[1] Matigi, e de ye ne ka Ala ye. Ne na i tanu ka i tɔgɔ bonya, k'a masɔrɔ i ye i ka ko ɲumanbaw kɛ ka dafa. I tun ye ko minw latigɛ kabini tuma jan, i kɛra kantigi ye olu ko la.
[2] I ye dugu kɛ tomon ye, ka dugu barikama tiɲɛn k'a halaki, ka dunanw ka masaya so ci, a tɛna jɔ tun.
[3] O de kosɔn siya barikamaw na i tanu, siya tere jugu farinmaw ka duguw bɛ siran i ɲɛ.
[4] I kɛra barika dɛsɛlen dogo yɔrɔ ye, ka kɛ faantan dogo yɔrɔ ye a ka tɔɔrɔ waati la. I ye dogo yɔrɔ ye fiɲɛba ɲɛ, ka kɛ suma ye a kun na funteni ɲɛ, ni mɔgɔ juguw kɛra i ko fiɲɛba min bɛ kogow kari.
[5] I bɛ funteni ban ka bɔ jamana funtenima la cogo min na, i na siyaw ka kuncɛbaya ban ten. Funteni bɛ ban sankaba suma kɔrɔ cogo min na, i na mɔgɔ juguw ka se sɔrɔli dɔnkili ban u da la ten.
[6] Kɛlɛbolow Matigi bɛ dumuni tulumaba dila siyaw bɛɛ ye nin kulu kan, diwɛn ɲuman ɲuman b'a la. Kɛn caman bɛ o fɛn tulumaw la ani diwɛn ɲuman sensennen.
[7] Kunna biri fini min bɛ siyaw ɲɛda la ani birifini min birila siyaw bɛɛ kan, Matigi na o fara ka bɔ yen nin kulu kan.
[8] A na saya ban badaa. Matigi Ala na ɲɛji bɛɛ cɛ ka bɔ u ɲɛw la. A na a ka mɔgɔw mafiɲɛyali bɛɛ ban ka bɔ dugukolo yɔrɔw bɛɛ la, k'a masɔrɔ Matigi ko ten.
[9] U n'a fɔ o don na, ko: «An ka Ala filɛ, an jigi bɛ ale kan, a ye an kisi. An jigi bɛ Matigi kan, an ka ɲagali ka nisɔndiya a ka kisili ko la.»
[10] Matigi bolo na to nin kulu kɔrɔ, nka Moab na cɔngɔ i ko bin bɛ cɔngɔ nɔgɔ dingɛ kɔnɔ cogo min na.
[11] A na a bolo yankan o dingɛ kun na i ko nonnikɛla bɛ fogon ji kan cogo min na. Nka Matigi na a ka kuncɛbaya kow ban ka a bolo ka jan dalenw bɛɛ tiɲɛn.
[12] Matigi na a ka kɛlɛ kunbɛn so jamanjanw ci ka u bi ka u bɛɛ kɛ buguri ye.