[1] O waati la Babilonɛ masakɛ Merodak-Baladan ye sɛbɛnw ni bonyali wari bila ka taa di Ezekiasi ma, k'a masɔrɔ a y'a mɛn ko Ezekiasi tun man kɛnɛ, ko a kɛnɛyara. Merodak-Baladan fa tun ye Baladan ye.
[2] O cidenw nali diyara Ezekiasi ye. Ezekiasi ye masaya so ni a nafolo mara yɔrɔw jira u la, a warijɛ fɛnw ni sanu fɛnw ni suma diyalanw ni tulu yɛrɛwolo ni a ka kɛlɛkɛ minan minw tun bɛ o nafolo mara yɔrɔw la, a ye olu bɛɛ jira u la. Fɛn si ma to Ezekiasi ka masaya so ni a ka mara yɔrɔ si la ni a ma o jira u la.
[3] O tuma la kira Esayi taara masakɛ Ezekiasi sɛgɛrɛ k'a ɲininka ko: «O cɛw ye mun fɔ i ye? U bɔra jamana jumɛn na ka na bɔ i ye?» Ezekiasi y'a jaabi ko: «U bɔra jamana jan na ka na ne sɛgɛrɛ, u bɔra fo Babilonɛ.»
[4] Esayi ko: «I ye mun jira u la i ka masaya so kɔnɔ?» Ezekiasi ko: «Fɛn o fɛn bɛ ne ka masaya so kɔnɔ, u ye o bɛɛ ye. Fɛn si ma to ne ka masaya so kɔnɔ, ne ma min jira u la.»
[5] O tuma la Esayi y'a fɔ Ezekiasi ye ko: «I ka Kɛlɛbolow Matigi ka kuma lamɛn sa.
[6] A tɛ mɛn tun, fɛn o fɛn bɛ i ka masaya so kɔnɔ, i bɛnbaw ye fɛn minw bila u ka nafolo mara yɔrɔw la fo ka na se bi ma, olu na cɛ ka taa Babilonɛ. Fɛn si tɛna to yen. Matigi ko ten.
[7] I na den minw bange, i yɛrɛ joli kɔni, olu dɔw na cɛ ka taa jɔnya la ka kɛ Babilonɛ masakɛ ka masaya so kɔnɔ baarakɛlaw ye.»
[8] Ezekiasi ye Esayi jaabi ko: «I ye Matigi ka kuma min fɔ ne ye, o ka ɲi.» A ko fana: «Hɛrɛ ni lafiya kɔni na sɔrɔ ne tilew la.»