[1] Ayiwa sisan Yakuba, Matigi min ye i da, Israɛl, ale min ye i dila, a ko: «I kana siran, k'a masɔrɔ ne ye i kunmabɔ. Ne ye i wele i tɔgɔ la, i ye ne ta ye.
[2] Ni i bɛ jiw cɛ tigɛ tuma min na, ne na kɛ i fɛ yen. Ni i bɛ bajiw cɛ tigɛ tuma min na, u tɛna i tunun. Ni i bɛ tasuma cɛ tigɛ, a tɛna i jeni, tasuma mana tɛna i jeni.
[3] K'a masɔrɔ ne, Matigi, ne ye i ka Ala ye, ne, Israɛl ka Senuma, ne ye i Kisibaa ye. Ne ye Misira di ka kɛ i kunmabɔ sara ye, ka Etiopi ni Seba di ka bila i nɔ na.
[4] K'a masɔrɔ i ko ka bon ne bolo, i ka kan ni bonya ye sabu ne bɛ i kanu. Ne na cɛw di i nɔ na, ka siyaw di ka kɛ i ni kunmabɔ sara ye.
[5] I kana siran k'a masɔrɔ ne bɛ i fɛ. Ne na i bɔnsɔn sama ka bɔ kɔrɔn fɛ, ka i lajɛ ka bɔ tilebi yanfan fɛ.
[6] Ne n'a fɔ saheli yanfan ye ko: ‹U di ne ma,› k'a fɔ worodugu yanfan ye ko: ‹I kana u minɛ.› I ka ne denkɛw lajɛ ka bɔ yɔrɔ jan na, ka ne denmusow lajɛ ka bɔ dugukolo dan na.
[7] Olu minw bɛ wele ne tɔgɔ la, ne ye u da ne nɔɔrɔ kama, ne ye u dila, ne ye u kɛ.»
[8] Ɲɛ bɛ mɔgɔ minw na ni u tɛ yeli kɛ, tulo bɛ minw na ni u tɛ mɛnni kɛ, aw ka na ni olu ye.
[9] Siyaw bɛɛ ka lajɛ yɔrɔ kelen na, mɔgɔw bɛɛ ka lajɛ. Olu la jumɛn ye o kow jira an na ka waati tɛmɛnnen kow lakali an ɲɛ na? O tigiw ka u ka seerew jira, ka jo di u yɛrɛw ma, k'a jira ko u ka kumaw ye tiɲɛ ye.
[10] Matigi ko: «Aw ye ne seerew ye ani ne ka jɔn ɲɛnatɔmɔlenw, walisa aw ka ne dɔn ka da ne la k'a faamu ko ne ye ale de ye. Ala wɛrɛ si ma dila ne ɲɛ, a si tɛna kɛ ne kɔ.
[11] «Ne yɛrɛ ye Matigi de ye, Kisibaa wɛrɛ si tɛ ne kɔ.
[12] O de kosɔn ne de ye kisili ko fɔ, ne ye o fɔ ka a dafa sani a ka se. Bato fɛn wɛrɛ minw bɛ aw cɛma, olu ma o kɛ.» O de kosɔn Matigi ko: «Aw ye o seerew ye, ne ye Ala de ye.
[13] Ɔwɔ, ne bɛ tuma bɛɛ, mɔgɔ si tɛ se ka fɛn bɔ ne bolo. Ne bɛ min kɛ, mɔgɔ si tɛ se ka o yɛlɛma.»
[14] Ayiwa aw Kunmabɔbaa, Matigi, Israɛl ka Senuma ko: «Ne na kɛlɛbolo ci Babilonɛ kama k'a to a kɔnɔ mɔgɔw ka boli. Kaldekaw na don jikan kurunw kɔnɔ, u tun bɛ u yɛrɛw bonya olu minw ko la.
[15] Ne ye Matigi aw ka Senuma ye, Israɛl Dabaa, aw ka Masakɛ.»
[16] Matigi ye sira bɔ kɔgɔji cɛma ka kɔrɔ ka sira bɔ ka ji barikamaw cɛ tigɛ.
[17] A ye wotorow ni sotigiw bila o sira kan, ani kɛlɛbolo barikamaw ni kɛlɛkɛ cɛ ja gɛlɛnw. U bɛɛ bira, u tɛna wuli tun, u dufara i ko lanpa.
[18] Nka Matigi ko: «Aw kana aw hakili to fɔlɔfɔlɔ fɛnw la tun, aw kana miiri waati tɛmɛnnen kɔrɔ kow la tun.
[19] K'a masɔrɔ ne na ko kura kɛ, ɔwɔ, o bɛ dafa sɔɔni, aw tɛ o dɔn wa? Ne na sira bɔ kungokolon kɔnɔ, ka bajiw woyo dugukolo jalen na.
[20] Kungo sogow na ne bonya, kungo wuluw ni kɔnɔsogontiw kɔni, k'a masɔrɔ ne na ji lase kungokolon kɔnɔ, ka baji lase dugukolo jalen na, walisa ne ka ɲɛnatɔmɔlenw ka u min.
[21] Ne ye mɔgɔ minw da ne yɛrɛ ye, olu na ne tanuli ko welewele da.
[22] «Nka, e Yakuba ma ne tɔgɔ wele, k'a masɔrɔ e Israɛl sɛgɛnna ne ko la.
[23] I ma i ka sagaw di ne ma saraka jenitaw ye, i ma ne bonya ni i ka saraka fagataw ye. Ne ma i karaba ka nili fɛnw di ne ma, ne ma i sɛgɛn suma diyalanw ko la.
[24] I ma suma diyalanw san ne ye ni warijɛ ye, i ma ne fa ni i ka sarakaw kɛn ye. Nka i ye ne sɛgɛn ni i ka jurumuw ye, ka ne sɛgɛn ni i ka tilenbaliya kow ye.
[25] Ne, ne yɛrɛ bɛ i ka tilenbaliya kow jɔsi ne ka kanuya kosɔn. Ne tɛna ne hakili jigin i ka jurumuw la tun.
[26] I ka ne hakili jigin ko tɛmɛnnenw na, an ka kuma ɲɔgɔn fɛ. I ka i ta fɔ walisa i ka jo sɔrɔ.
[27] I fɔlɔfɔlɔ fa ye jurumu kɛ, i ka dalaminɛw murutira ne ma.
[28] O de kosɔn ne ye i ka karamɔgɔw kɔrɔfɔ, ka Yakuba don halakikɛlaw bolo, ka Israɛl don nparabɔlaw bolo.»