na sedere sunw bila u nɔ na.»
[10] Matigi na u jugu Rezɛn lawuli u kama, a na u juguw bila u la.
[11] Sirikaw na kɛ u ɲɛ fɛ, Filisitikaw na kɛ u kɔ fɛ. U na Israɛl bɔnsɔn dun ni u da ye ka u ban. Halio, a ka dimiya tɛna ban, a bolo mɔɔnɔbɔlen na to u kama.
[12] O bɛɛ n'a ta, o mɔgɔw tɛna kɔsegin u gosibaa ma, u tɛna Kɛlɛbolow Matigi ɲini.
[13] O de y'a to Matigi na kunkolo ni kukala ni ntamaro sun ani buruku tigɛ ka bɔ Israɛl la tile kelen na.
[14] Kunkolo ye cɛkɔrɔbaw ni mɔgɔ tɔgɔbaw ye, kukala ye kira nkalontigɛlaw ye.
[15] Minw bɛ jama ɲɛ minɛ ani minw bɛ u bila sira jugu kan, olu na halaki.
[16] O de kosɔn u ka kamalenw ko tɛna diya Matigi ye fewu, a tɛna hinɛ u ka falatɔw ni u ka muso cɛ salenw na, sabu u bɛɛ ka jugu, u bɛɛ ye kojugukɛlaw ye. U bɛɛ da bɛ tilenbaliya kuma fɔ. Halio, a ka dimiya tɛna ban, a bolo mɔɔnɔbɔlen na to u kama.
[17] Ɔwɔ, juguya bɛ jenili kɛ i ko tasuma min bɛ kungo kɔnɔ nwɔniw ni nɔnfɔn nwɔniw jeni ka u ban, fo a sisi bɛ wuli i ko samasen.
[18] Kɛlɛbolow Matigi ka dimiya na jamana jeni, a kɔnɔ mɔgɔw na kɛ tasuma balo ye. Mɔgɔ si tɛna hinɛ a balima la.
[19] U bɛ binkanni kɛ u kinin yanfan fɛ, nka kɔngɔ bɛ u la. U bɛ dumuni kɛ numan yanfan fɛ, nka u tɛ fa. Mɔgɔ bɛɛ na u yɛrɛw bolo sogo dun.
[20] Manase bɛ Efrayim kɛlɛ, Efrayim bɛ Manase kɛlɛ. Olu fila bɛɛ bɛ jɛ ka Juda kɛlɛ. Halio, a ka dimiya tɛna ban, a bolo mɔɔnɔbɔlen na to u kama.