[1] Mɔgɔ minw ma ɲininkali kɛ ne ko la, ne ye ne yɛrɛ jira olu la. Minw ma ne ɲini, ne yera olu fɛ. Siya min ma ne deli, ne y'a fɔ o ye ko: «Ne filɛ, ne filɛ.»
[2] Ne ye ne bolo mɔɔnɔbɔ mɔgɔ murutilenw ye don o don. U bɛ sira jugu taama, u bɛ u yɛrɛw sago kɛ.
[3] Ko minw bɛ ne dusu dimin, u bɛ olu kɛ ne ɲɛ kɔrɔ tuma bɛɛ. U bɛ saraka faga tuw kɔnɔ ka wusulan suma duman wusu biriki saraka bɔlanw kan.
[4] U bɛ taa u sigi kaburuw cɛma ka su bɛɛ kɛ kuluwow kɔnɔ. U bɛ lɛ sogo dun. U ka dumuni kɛ tasaw falen bɛ sogo haramulenw naji la.
[5] U b'a fɔ mɔgɔ tɔw ye ko: «Aw kana gɛrɛ yan na ka maga an na, ni o kɛra an ka senumaya na aw faga.» U ka ko juguw bɛ ne dusu dimin, ne ka dimiya tasuma tɛna dufa.
[6] O de kosɔn ne ye min latigɛ u ko la, o filɛ nin ye. Ko ne tɛna ne makun sani ne ka u ka ko jugu bɛɛ sara ka dafa tuma min na.
[7] Matigi ko: «Tiɲɛ la, ne na aw yɛrɛ ka tilenbaliya kow ni aw bɛnbaw ka tilenbaliya kow kɔsegin aw kun. U ye wusulan suma duman wusu kuluw kan ka ne dusu dimin tintinw kan. O de kosɔn ne na u sara u ka kɛwalew jugu tɛmɛnnen yɛrɛ kosɔn.»
[8] Matigi ko: «Ni mɔgɔ ye ji dɔɔnin sɔrɔ rezɛn tusuu la, a bɛ fɔ i kana a tiɲɛn, k'a masɔrɔ a tɔ ka ɲi. Ne na o ɲɔgɔn kanuya jira ne ka mɔgɔw la, walisa u kana halaki.
[9] Ne na bɔnsɔn dɔ bɔ Yakuba la ka ciyɛntala dɔ bɔ Juda bɔnsɔn na min na ciyɛn ta ne ka kulu kan. Ne ka ɲɛnatɔmɔlenw na sigi yen, ne ka jɔnw na sigi u sigiyɔrɔw la.
[10] Saron jɛkɛnɛ na kɛ sagaw ka dumuni kɛ yɔrɔ ye, Akɔr jɛkɛnɛ na kɛ misiw da yɔrɔ ye.
[11] Nka aw minw bɛ Matigi bila ka ɲinɛ ne ka kulu senuma kɔ, ka tabali dila bato fɛn Gad ye, ka jifilen fa diwɛn kolonsolen na bato fɛn Meni ye,
[12] ne na npan latigɛ aw ye. Aw bɛɛ na biri ka aw kan tigɛ, k'a masɔrɔ ne ye weleli kɛ, aw si ma ne jaabi. Ne kumana nka aw ma ne lamɛn, aw ye ko jugu kɛ ne ɲɛ kɔrɔ. Ko minw man di ne ye fewu, aw ye olu ɲɛnatɔmɔ.»
[13] O de kosɔn Matigi Ala ko: «Ne ka jɔnw na dumuni kɛ, nka kɔngɔ na aw minɛ. Ne ka jɔnw na minni kɛ nka minnɔgɔ na aw minɛ. Ne ka jɔnw na ɲagali, nka aw na maloya.
[14] A filɛ, ne ka jɔnw na ɲagali ka dɔnkili da, nka aw dusu kasilen na kulo, aw ɲɛnasisilen na kasi.
[15] Aw tɔgɔ na kɛ dangali kɛ fɛn ye ne ka ɲɛnatɔmɔlenw cɛma. Matigi Ala na aw faga, nka a na tɔgɔ wɛrɛ da a ka jɔnw na.
[16] Mɔgɔ min b'a fɛ ka dubaw ta dugukolo kan, o na dubaw kɛ tiɲɛtigi Ala tɔgɔ la. Mɔgɔ min b'a fɛ ka i kali dugukolo kan, o na i kali tiɲɛtigi Ala la, k'a masɔrɔ ɲinɛ na kɛ tɔɔrɔ tɛmɛnnen kɔrɔw kɔ, olu na tunun ne ɲɛ kɔrɔ.»
[17] Ne na sankolo kuraw ni dugukolo kura da. Mɔgɔ tɛna miiri ko tɛmɛnnenw la tun, u tɛna jigin mɔgɔ kɔnɔ tun.
[18] Aw ka ɲagali tuma bɛɛ ka nisɔndiyakan bɔ ne ka fɛn dataw kosɔn. Ɔwɔ, ne na Jerusalɛm jɔ ka kɛ ɲagali sababu ye. A kɔnɔ mɔgɔw na ɲagali a kɔnɔ.
[19] Ne na sewa Jerusalɛm ni ne ka mɔgɔw ko la. Kasikan wala kulokan si tɛna mɛn a kɔnɔ tun.
[20] Denmisɛn min ma si jan sɔrɔ, wala mɔgɔ kɔrɔ si tile dafabali tɛna sɔrɔ a kɔnɔ tun, k'a masɔrɔ mɔgɔ min bɛ sa a si san kɛmɛ la, o na jate kamalen ye. Jurumukɛla min bɛ sa sani a ka san kɛmɛ sɔrɔ, o na jate dangaden ye.
[21] Ne ka mɔgɔw na sow jɔ ka sigi olu kɔnɔ. U na rezɛn nakɔw turu ka olu mɔw dun.
[22] U tɛna so jɔ mɔgɔ wɛrɛ ka sigi o kɔnɔ tun. U tɛna danni kɛ mɔgɔ wɛrɛ ka o suman tigɛ tun, k'a masɔrɔ ne ka mɔgɔw si tile na janya i ko jirisun ta. Ne ka mɔgɔw na nisɔndiya u baara nɔw la.
[23] U tɛna sɛgɛn fuu tun, u tɛna denw bange ka waati dɔɔnin kɛ ka sa tun, k'a masɔrɔ ne na o siya ni a bɔnsɔn kɛ dubadenw ye.
[24] Ne na u jaabi sani u ka ne deli, ne na u lamɛn ka u to kuma la.
[25] Suruku ni sagaden na dumuni kɛ ɲɔgɔn kɛrɛ fɛ. Waraba na bin dun i ko misi. Sa na balo dugukolo buguri dama la. Ko jugu wala fariya ko si tɛna kɛ ne ka kulu senuma Sion yɔrɔ si la. Matigi ko ten.