[1] Kiraya kuma min jirala Amoz denkɛ Esayi la Babilonɛ ko la.
[2] Aw ka darapo kɔrɔta kulu walawalama kan. Aw ka pɛrɛnkan bɔ ka u wele ka taamashyɛn kɛ ni aw bolo ye, walisa u ka don kuntigiw ka dondaw fɛ.
[3] Ne ye ci di ne yɛrɛ ka mɔgɔ ɲɛnatɔmɔlenw ma walisa u ka ne mɔnɛbɔ. Ne diminnen ye ne ka cɛ ja gɛlɛnw wele, olu ɲagalilen na ne nɔɔrɔ jira.
[4] Jamaba mankan bɛ bɔ kuluw kan i ko siyaba mankan. O ye siyaw ka masayaw lajɛlen ka golobagalaba mankan ye. Kɛlɛbolow Matigi bɛ a ka kɛlɛbolow lajɛ ɲɔgɔn kan kɛlɛ kama.
[5] U bɛ na ka bɔ jamana jan na, u bɛ na ka bɔ diɲɛ dan na. Matigi na o jamana bɛɛ halaki ni a dusubɔ minanw ye.
[6] Aw ka kasi ka kulokanba bɔ, katuguni Matigi ka don surunyara. A bɛ na i ko Sebaayabɛɛtigi ka halakilikɛla.
[7] O de kosɔn bolow bɛɛ barika na ban, mɔgɔw bɛɛ ja na tigɛ.
[8] Siran kobaw ni tɔɔrɔw ani bɔnɛ na u sɔrɔ. U na kuru i ko muso tintɔ. U sirantɔ na ɲɔgɔn filɛ, u ɲɛdaw na bilen i ko tasuma.
[9] Ɔwɔ, Matigi ka don bɛ na, don jugu kɔni, dimiya ni dusubɔ don. A na dugukolo kɛ i ko kungokolon, ka jurumukɛlaw halaki ka u ban.
[10] K'a masɔrɔ sankolola dolow tɛna manamana tun, tile na dibi a bɔ waati la, kalo tɛna jɛ tun.
[11] Ne na diɲɛ sara u ka juguya kosɔn, ka mɔgɔ juguw sara u ka tilenbaliya kosɔn. Ne na kuncɛbaw ka kuncɛbaya ban, ka mɔgɔ tere jugu farinmaw ka jamaleɲa mada.
[12] Ne n'a to sanu ɲuman sɔrɔli ka nɔgɔya ka tɛmɛn cɛ kelen sɔrɔli kan. Hadamaden sɔrɔli na gɛlɛya ka tɛmɛn Ofir sanu yɛrɛwolo sɔrɔli kan.
[13] O de kosɔn ne na sankolo yɛrɛyɛrɛ. Kɛlɛbolow Matigi ka dimiya na dugukolo lamaga ka bɔ a yɔrɔ la, a ka dimiyaba wuli don na.
[14] O tuma la u na boli i ko mankalan nɔgɛntɔ bɛ boli cogo min na, ka kɛ i ko mɔgɔ si tɛ bagankulu min lajɛ yɔrɔ kelen na. U bɛɛ kelen-kelen na taa u ka mɔgɔw yɔrɔ la, u bɛɛ kelen-kelen na boli ka taa u faso la.
[15] Ni minw sɔrɔla, olu na sɔgɔ, minw minɛna, olu na faga ni npan ye.
[16] U ka deɲɛninw na saba duguma ka yɛrɛkɛ u ɲɛ na, u ka so kɔnɔ fɛnw na cɛ. Cɛ wɛrɛw na u musow diyagoya.
[17] A filɛ, ne na Medikaw bila u la. Olu tɛna u ka warijɛw jate, olu mago tɛna kɛ u ka sanu la.
[18] U na kamalenw faga ni u ka bɔnnikɛ kalaw ye. U tɛna hinɛ denw na, u ɲɛw tɛna makari denmisɛnw na.
[19] Babilonɛ min bɛ i ko kɔnɔnkisɛ sɔngɔ gɛlɛn ani masayaw bɛɛ nɔɔrɔ ani Kaldekaw ka yɛrɛ bonya sababu, o na halaki i ko Sodɔmɛ ni Gomɔrɛ halakira Ala fɛ cogo min na.
[20] Mɔgɔ si tɛna sigi a kɔnɔ tun, a lankolon na san caman kɛ. Arabu si tɛna a ka finiso jɔ yen tun, saga gɛnnaw tɛna u ka sagaw lafiya yen tun.
[21] Nka kungo sogow na kɛ yen, ginginw na u ka so kɔnɔnaw bɛɛ fa. Kɔnɔsogontiw na a kɛ u ka yɔrɔ ye, kungo baw na panpan yen.
[22] Surukuw na kasi u ka masaya sow kɔnɔ, kungo wuluw na kasi u ka so ɲumanw kɔnɔ. A laban waati surunyara, a ka waati tɔ man jan tun.