[1] Matigi ko: «Babilonɛ, i ka jigin ka bɔ i ka masasigilan kan, ka i sigi duguma buguri la. Ka kɔrɔ i tun bɛ i ko npogotigi, e dugu min ma se ka minɛ. I tɛna wele muso ɲɛ sumalen fɛrɛlen tun.
[2] I ka wuguden ta ka sili kɛ. I ka musɔrɔ bila ka taafe foron ka i woro bɔ kɛnɛma ka ba tigɛ.
[3] I farilankolon na ye, mɔgɔw na i lebu ye. Ne na ne mɔnɛbɔ, mɔgɔ si tɛ se ka ne bali o la.
[4] An Kunmabɔbaa tɔgɔ ko Kɛlɛbolow Matigi, Israɛl ka Senuma.
[5] «Babilonɛ, i sigilen ka to ka i makun, i ka don dibi la ka i dogo, k'a masɔrɔ i tɛna wele ko siyaw ka masamusoma tun.
[6] Ne tun diminna ne ka mɔgɔw kɔrɔ, ne tun banna ne ka ciyɛn na k'a don i bolo. Nka e ma sɔn ka hinɛ u la, i ye doni girin da u kun, i ma sɔn ka hinɛ hali cɛkɔrɔbaw la.
[7] I ko: ‹Ne na to masamusoya la tuma bɛɛ.› I ma sɔn ka miiri i ka ko kɛtaw la ani ko minw bɛ na kɛ olu kɔ.
[8] Ayiwa sisan i ka nin lamɛn, e muso ɲɛ sumalen, lakanalen, min sigilen bɛ i ka masasigilan kan, e min b'a fɔ i yɛrɛ kɔnɔ ko: ‹Ne, ne kɔni, dɔ wɛrɛ tɛ ne kɔ. Ne tɛna kɛ muso cɛ salen ye, ne tɛna bɔnɛ ne denw la.›
[9] Ayiwa, nin bɔnɛ fila na cun i kan yɔrɔ nin kelen, tile kelen na. I na bɔnɛ i denw na ka kɛ muso cɛ salen ye. Hali ni i bɛ subaaya kow kɛ, hali ni i ye filɛli caman kɛ, o bɔnɛ fila bɛna i sɔrɔ ka juguya.
[10] I ye i jigi da i yɛrɛ ka keguya kan k'a fɔ ko: ‹Mɔgɔ si tɛna ne ye.› I ka hakilitigiya ni i ka dɔnniya ye i lafili, i y'a fɔ i yɛrɛ kɔnɔ ko: ‹Dɔ wɛrɛ tɛ ne kɔ.›
[11] Bɔnɛ na bi i kan, i tɛna o kɛ cogo dɔn. Halakili na cun i kan, i tɛna se ka kisi o ma. Tiɲɛnni ko na cun i kan yɔrɔ nin kelen sani i ka o dɔn.
[12] «Ayiwa, i ka to ka i ka dabali caman ni i ka filɛli kow kɛ, i bɛ o minw na kabini i denmisɛnma. A dɔrɔ i na se ka dɛmɛni sɔrɔ, a dɔrɔ i na kɛ siranfɛnba ye.
[13] I ye dɔnnikɛlaw ɲininka fo ka i sɛgɛn. Sankolo taamashyɛnw dɔnbaaw ni dolo dɔnbaaw ani dɔnbaa minw bɛ kalo kuraw filɛ ka i ka ko kɛtaw fɔ, olu ka wuli ka i kisi sa.
[14] A filɛ, olu bɛɛ na kɛ i ko bin ɲaga, tasuma na u jeni. U tɛna se ka kisi o tamana ma fewu. O tɛna kɛ tasuma fitinin ye, mɔgɔ bɛ dumuni dila min na. A tɛna kɛ mɔgɔ laja tasuma ye.
[15] I ye i yɛrɛ sɛgɛn ka minw ɲininka, olu niyɔrɔ na kɛ o ye. E ni olu minw tun bɛ jɛ ka kow kɛ ɲɔgɔn fɛ kabini i denmisɛnma, olu bɛna boli ka taa u ka yɔrɔw la. Mɔgɔ si tɛna se ka i kisi.»