[1] Kiraya kuma Tir ko la. Tarsisi jikan kurunw, aw ka maɲumatɔkan bɔ, sabu aw ka dugu cira. So si t'a kɔnɔ, don yɔrɔ tɛ yen. Kibaru fɔra u ye ka bɔ Kitim jamana la.
[2] Kɔgɔji da la mɔgɔw, a' ye aw makun. Sidɔn jagokɛlaw minw bɛ taa ka segin kɛ kurunw kɔnɔ, olu bɛ aw fɛntigiya.
[3] A ye tɔnɔ sɔrɔ ka bɔ Sihor ɲɔ la ani Nil ba dala sumanw la jibaw kan. A kɛra siyaw bɛɛ ka jago kɛ yɔrɔ ye.
[4] Sidɔn, i ka maloya, e min ye kɔgɔji la dugu barikama ye, k'a masɔrɔ kɔgɔji ko: «Ne ma sigi tin na, ne ma den bange, ne ma kamalenw balo, ne ma npogotigiw lamɔ.»
[5] Ni o kibaru sera Misira, u dusu na kasi Tir bili kosɔn.
[6] Kɔgɔji dala jamanaw, aw ka kɔgɔji cɛ tigɛ ka taa Tarsisi ka kasi.
[7] Aw ka dugu ɲagalilen min tun bɛ yen kabini tuma jan, nin don wa, o min taara yɔrɔ jan siyaw cɛma ka olu mara?
[8] Tir dugu min tun bɛ masafugulaw tilatila, ni a ka jagokɛlaw tun bɛ jate faamaw ye, a kɔnɔ mɔgɔ minw tun bɛ taa ka segin kɛ ni jago fɛnw ye, ni olu tun bɛ jate dugukolo kan mɔgɔbaw ye, jɔn ye o dugu tiɲɛnni ko latigɛ?
[9] Kɛlɛbolow Matigi de ye o ko latigɛ, walisa a ka u ka nɔɔrɔw ni u ka kuncɛbaya kow ban ka bɔ dugukolo kan ka mɔgɔbaw majigin.
[10] Tarsisi, i hakili sigilen ka taa ka segin kɛ i ko Nil baji bɛ taa cogo min na. Foyi tɛ i bali tun.
[11] Matigi y'a bolo yankan kɔgɔji kun na k'a to masayaw ka yɛrɛyɛrɛ. A ye ci di Kanankaw kama ko olu ka kɛlɛ kunbɛn sow ka ci.
[12] A ko: «Sidɔn denmuso, npogotigi tiɲɛnnen, i tɛna ɲagalikan bɔ tun. I ka wuli ka taa Kitim jamana la, hali o, i tɛna lafiya sɔrɔ yen.»
[13] Kaldekaw ka jamana filɛ, o mɔgɔw tun tɛ jate ka kɔrɔ. Asiri ye o jamana di kungo kɔnɔ mɔgɔw ma. Kaldekaw ye u yɛrɛw ka kɛlɛ kunbɛn sow jɔ ka Tir masaya sow ci ka u kɛ tomon ye.
[14] Tarsisi jikan kurunw, aw ka maɲumatɔkan bɔ, sabu aw ka kɛlɛ kunbɛn so cira.
[15] O waati la mɔgɔw na ɲinɛ Tir kɔ san biwolonwula kɔnɔ. O janya na kɛ masakɛ dɔ si tile janya ye. O san biwolonwula mana dafa, Tir ko na kɛ i ko jatɔmuso min ko fɔra dɔnkili la ko:
[16] «I ka nkɔni ta ka dugu yaala, mɔgɔ ɲinɛna jatɔmuso min kɔ, i ka nkɔni ta ka dɔnkili caman da walisa an hakili ka jigin i la.»
[17] San biwolonwula mana dafa, Matigi na a ɲɛ majigin ka Tir filɛ. O dugu na segin a ka tilenbaliya kow kan tun. A na jatɔya kɛ diɲɛ masayaw bɛɛ fɛ dugukolo kan.
[18] Nka a ka jagɔkɛ fɛnw bɛɛ ni a ka tɔnɔ nɔgɔlenw na di Matigi ma. U tɛna lajɛ ɲɔgɔn kan tun, u tɛna mara, nka minw bɛ sigi Matigi ɲɛ kɔrɔ, u na kɛ ka olu balo ka u fa ka u fɛɛrɛbɔ ni fini saramaw ye.