[1] Aw ka sagaden ci ka bɔ Sela ka tɛmɛn kungokolon sira fɛ k'a di Sion ka kulu kuntigi ma.
[2] Moab musow na kɛ Arnon ba senna tigɛ yɔrɔw la, i n'a fɔ kɔnɔ yaalayaalatɔw, i n'a fɔ kɔnɔden minw gɛnna ka bɔ ɲaa la.
[3] I ka laadili di an ma, ka tilennenya kow kɛ. I ka i biri an kun na tile fɛ, i suma ka an da tugu i ko su dibi. I ka mɔgɔ gɛnnenw dogo, i kana mɔgɔ bolitɔw yɔrɔ jira.
[4] Moab ka mɔgɔ gɛnnenw ka sigi i fɛ. I ka kɛ u dogo yɔrɔ ye ka u tanga tiɲɛnnikɛla ma fo ka tɔɔrɔli dabila, fo ka tiɲɛnni ko ban. Jamana tiɲɛnbaaw na tunun.
[5] Masasigilan na sabati makari barika la. Kiritigɛla dɔ na sigi o kan ni tilennenya ye, Dawuda ka finiso kɔnɔ. A na kiri tigɛ ni tiɲɛ ye. A na tɛliya ka tilenneya kow kɛ.
[6] An ye Moab bɔnsɔn ka kuncɛbaya kow mɛn ani a ka jamaleɲa ni a ka yɛrɛ bonyali ni a ka malobaliya ani a ka wasobanciya kuma fufafuw.
[7] O de y'a to Moab na kasi a yɛrɛ ko la. Ɔwɔ, a na kasi ka nwunan a ka dumuni tiɲɛnni ni Kir-Haresɛt rezɛn tusuu jalenw kosɔn, u bɛɛ tiɲɛnna.
[8] Hesibɔn forow fɔsɔnfɔsɔnna, siyaw ka kuntigiw ye Sibma rezɛn sun bolow kari. O bolow tun nugura fo ka taa se Jaezɛr, ka taa sɛ fo kungokolon kɔnɔ. A bolow mɔɔnɔbɔra fo ba kɔ fɛ.
[9] O de y'a to ne ni Jaezɛr bɛ kasi ɲɔgɔn fɛ Sibma ka rezɛn nakɔ kosɔn. Ne bɛ aw ɲigin ni ɲɛji ye, Hesibɔn ni Eleale, k'a masɔrɔ kɛlɛ kulokan bɛ bɔ aw ka forow ni aw ka nakɔw kama.
[10] Ɲagalikan ni nisɔndiyakan banna ka bɔ aw ka forow ni aw ka rezɛn nakɔw kɔnɔ, dɔnkili dakan ni ɲagalikan si tɛ yen tun. Mɔgɔ si tɛna rezɛn foroki rezɛn ji bɔ yɔrɔ la tun, ne ye u ka ɲagali kow ban.
[11] O de y'a to ne dusu kasilen don Moab kosɔn i ko nkɔni fɔkan. Ne dusu bɛ nwunan ne kɔnɔ Kir-Herɛs kosɔn.
[12] Hali ni Moab ye a yɛrɛ sɛgɛn ka taa yɔrɔ kɔrɔtalen yaala, hali ni a donna yɔrɔ senuma kɔnɔ ka delili kɛ, a tɛna jaabi.
[13] Matigi ye kiraya kuma min fɔ Moab kama ka kɔrɔ, o don.
[14] Ayiwa sisan Matigi ko: «San saba ɲinan kɔ, Moab nɔɔrɔ na ban. Hali ni u dama tun ka ca, u la barikantanw kelen-kelen dɔrɔn na to.»