[1] «Nka sisan, ne ka jɔnkɛ Yakuba, ne ka ɲɛnatɔmɔlen Israɛl, i ka lamɛnni kɛ.
[2] Matigi min ye i da ka i dila sani i ka bange, o min ye i sinsin yɔrɔ ye, o ko: ‹Ne ka jɔnkɛ Yakuba, ne ka ɲɛnatɔmɔlen Israɛl, i kana siran.›
[3] K'a masɔrɔ ne na ji bɔ dugukolo jintan kan fo ka woyo, ka kɔji woyo dugukolo jalen na. Ne na ne Ni jigin i bɔnsɔn kan ka caya, ka ne ka duba da i bɔnsɔn kan.
[4] U na jiidi i ko ji da la bin nugu, i ko ji woyo da la jirisun.»
[5] Mɔgɔ dɔ n'a fɔ ko: «Ne ye Matigi ta ye.» Dɔ wɛrɛ n'a fɔ ko a ye Yakuba ta ye. Dɔ wɛrɛ na sɛbɛnni kɛ a bolokala kan ko: «Ne ye Matigi ta ye.» Ka wele Israɛl tɔgɔ la, o na kɛ bonyali ye.
[6] Matigi, Israɛl bɔnsɔn ka Masaba, a Kunmabɔbaa, Kɛlɛbolow Matigi ko: «Ne ye fɔlɔ ni laban de ye, Ala wɛrɛ si tɛ ne kɔ.
[7] Kabini ne ye mɔgɔw da, kabini u bɛnbaw, jɔn ye ko nataw fɔ i ko ne? O tigi ka kuma k'a jɛya. Ɔwɔ, o ka ko nataw fɔ, ani ko minw ka kan ka kɛ sɔɔni.
[8] «Ne ka mɔgɔw, aw kana siran, aw ja kana tigɛ. Ne ma o fɔ aw ye ka jira aw la ka kɔrɔ wa? Aw ye ne seerew ye o kow la. Yala Ala wɛrɛ bɛ yen ne kɔ wa? Ayi, farakurun wɛrɛ si tɛ yen, ne tɛ o dɔn.»
[9] Boli dilabaaw tɛ foyi ye, u ka fɛn dilalenw bɛɛ la ɲuman ye fuu de ye. U yɛrɛw ye o seerew ye, u tɛ foyi ye, u tɛ foyi dɔn. O de kosɔn u na maloya ka u kun suuli.
[10] Ka bato fɛn dila wala ka nɛgɛ yeele ka o dila ka kɛ ja ye, o bɛ mun ɲɛ mɔgɔ ye, k'a sɔrɔ nafa t'a la?
[11] U batobaaw bɛɛ na maloya, u dilabaaw tɛ foyi ye Hadamadenw kɔ. U bɛɛ ka lajɛ ka u yɛrɛw jira. U ja na tigɛ ka maloya.
[12] Numu bɛ nɛgɛ tigɛ k'a don tasuma la ka a baara ni a yɛrɛ bolo ye k'a faga ni maritow ye. O baara bɛ kɔngɔ bila a la, a barika bɛ ban. Ni a ma ji min joona, a fanga bɛ dɛsɛ.
[13] Jiri baarala bɛ juru da jiri kan ka sira ci ni kiriyɔn ye. A bɛ a dɛsɛ ni dɛsɛlan ye k'a suma ni sumakɛlan ye ka mɔgɔ bisigi dila k'a cɛɲɛ i ko mɔgɔ ka o bila bon dɔ kɔnɔ.
[14] A bɛ sedere sun wala jala sun wala sen sun ɲɛnatɔmɔ tu kɔnɔ jiriw cɛma, wala a bɛ jiri dɔ turu ni a yɛrɛ bolo ye, sanji bɛ o bonya.
[15] Mɔgɔ bɛ a mago ɲɛ ni o jiri ye. A b'a don tasuma la k'a yɛrɛ laja ni o ye. A bɛ o dɔ ta ka dumuni dila n'a ye, k'a dɔ ta ka bato fɛn dila n'a ye k'a bato. A b'a kɛ boli ye ka i biri a kɔrɔ.
[16] A bɛ o jiri tilancɛ jeni ka dumuni dila ni o ye. A bɛ sogo jiran ka i fa o la. Wala a b'i laja k'a fɔ ko: «E, nin funteni ka di sa. Ne ɲɛ bɛ tasuma mana la.»
[17] O kɔ, a bɛ o jiri tɔ dila k'a kɛ bato fɛn ye ka o bato. A bɛ i biri o kɔrɔ ka o deli ko: «I ka ne mara sabu i ye ne ka ala ye.»
[18] O mɔgɔw tɛ foyi dɔn, u tɛ foyi faamu. U ɲɛw datugulen don walisa u kana yeli kɛ, walisa u dusukun kana na fɛn faamu.
[19] U si t'a faamu u yɛrɛw ma wala ka hakili sɔrɔ k'a fɔ ko: «Ne ye o jiri tilancɛ don tasuma la ka dumuni dila takami kan ka ne ka sogo jiran k'a dun. Ko ne na a tɔ dila k'a kɛ bato fɛn haramulen ye wa? Ne ka jiri kunkurun bato wa?»
[20] O kɛbaa bɛ i n'a fɔ mɔgɔ min bɛ bugurijɛ dun. A dusukun lafililen don. A tɛ se k'a dɔn a yɛrɛma k'a fɔ ko: «Boli min bɛ ne kininbolo la, o ye nkalon ye.»
[21] O de kosɔn Yakuba, i ka hakili sɔrɔ, k'a masɔrɔ e Israɛl, e ye ne ka jɔnkɛ ye. Ne ye i da, Israɛl, i ye ne ka jɔnkɛ ye, ne tɛna ɲinɛ i kɔ.
[22] Ne ye i ka sariya tiɲɛnni kow jɔsi i ko sankabafin, ka i ka jurumuw jɔsi ka bɔ yen i ko sankaba. I ka segin ne ma, sabu ne ye i kunmabɔ.
[23] Sankolow ka ɲagalikan bɔ, k'a masɔrɔ Matigi ye a ka kɛwalew kɛ ka dafa. Dugukolo jukɔrɔlaw ka nisɔndiyakan bɔ. Kuluw ka ɲagalikanba bɔ. Kungo kɔnɔ jiriw fana ka ɲagalikan bɔ, k'a masɔrɔ Matigi ye Yakuba kunmabɔ ka a nɔɔrɔ jira Israɛl la.
[24] Matigi, i Kunmabɔbaa, min ye i dila sani i ka bange, o ko: «Ne ye Matigi ye, fɛn bɛɛ dabaa. Ne kelenpe de ye sankolow fɛnsɛ, ne kelenpe ye dugukolo da.
[25] Ne bɛ kira nkalontigɛlaw ka taamashyɛnw tiɲɛn, ka filɛlikɛlaw kɛ hakilintanw ye, ka hakilitigiw lasegin kɔ fɛ, ka u ka dɔnniya kɛ nalonmaya ye.
[26] Ne bɛ ne ka jɔn ka kuma fɔlen dafa, ka ne ka cidenw ka kiraya kumaw kɛ ka u dafa. Ne b'a fɔ Jerusalɛm ko la ko mɔgɔw na sigi a kɔnɔ, k'a fɔ Juda bɔnsɔn ka duguw ko la ko u na jɔ ko kura, ka u yɔrɔ cilenw lawuli ko kura.
[27] Ne b'a fɔ ji dunbaw ye ko u ka ja, ne bɛ i ka bajiw fana ja.
[28] Ne b'a fɔ Sirus ko la ko ale ye ne ka saga gɛnna ye, ni a y'a fɔ ko Jerusalɛm ka jɔ ko kura don min na, k'a fɔ ko ne batosoba ju ka sigi ko kura, a na ne sago bɛɛ dafa o don na.»