[1] Bato fɛn Bel kurula, Nebɔ bira. U bɛ u ka bato fɛnw da dantanfɛnw kɔ la. Bagan sɛgɛnnen minw bɛ o bato fɛnw ta, u ka girin olu ma.
[2] U bɛ kuru, u bɛ bi ɲɔgɔn fɛ. O bato fɛnw tɛ se ka u yɛrɛw kisi, u yɛrɛw bɛ taa jɔnya la.
[3] Yakuba ka so, aw ka ne lamɛn, Israɛl tɔ tolenw, aw ka ne lamɛn. Ne ye aw doni ta sani aw ka bange, ne ye aw doni ta kabini aw bange tuma.
[4] Ne na to cogo kelen na fo ka taa se aw kɔrɔya waati ma. Ne na aw doni ta fo ka taa aw kunsigi jɛ. Ne y'a kɛ ka ban, ne na to ka aw doni ta. Ne na aw ta ka aw kisi.
[5] Aw bɛ ne ni jɔn kɛɲɛ, ka ne ni jɔn suma ɲɔgɔn na? Jɔn ni ne ka kan, ni aw b'a fɔ ko ne ni o ye kelen ye?
[6] U bɛ sanu bɔ u ka bɔrɛ kɔnɔ ka warijɛ suma, ka o di numu ma ka o kɛ bato fɛn ye, ka u biri a kɔrɔ.
[7] U b'a doni u kamankun na ka taa o sigi a ka yɔrɔ la. O bato fɛn bɛ to yen, a tɛ se ka lamaga. Ni i ye a deli, a tɛ i jaabi. A tɛ se ka i kisi degun kow ma.
[8] Aw tilenbaliyakɛlaw, a' ye aw hakili to o kow bɛɛ la kosɛbɛ ka hakili sɔrɔ.
[9] A' ye aw hakili to waati tɛmɛnnenw na, ka miiri tile tɛmɛnnen kɔrɔw la, k'a masɔrɔ ne ye Ala ye, dɔ wɛrɛ tɛ yen. Ne ye Ala ye, ne bɔɲɔgɔnko tɛ yen.
[10] Ne bɛ fɛn daminɛ cogo ni a laban cogo fɔ sani a ka daminɛ. Fɛn minw ma kɛ fɔlɔ, ne ye olu ko fɔ kabini tuma jan. Ne ko: «Ne ka ko latigɛlen tɛ yɛlɛma, ne na ne sago bɛɛ dafa.»
[11] Ne ye bɔn panta wele ka bɔ kɔrɔn fɛ, ne ye ne sago kɛ mɔgɔ wele ka bɔ dugukolo dan na. Ne ye min fɔ, ne na o dafa. Ne ye min latigɛ, ne na o kɛ ka dafa.
[12] Mɔgɔ dusukun gɛlɛnw, ani minw yɔrɔ ka jan tilennenya la, aw ka ne lamɛn.
[13] Ne ka tilennenya bɛ tɛliya ka na, a yɔrɔ man jan. Ne ka kisili tɛna mɛn ni a ma se yan. Ne na kisili kɛ Sion kɔnɔ ka ne nɔɔrɔ da Israɛl bɔnsɔn kan.