[1] O waati la Ezekiasi banana fo a tun bɛ ɲini ka sa. Amoz denkɛ kira Esayi taara a yɔrɔ la k'a fɔ a ye ko: «Matigi ko i ka i ka so koɲɛw don i ka so mɔgɔw bolo, sabu i na sa, i tɛna kɛnɛya tun.»
[2] O tuma la Ezekiasi ye a ɲɛ sin kogo ma ka Matigi deli ko:
[3] «Matigi, i ka i hakili to a la ko ne taamana i ɲɛ kɔrɔ ni kantigiya ni dusukun jɛlen ye ka ko ɲuman kɛ i ɲɛ kɔrɔ.» O kɔ, Ezekiasi ye ɲɛji caman bɔ.
[4] O tuma la Matigi kumana Esayi fɛ ko:
[5] «I ka kɔsegin k'a fɔ Ezekiasi ye ko Matigi, i bɛnba Dawuda ka Ala ko: ‹Ne ye i ka delili lamɛn. Ne ye i ɲɛji fana ye. Ne na san tan ni duuru fara i si tile kan.
[6] Ne na i ni nin dugu tila ka bɔ Asiri masakɛ bolo ka nin dugu mara.›
[7] «Matigi na a ka kuma fɔlen dafa cogo min na, o taamashyɛn filɛ nin ye.
[8] Tile ja min jiginna Akaz ka yɛlɛnyɛlɛnnan kan, ne n'a to o ja ka segin kɔ fo ka se sentɛgɛ ɲɛ tan ma.» Ayiwa tile ja tun jiginna yɛlɛnyɛlɛnnan kan ni sentɛgɛ ɲɛ tan min ye, a seginna kɔ fɛ ka se o ma.
[9] Juda ka masakɛ Ezekiasi ka dɔnkili a ka bana ni a kɛnɛyali ko la.
[10] A ko: «Ka ne to hɛrɛ la, ne bɛ jigin ka taa lahara, ne si tile ma dafa.
[11] Ne ko, ne tɛna Matigi ye, ne tɛna Matigi ye mɔgɔ ɲɛnamaw ka dugukolo kan. Ne tɛna mɔgɔ ye diɲɛ mɔgɔw cɛma tun.
[12] Ne ni bɔra ne la, a taara yɔrɔ jan ka mabɔ ne la, i ko saga gɛnna ka finiso. Ne ni tigɛra i ko gese dala bɛ fini tigɛ ka bɔ kole la cogo min na, i tun bɛ ne ko ban tile kelen na.
[13] Ne makunnen tora fo sɔgɔma da fɛ, a ye ne kolow bɛɛ kari i ko waraba. I tun bɛ ne ko ban tile kelen na.
[14] Ne tun bɛ kasi i ko nanagalen pantɔ, ne tun bɛ kasi i ko ntubanni. Ne ɲɛ tun bɛ to ka filɛli kɛ san fɛ fo k'a dibi. Matigi, ne bɛ tɔɔrɔ la, i ka ne dɛmɛ.
[15] Ne na mun fɔ sa? Ala ye layidu ta ne ye, a ye o kɛ. Ne majiginnen na taama ne si bɛɛ la, ne degun kow kosɔn.
[16] «Matigi, i ka ɲumaya kosɔn mɔgɔw bɛ ɲɛnamaya, o kosɔn ne bɛ ɲɛnamaya bi. I bɛ ne kɛnɛya ka ne ɲɛnama to.
[17] Ne degun kow kɛra ne ka kisili ye. I ye ne kisi saya ma i ka kanuyaba kosɔn, k'a masɔrɔ i ye ne ka jurumuw bɛɛ fili i kɔ fɛ.
[18] Lahara dugu tɛ se ka i tanu, saya tɛ se ka i bonya. Minw jiginna kaburu kɔnɔ, olu tɛ i ka kantigiya jate.
[19] Mɔgɔ ɲɛnamaw dama de bɛ i bonya, i ko ne b'a kɛ cogo min na bi. Fa na a denw kalan i ka kantigiya ko la.
[20] Matigi ye ne kisi. An na an ka dɔnkiliw da ni nkɔniw ye, an si tilew bɛɛ la Matigi ka so kɔnɔ.»
[21] Ayiwa, Esayi tun y'a fɔ ko u ka toro mɔlen kun kelen ta ka a da sumuni kan, ko Ezekiasi na kɛnɛya.
[22] Ezekiasi tun y'a jaabi ko: «Taamashyɛn jumɛn na a jira ko ne na don Matigi batosoba kɔnɔ tun?»