[1] Jamana jan mɔgɔw, aw ka ne lamɛn, siya minw yɔrɔ ka jan, a' ye aw tulo majɔ. Matigi ye ne wele kabini ne bange tuma, a ye ne tɔgɔ wele kabini ne ba ye ne bange.
[2] A ye ne da diya i ko npan da duman, k'a bolo biri ne kun na. A ye ne kɛ biɲɛkisɛ nun bɔlen ye ka ne dogo a ka ton kɔnɔ.
[3] A y'a fɔ ne ye ko: «I ye ne ka baaraden Israɛl ye, ne na tanuli sɔrɔ i kosɔn.»
[4] Ne ko: «Ne ye baara kɛ fuu, ka ne barika ban gwansan k'a sɔrɔ nafa t'a la. Nka ne ka tilennenya bɛ Matigi bolo, ne ka baraji bɛ ne ka Ala bolo.»
[5] Sisan Matigi ko ale ye ne dila sani ne ka bange, ka kɛ a ka jɔn ye, walisa ne ka Yakuba lasegin a ma ka Israɛl bɔnsɔn lajɛ a kɔrɔ, sabu ne ye bonya sɔrɔ Matigi ɲɛ kɔrɔ, ne ka Ala ye ne barika ye.
[6] A ko: «Ka i kɛ ne ka jɔn ye, ka taa Yakuba bɔnsɔn lawuli ko kura, ka na ni Israɛl tɔ tolenw ye, o dama t'a bɔ. Nka ne na i sigi ka kɛ siyaw ka kɛnɛ ye, walisa ne ka kisili ka se fo dugukolo dan na.»
[7] Mɔgɔw ye min mafiɲɛya, o min ko tun man di siyaw ye fewu, kuntigiw ka jɔnkɛ kɔni, Matigi, Israɛl Kunmabɔbaa ni a ka Senuma y'a fɔ o ye, ko: «Masakɛw na i ye ka wuli ka i jɔ, kuntigiw na u biri i kɔrɔ Matigi kosɔn, o min ye kantigi ye, Israɛl ka Senuma kɔni, o min ye i ɲɛnatɔmɔ.»
[8] Matigi ko: «Ne ye i jaabi ne diyaɲe waati la, ne ye i dɛmɛ kisili don na. Ne na i sigi ka i kɛ layidu sorona donna ye ne ni mɔgɔw cɛ, walisa i ka jamana lawuli ko kura ka ciyɛn lankolonw tilatila aw cɛ tun,
[9] k'a fɔ kasola mɔgɔw ye ko: ‹A' ye bɔ.› K'a fɔ dibila mɔgɔw ye ko: ‹Aw ka bɔ kɛnɛkan.› U na dumuni kɛ siraw da la, ani kulu walawalamaw kan i ko baganw.
[10] Kɔngɔ tɛna u minɛ tun, minnɔgɔ tɛna u sɔrɔ. Funteni tɛna u jeni, tile funteni tɛna digi u la. K'a masɔrɔ min hinɛna u la ka u ta, o na u ɲɛ minɛ ka taa ni u ye ji boyi da la.
[11] Ne na ne ka kulu kuncɛw bɛɛ kɛ sira ɲumanw ye, ne ka siraw bɛɛ na dila.
[12] Ne ka mɔgɔw natɔ filɛ ka bɔ yɔrɔ jan na, u natɔ filɛ ka bɔ saheli ni tilebi fɛ, dɔw natɔ filɛ ka bɔ Sinim jamana la.»
[13] Sankolow, aw ka dɔnkili da. Dugukolo, i ka ɲagali. Kuluw, aw ka dɔnkilikan bɔ. Katuguni Matigi ye a ka mɔgɔw dusu saalo, a na hinɛ a ka mɔgɔ degunnenw na.
[14] Sion y'a fɔ ko: «Matigi ye ne janfa, Ala ɲinɛna ne kɔ.»
[15] Den sinminna, ba bɛ se ka ɲinɛ a kɔ wa? A tɛna hinɛ a woloden na wa? Hali ni a ɲinɛna a kɔ, ne kɔni tɛna ɲinɛ i kɔ.
[16] Jerusalɛm, ne ye i tɔgɔ ɲɛgɛn ne tɛgɛ kɔnɔ, i lamini kogow ko tɛna bɔ ne kɔnɔ tuma si.
[17] I denkɛw bɛ boli ka na, k'a sɔrɔ i halakibaaw ni i tiɲɛnbaaw bɛ u mabɔ i la.
[18] I ka i ɲɛ jɔ i yɛrɛ lamini na ka u filɛ, u bɛɛ ye ɲɔgɔn lajɛ, u bɛ na i yɔrɔ la. Ka ne ɲɛnama to, u na kɛ masiri ye. U na kɛ i masiri ye i ko kɔɲɔmuso b'a masiri cogo min na. Matigi ko ten.
[19] Ɔwɔ, i ka dugu minw cira, ni i ka yɔrɔ minw lankoloɲara, ani i ka jamana tiɲɛnnen, o bɛ na dɔgɔya i ka mɔgɔw ma sisan. Minw tun bɛ i tiɲɛn, olu bolila ka mabɔ i la.
[20] I na den minw sɔrɔ i bɔnɛlen kɔ, olu n'a fɔ i ye ko: «Nin yɔrɔw ka dɔgɔ an na, i ka yɔrɔba di an ma walisa an ka an sigi yen.»
[21] O tuma la i na a fɔ i kɔnɔ, ko jɔni ye ninw bange i ye, katuguni i bɔnɛna i denw na, i denntan bilalen gɛnna ka taa jamana wɛrɛ la. Ko jɔni ye ninw lamɔ? Ko i tora i kelen na, ninw tun bɛ min?
[22] Matigi Ala ko: «Ne na ne bolo kɔrɔta siyaw fan fɛ, ka ne ka darapo to mɔgɔw cɛma. O tuma la u bɛ na ni i denkɛw ye u bolo, ka i denmusow ta u kamankun na.
[23] Masakɛw na kɛ i denw kalanfaw ye, masakɛw musow na kɛ i denw balobaaw ye. U na u biri i kɔrɔ ka u ɲɛda biri duguma, u na i senna buguri lanɔn. I n'a dɔn ko ne ye Matigi de ye, minw bɛ u jigi da ne kan, olu tɛna maloya.
[24] Kɛlɛkɛ cɛ barikama ka fɛn cɛlen bɛ se ka minɛ a la wa? Mɔgɔ minw minɛna tiɲɛ kan, olu bɛ se ka hɔrɔnya wa?»
[25] Matigi ko: «Ɔwɔ, mɔgɔ barikama ka jɔnkɛ na minɛ a la. Mɔgɔ farinma ka fɛn cɛlenw na bɔsi a la. Ne na se sɔrɔ i juguw kan, ne na i denw hɔrɔnya.
[26] Ne na i tɔɔrɔbaaw farisogo kɛ u yɛrɛw ka dumuni ye. U na u yɛrɛw joli min i ko diwɛn kɛnɛ. Dafɛnw bɛɛ n'a dɔn ko ne, Matigi, ne ye i Kisibaa ni i Kunmabɔbaa de ye, ani Yakuba ka Ala, Sebaayabɛɛtigi.»