[1] Kungokolonba ni dugukolo lankolon na ɲagali, jamana jalan na ɲagalikan bɔ ka feere bɔ i ko baga feere.
[2] Kungokolonba na feere kosɛbɛ. A na nisɔndiya dɔnkili da ka ɲagalikanba bɔ. A nɔɔrɔ na kɛ i ko Liban nɔɔrɔ. Karmɛl kulu ni Saron ka saramaya na di u ma. Mɔgɔ bɛɛ na Matigi nɔɔrɔ ni an ka Ala ka saramaya ye.
[3] Aw ka bolo barikantanw dɛmɛ, ka kunbere yɛrɛyɛrɛtɔw sinsin.
[4] Aw k'a fɔ dusukun yɛrɛyɛrɛtɔw ye ko: «A' ye aw ja gɛlɛya, aw kana siran. A' ye aw ka Ala filɛ, a bɛ na ni a ka sara fɛnw ye a bolo. Ala na u sara, Ala yɛrɛ bɛ na ka aw kisi.»
[5] O tuma la fiyentɔw na yeli kɛ, tulo gerenw na mɛnni kɛ.
[6] Sen kelenw na u panpan i ko minan. Bobo nɛnkun na ɲagali dɔnkili da, k'a masɔrɔ ji na woyo ka taa kungokolon kɔnɔ, kɔjiw na woyo ka taa jamana jalanw na.
[7] Cɛncɛn manamanatɔ na yɛlɛma ka kɛ dala ye, dugukolo jintan na kɛ ji boyi ye. Kungo wuluw sigiyɔrɔw na kɛ ba da la burugu ni bɔtu ye.
[8] Siraba na kɛ yen, o sira na wele ko «Senuya sira.» Mɔgɔ nɔgɔlen si tɛna tɛmɛn o sira fɛ, fɔ mɔgɔ saniyalenw dama. Mɔgɔ minw bɛ taama o sira fɛ, hali ni hakilintanw don, u tɛna fili.
[9] Waraba tɛna kɛ yen, kungo kɔnɔ wara jugu tɛna ye o sira kan, olu si tɛna sɔrɔ o sira kan, nka mɔgɔ kunmabɔlenw na o sira taama.
[10] Matigi ye minw kunmabɔ, olu kɔsegintɔ na ɲagali dɔnkili da ka taa Sion. Barika dali dɔnkili na kɛ u ka masafugula ye badaa. Ɲagali ni barika dali na kɛ u ciyɛn ye, ɲɛnasisi ni nwunankan na ban.