[1] Yɔrɔ jan na mɔgɔw, a' ye aw makun ka ne lamɛn. Siyaw ka u labɛn ni ja gɛlɛya ye. U ka u madon ka kuma. An ka gɛrɛ ɲɔgɔn na kiri kama.
[2] Jɔn nana ni se sɔrɔbaa ye ka bɔ kɔrɔn fɛ, k'a kɛ se sɔrɔbaa ye a taa yɔrɔw bɛɛ la? Jɔn ye siyaw don a bolo k'a sigi masakɛw kun na? A ka npan na u bɔn duguma i ko buguri, a ka biɲɛw na u jɛnsɛn i ko fiɲɛ bɛ taa ni bin ɲaga ye cogo min na.
[3] A bɛ tugu u kɔ. A ma sira min taama fɔlɔ, a bɛ taa o fɛ hɛrɛ la.
[4] Jɔn ye o kɛ, jɔn ye o dafa? Min ye ɲɛnamaya di mɔgɔw bɛɛ ma kabini fɔlɔfɔlɔ, o don. Ne, Matigi, ne tun bɛ yen kabini fɔlɔfɔlɔ. Ne, Matigi Ala, ne na to badaa.
[5] Yɔrɔ jan na mɔgɔw y'a ye ka siran a ɲɛ. Diɲɛ dan na mɔgɔw y'a ye ka yɛrɛyɛrɛ ka gɛrɛn.
[6] U bɛ ɲɔgɔn dɛmɛ, u bɛɛ b'a fɔ u balima ye ko a ka a ja gɛlɛya.
[7] Jiri dɛsɛla bɛ sanu faga numu jija. Min bɛ fɛn faga ni marito ye, o bɛ kolan kan nɛgɛ gosibaa jija. A b'a fɔ ko: «A nɔrɔ cogo ɲɛna.» A bɛ o boli gengen ni pɔnti ye, walisa a kana lamaga.
[8] Nka e Israɛl, ne ka jɔnkɛ, e Yakuba, ne ka ɲɛnatɔmɔlen, ne terikɛ Ibrahima bɔnsɔn,
[9] ne ye e min minɛ ne bolo la ka bɔ dugukolo dan na, ka i wele ka bɔ jamana jan na, ne y'a fɔ e min ye ko: «I ye ne ka jɔnkɛ ye, ne ma i fili, nka ne ye i ɲɛnatɔmɔ.
[10] I kana siran k'a masɔrɔ ne bɛ i fɛ, i ja kana tigɛ sabu ne ye i ka Ala ye. Ne na barika don i la ka i dɛmɛ, ne na i dɛmɛ ni ne kininbolo barikama ye.»
[11] A filɛ, minw bɛ dimin i kɔrɔ, olu na maloya ka kun suuli. Minw bɛ wuli i kama, olu na halaki ka u ban.
[12] Minw bɛ baga i ma, i na olu ɲini, nka i tɛna u ye. Minw bɛ i kɔrɔfɔ, minw bɛ i kɛlɛ, olu na halaki ka u ban.
[13] K'a masɔrɔ ne ye Matigi, i ka Ala ye, ne na i kininbolo minɛ, k'a fɔ i ye ko: «I kana siran, ne na i dɛmɛ.»
[14] «Yakuba, e min ye ntumu ye, Israɛl tɔ barika dɛsɛlen, i kana siran.» Matigi ko: «Ne bɛ na i dɛmɛ. Matigi, Israɛl ka Senuma ye i Kunmabɔbaa ye.
[15] A filɛ, ne ye i kɛ alikama cɔngɔ masine kura da duman ye, ɲinw b'a la. I na kuluw ɲɔɲɔ ka u karikari, ka tintinw kɛ i ko bin mugumugu.
[16] «I na u fyɛ, fiɲɛ na taa ni u ye, fiɲɛba na u jɛnsɛn. Nka i yɛrɛ na sewa Matigi la, i na i yɛrɛ bonya Israɛl ka Senuma ko la.
[17] «Mɔgɔ tɔɔrɔlenw ni mɔgɔ degunnenw bɛ ji ɲini, nka ji tɛ yen, u ngɔnɔ jara minnɔgɔ fɛ. Ne, Matigi yɛrɛ, ne na u jaabi, ne, Israɛl ka Ala, ne tɛna u bila.
[18] Ne na bajiw dayɛlɛ kulu walawalamaw san fɛ, ka ji boyiw kɛ kuluw furancɛw la. Ne na kungokolon lankolon kɛ kɔ jima ye, ka jamana jalen kɛ ji boyi yɔrɔw ye.
[19] Ne na sedere sunw ni zajɛ sunw ni mirte sunw ani olive sunw falen kungokolon lankolon kɔnɔ. Ne na sipere sunw ni orme sunw ni buis sunw falen ɲɔgɔn fɛ jamana jalen na.
[20] Ne na o kɛ walisa u ka a ye, k'a dɔn ka miiri a la k'a faamu ko Matigi bolo ye o kabakow kɛ, ko Israɛl ka Senuma ye o Kɛbaa ye.»
[21] Matigi ko: «A' ye aw yɛrɛw kun ko fɔ.» Yakuba ka Masakɛ ko: «Aw ka aw fɛ ta jira.»
[22] Ɔwɔ, ko minw na kɛ, aw ka olu jira an na, ka u fɔ an ye. Aw ye kiraya ko minw kɛ ka kɔrɔ, aw ka olu fɔ an ye walisa an ka miiri u la ni u dafara, wala aw ka ko nataw jira an na.
[23] Ko minw na kɛ kɔ fɛ, aw ka olu fɔ an ye, walisa an k'a dɔn ko aw ye bato fɛnw ye. Aw ka ko ɲuman wala ko jugu fana kɛ, walisa an ka o ye ka kabakoya ɲɔgɔn fɛ.
[24] A filɛ, aw tɛ foyi ye, aw bɛ min kɛ, o ye fuu de ye. Aw ɲɛnatɔmɔli ye fɛn haramulen ye.
[25] «Ne ye mɔgɔ dɔ lawuli ka bɔ saheli fan fɛ, o nana, ne y'a lawuli ka bɔ kɔrɔn fɛ, a ye ne tɔgɔ wele. A bɛ faamaw foroki i ko mɔgɔ bɛ bɔgɔ foroki cogo min na, i ko daga dilala bɛ bɔgɔn foroki ni a sen ye cogo min na.
[26] Jɔn ye o fɔ kabini fɔlɔfɔlɔ walisa an ka a dɔn? Jɔn y'a ko fɔ sani a ka kɛ walisa an k'a fɔ ko tiɲɛ don? Mɔgɔ si ma o fɔ. Mɔgɔ si ma o lakali. Mɔgɔ si ma aw ka kuma mɛn.»
[27] Ne fɔlɔ de y'a fɔ Sion ye ko: «U filɛ, u filɛ. Ne na kibaru duman fɔbaa ci Jerusalɛm ma.
[28] Ne ye filɛli kɛ, ne ma mɔgɔ si ye, kirayakɛla si ma sɔrɔ u cɛma. Mɔgɔ si ma sɔrɔ u cɛma ka ne jaabi.
[29] Ɔwɔ, u bɛɛ ye fuu ye, u ka kɛwalew tɛ foyi ye, u ka boliw ye fiɲɛ tɛmɛntɔ gwansan ye.»