[1] O don na mɔgɔw na nin dɔnkili da Juda bɔnsɔn ka jamana la ko: «Dugu barikama bɛ an fɛ, Ala yɛrɛ na kisili kɛ a lamini kogow ni a kɛlɛ kunbɛn kogow ye.
[2] Aw ka dugu dondaw yɛlɛ walisa siya tilennen kantigi ka don.
[3] Mɔgɔ min dusu sigilen don, i na hɛrɛ di o ma, hɛrɛ dafalen kɔni, k'a masɔrɔ a ye a jigi da i kan.
[4] A' ye aw jigi da Matigi kan badaa, k'a masɔrɔ Matigi Ala ye badaa farakurun de ye.
[5] Mɔgɔ minw kuncɛ tun ka bon, a ye olu majigin, ka dugu barikama barika dɔgɔya, a ye o majigin fo duguma, ka o don buguri la.
[6] Faantanw na a foroki u sen kɔrɔ, kɔlibaatɔw na u sen da a kan.»
[7] Mɔgɔ tilennen ka sira ye kelen de ye, i bɛ sira tilennen labɛn mɔgɔ tilennen ye.
[8] Matigi, an fana jigi dalen bɛ i kan. An bɛ i ka kiri kow makɔnɔ k'an to i ka sira kan. I tɔgɔ ko bɛ an dusu la haali, an b'a fɛ ka an hakili to i la.
[9] I ko bɛ ne dusu la kosɛbɛ, ne dusukun bɛ i ɲini su fɛ. Ni i ka kiri kow sera dugukolo kan tuma min na, dugukolo kan mɔgɔw na i ka tilennenya ko dɔn.
[10] Hali ni makari kɛra mɔgɔ jugu la, a tɛna tilennenya dege. Ka a to jamana tilennen na, a bɛ to ka ko jugu kɛ, a tɛna Matigi bonyali jate.
[11] Matigi, i bolo kɔrɔtalen don, nka mɔgɔ juguw ma o ye. U na i hami cogo ye i ka mɔgɔw ko la ka maloya. Tasuma na i juguw jeni ka u ban.
[12] Matigi, i na hɛrɛ di an ma, k'a masɔrɔ an bɛ fɛn o fɛn kɛ, e de bɛ o kɛ an ye.
[13] Matigi, an ka Ala, kuntigi wɛrɛ sigilen tun bɛ an kun na, ni i tɛ, nka i yɛrɛ barika la, an bɛ i tɔgɔ wele.
[14] Mɔgɔ salenw kɔni tɛ se ka ɲɛnamaya tun, minw donna lahara, olu tɛna kunun tun. I ye u tɔɔrɔ ka u halaki ka u ko bɔ mɔgɔ kɔnɔ.
[15] Matigi, i ye siya jiidi, ɔwɔ, i ye siya jiidi, i ye i nɔɔrɔ jira ka an ka dancɛw bonya.
[16] Matigi, u ye i ɲini u degun tuma la, u ye nwunankan bɔ ka i deli.
[17] Matigi, muso kɔnɔma bɛ nwunan k'a to tin na cogo min na, an tun bɛ ten i ɲɛ kɔrɔ.
[18] An ye kɔnɔ ta ka sigi tin na, nka an ma foyi bange fiɲɛ kɔ. An ma se ka jamana kisi wala ka mɔgɔ wɛrɛ bange diɲɛ la.
[19] Ayiwa i ka suw lakunun ka u farikolow lawuli. Ne ka mɔgɔ minw bɛ dugukolo jukɔrɔ, aw ka kunun ka ɲagali dɔnkili da. K'a masɔrɔ Ala, e ka ngomi bɛ i ko sɔgɔma da la ngomi, dugukolo na mɔgɔw suw labɔ.
[20] Ne ka mɔgɔw, a' ye taa don aw ka sow kɔnɔ ka da tugu aw da la ka aw dogo dɔɔnin, sani Ala ka dimiya ka tɛmɛn.
[21] K'a masɔrɔ Matigi bɔtɔ don a ka yɔrɔ la ka dugukolo kan mɔgɔ juguw sara u ka jurumu kosɔn. Dugukolo na a ka joli bɔ kɛnɛkan. A tɛna a ka mɔgɔ fagalenw dogo tun.