[1] E jamana min bɛ a kamanfuraw mankan bɔ, e min bɛ Kus bajiw kɔ fɛ,
[2] e min bɛ cidenw ci ka taa kɔgɔji kan burugu kurunw kɔnɔ, ciden minw ka tɛli, a' ye taa siya mɔgɔ jamanjanw fari nugulenw yɔrɔ. Yɔrɔ surun mɔgɔw ni yɔrɔ jan mɔgɔw bɛɛ bɛ siran u ɲɛ. O siya mɔgɔw ye fangatigiw ye, u bɛ fɛnw bɛɛ ɲɔɲɔ. Bajiw bɛ u ka jamana cɛ tigɛ.
[3] Aw bɛɛ minw sigilen bɛ diɲɛ la, aw minw sigilen bɛ dugukolo kan, ni darapo sirila kulu kan tuma min na, aw ka o filɛ ka buru fyɛkan lamɛn.
[4] Matigi y'a fɔ ne ye ko: «Tile bɛ funteni kɛ ni mankan tɛ cogo min na, ngomiji bɛ da suman tigɛ tuma la ni mankan tɛ cogo min na, o cogo la ka ne to sankolo la, ne mankan sumalen na a filɛ.
[5] Nka sani suman tigɛ tuma ka se, ni a feere waati tɛmɛnna ani feere kɛra rezɛnden kogolen ye, a nugukunw na tigɛ ni wɔlɔsɔ ye, a bolobaw na tigɛ ka bɔ yen.
[6] Kɛlɛkɛ cɛw suw na to kuluw kan. U na kɛ sogo dun kɔnɔw ani dugukolo kan waraw ka dumuni ye. O sogo dun kɔnɔw na u kɛ dumuni ye funteni tuma la, dugukolo kan waraw na u dun fonɛnɛ tuma la.»
[7] O don na yɔrɔ surun mɔgɔw ani yɔrɔ jan mɔgɔw bɛɛ bɛ siran mɔgɔ jamanjanw ni mɔgɔ fari nugulenw ja gɛlɛn minw ɲɛ, o siya min bɛ mɔgɔ cɔngɔ a sen kɔrɔ, bajiw bɛ olu minw ka jamana cɛ tigɛ, o mɔgɔ kelenw na taa ni nili fɛnw ye ka di Kɛlɛbolow Matigi ma a ka yɔrɔ senuma la Sion kulu kan.