[1] Ariɛl, Ariɛl, Dawuda sigilen tun bɛ dugu min kɔnɔ, bɔnɛ bɛ i ye. San o san, aw ka san yɛlɛma seliw kɛ u kɛ donw na.
[2] O kɔ, ne na Ariɛl bisi, kasi ni nwunan na kɛ i kɔnɔ, o dugu na kɛ ne fɛ i ko Ariɛl.
[3] Ne na daga sigi i da la ka i lamini ni kɛlɛbolow ye. Ne na yɛlɛnyɛlɛnnanw jɔ i kama.
[4] I na majigin. I na kulokan bɔ i ko i bɛ duguma. I ka kumaw na kɛ i ko u bɛ bɔ buguri la. I kan na bɔ dugu rɔ i ko bisigimafɛn kan. I kumakan na yɛlɛn ka bɔ buguri la i ko dajukɔrɔ kuma.
[5] I juguw jamaba na kɛ i ko fɔlɔkɔ. I tɔɔrɔbaaw na kɛ i ko nwɛɲɛ min bɛ taa fiɲɛ fɛ. O ko na kɛ tɛliya la, ɲɛkɔmi ko kelen na.
[6] Kɛlɛbolow Matigi bɛ na ni sanpɛrɛn ni dugukolo yɛrɛyɛrɛ ni mankanba ni fiɲɛba ni fununfunun ani tasuma tiɲɛnnikɛla ye.
[7] Siya dama dɔnbali min bɛ na Ariɛl kama ka a kɛlɛ ka a kɛlɛ kunbɛn sow degun, olu bɛɛ na kɛ i ko sugo ni su fɛ yeli fɛn.
[8] A na kɛ i ko kɔngɔtɔ bɛ sugo ko a bɛ dumuni kɛ, nka ni a wulila, a b'a sɔrɔ a kɔnɔbara lankolon don. A na kɛ i ko minnɔgɔtɔ bɛ sugo ko a bɛ ji min, nka ni a wulila, a b'a sɔrɔ ko minnɔgɔ b'a la. Siya minw bɛ Sion kulu kɛlɛ, olu jamaba na kɛ ten.
[9] Aw ka kabakoya ka kɔnɔna fili. Aw ka kɛ fiyentɔw ye minw tɛ yeli kɛ. U bɛ ɲɛnamini, nka dɔlɔ nɔ tɛ. U bɛ talontalon, nka minni fɛn farinmaw nɔ tɛ.
[10] K'a masɔrɔ Matigi ye sunɔgɔba bila aw la ka aw ɲɛw tugu, aw kiraw kɔni. A ye fini biri aw ɲɛda la, aw yelikɛlaw.
[11] Ayiwa, kiraya yeli fɛnw bɛɛ kɛra aw ɲɛ na i ko kitabu datugulen ni taamashyɛn ye. Mɔgɔ b'a di sɛbɛn dɔnna ma ko a k'a kalan, nka a b'a fɔ ko, a tɛ se, sabu a datugulen don.
[12] O kitabu bɛ di sɛbɛn dɔnbali ma ko a k'a kalan. A b'a fɔ ko a tɛ sɛbɛn dɔn.
[13] Matigi ko: «Nin mɔgɔw bɛ gɛrɛ ne la ni u da ye, u bɛ ne bonya u da la dɔrɔn, k'a sɔrɔ u dusukunw yɔrɔ ka jan ne la. Ne ɲɛsiran min bɛ u la, o ye mɔgɔ ka laada dama ye.
[14] Hadamaden ka laada dama don, o de kosɔn ne na to ka taamashyɛnw ni kobaw kɛ o mɔgɔw cɛma. Hakilitigiw ka hakilitigiya na ban. U ka dɔnnikɛlaw ka dɔnniya na kɛ fuu ye.»
[15] Mɔgɔ minw bɛ u ka ko kɛtaw dogo Matigi la, ni u bɛ u ka kɛwalew kɛ dibi la, ni u b'a fɔ ko: «Jɔn ɲɛ bɛ an na, jɔn bɛ an dɔn?» bɔnɛ bɛ olu ye.
[16] Aw hakilintanw, aw b'a jate ko daga dilabaa ni bɔgɔ ka kan. Fɛn dilalen n'a fɔ dilabaa ko la ko a ma ne dila? Daga n'a fɔ daga dilabaa ko la ko a tɛ foyi dɔn wa?
[17] Sɔɔni Liban na yɛlɛma ka kɛ foro hinɛma ye, foro hinɛma na jate kungokolon tulen ye.
[18] O don na tulo gerenw na kitabu kumaw mɛn. Dibi na bɔ fiyentɔw ɲɛw la, u na yeli kɛ.
[19] Mɔgɔ sabalilenw na ɲagali Matigi la kosɛbɛ. Faantanw na nisɔndiya ka sewa Israɛl ka Senuma la.
[20] K'a masɔrɔ u tɔɔrɔbaaw tɛna kɛ yen tun, nparabɔlikɛlaw na ban. Tilenbaliya sira taamabaaw na ban ka bɔ yen,
[21] olu minw bɛ tiɲɛtigi jalaki a ka kiri ko la. U bɛ jan da kiritigɛla ɲɛ. U bɛ mɔgɔ tilennen bali ni u ka nanbara ye.
[22] O de kosɔn Matigi kumana Yakuba ka so la, ale min ye Ibrahima kunmabɔ, a ko: «Yakuba tɛna mafiɲɛya tun, a ɲɛda tɛna maloya.
[23] K'a masɔrɔ a ni a denkɛw ye ne bolo ka sebaaya kow ye u cɛma tuma min na, u ye ne tɔgɔ saniya. U na Yakuba ka Senuma bonya ka Israɛl ka Ala bonya.
[24] Hakili tɛ minw fɛ, olu na hakili sɔrɔ. Minw ye dajukɔrɔ kuma fɔ, olu na kalan sɔrɔ.»