[1] Amoz denkɛ Esayi ka kiraya kuma Juda bɔnsɔn ni Jerusalɛm ko la.
[2] Laban don na Matigi ka so bɛ kulu min kan, o na sigi kulu tɔw bɛɛ kun na, o na kɔrɔta ka tɛmɛn tintinw bɛɛ kan. Siyaw bɛɛ na u kunda yen kan i ko baji woyotɔ.
[3] Jamaba na taa yen k'a fɔ ko: «A' ye na ka yɛlɛn Matigi ka kulu kan, ka taa Yakuba ka Ala ka so la. A na an kalan a ka siraw la, an na a ka siraw taama. K'a masɔrɔ sariya na bɔ Sion, Matigi ka kuma na bɔ Jerusalɛm.»
[4] A na kiri tigɛ siyaw ni ɲɔgɔn cɛ, ka siya caman ka kow ɲɛnabɔ. O tuma la u na u ka npanw faga ka kɛ misidabaw ye, ka u ka tamaw kɛ wɔlɔsɔw ye. Siya dɔ tɛna wuli dɔ wɛrɛ kama ni npan ye tun, mɔgɔ si tɛna dege kɛlɛ kow la tun.
[5] Yakuba ka so, a' ye na, an ka taama Matigi ka kɛnɛyeelen na.
[6] I ye i ka mɔgɔw Yakuba ka so bila ka u to yen, katuguni u donna kɔrɔn fɛ mɔgɔw ka laadaw la. U kɛra taamashyɛn dɔnbaaw ye i ko Filisitikaw, u ni jamana wɛrɛw denw kɛra jɛɲɔgɔnw ye.
[7] U ka jamana falen bɛ warijɛ ni sanu la, u ka nafolo mara yɔrɔw nafolo tɛ ban. U ka jamana falen bɛ sow ni wotorow dama dɔnbaliw la.
[8] U ka jamana falen bɛ boliw la. U bɛ u biri u yɛrɛw bolo baara nɔw kɔrɔ ka olu bato, u yɛrɛ bolow ye olu minw dila.
[9] O de kosɔn mɔgɔw na majigin, cɛ barikamaw na majigin. I tɛna yafa u ma fewu.
[10] I ka don faraw cɛma ka i dogo buguri la ka boli Matigi ka dimiyaba ani a nɔɔrɔba ɲɛ.
[11] Mɔgɔ ɲɛ malobaliw na majigin, kuncɛbaw na dɔgɔya. Matigi kelenpe na bonya o don na.
[12] Ɔwɔ, Kɛlɛbolow Matigi ka don na se kuncɛbaw ni yɛrɛ kɔrɔtabaaw bɛɛ kama, walisa mɔgɔ o mɔgɔ mana a yɛrɛ kɔrɔta, a ka o majigin.
[13] A na wuli Liban sedere jiri jamanjanw bɛɛ ni Basan sensunw bɛɛ kama.
[14] A na wuli kulu jamanjanw bɛɛ ni tintin kɔrɔtalenw bɛɛ kama,
[15] ani sankansojanw bɛɛ ni kɛlɛ kunbɛn kogo barikamaw bɛɛ kama,
[16] ani Tarsisi ji kan kurunw ni fɛn o fɛn cɛ ka ɲi, a na wuli o de kama.
[17] Hadamadenw ka yɛrɛ bonyali na dɔgɔya, mɔgɔw ka kuncɛbaya na majigin. Matigi kelenpe na kɔrɔta o don na.
[18] Ayiwa, boliw bɛɛ na ban.
[19] Ni Matigi wulila tuma min na, ka dugukolo yuguyugu kosɛbɛ, mɔgɔw na u dogo kuluwow ni faraw ni dugukolo jukɔrɔ, Matigi ka dimiyaba ni a ka sebaaya nɔɔrɔ ɲɛ.
[20] Mɔgɔw tun ye sanu bato fɛnw ni warijɛ bato fɛn minw dila, walisa u ka olu bato, o don na, u na olu fili totow ni ɲinɛw kɔrɔ.
[21] Ni Matigi wulila tuma min na ka dugukolo yuguyugu kosɛbɛ, mɔgɔw na dogo farawow ni kuluwow kɔnɔ Matigi ɲɛsiran ni a nɔɔrɔba kosɔn.
[22] Aw kana aw jigi da Hadamaden kan, a ninakili bɛ a nunwow la. Mun nafa b'a la?