[1] Bolo kura na nugu ka bɔ Isayi gungurun na, bolo na nugu ka bɔ a dili la.
[2] Matigi Ni na to o kan, a na hakilitigiya ni faamuli Ni sɔrɔ ani laadili Ni ni barika Ni ani Matigi dɔnniya ni a ɲɛsiran Ni.
[3] Matigi ɲɛsiran na diya a ye. A tɛna kiri tigɛ ka kɛɲɛ ni a ɲɛ ka ko yetaw ye, a tɛna kow latigɛ ka kɛɲɛ ni a tulo ka mɛntaw ye,
[4] nka a na faantanw ka kiri tigɛ ni tilennenya ye, ka dugukolo kan mɔgɔ sabalilenw ka ko ɲɛnabɔ ni tilennenya ye. A na dugukolo gosi ni a ka tilennenya kuma ye i ko bere, ka mɔgɔ juguw faga ni a dafiɲɛ ye.
[5] Tilennenya na kɛ a cɛ sirilan ye, kantigiya na kɛ ka a cɛ siri.
[6] O tuma la suruku ni sagaden na kɛ sigiɲɔgɔnw ye. Waraninkalan ni baden na da ɲɔgɔn kɛrɛ fɛ. Misiden ni warabaden ani misiba na balo ɲɔgɔn fɛ. Denmisɛn na kɛ u gɛnbaa ye.
[7] Misi ni ursi wara na dumuni kɛ ɲɔgɔn kɔrɔ, u denw na da ɲɔgɔn kɛrɛ fɛ. Waraba na bin dun i ko misi.
[8] Deɲɛnin na tulɔn kɛ fɔnfɔnnin wo da la. Den da bɔlen sin na, o na a bolo da dankala dogo yɔrɔ la.
[9] Fɛn si tɛna tɔɔrɔ wala tiɲɛnni kɛ ne ka kulu senuma yɔrɔ si la tun, k'a masɔrɔ dugukolo na fa Matigi dɔnniya la i ko kɔgɔji dingɛ fara ji la cogo min na.
[10] O don na Isayi dili na kɛ i ko darapo min kɔrɔtalen bɛ mɔgɔw ye. Siyaw na segin a ma, a nɔɔrɔ na a sigiyɔrɔ bɛɛ fa.
[11] O don na Matigi na a bolo mɔɔnɔbɔ a ka mɔgɔ tɔ tolenw ye ka u kunmabɔ, olu na kisi ka bɔ Asiri jamana ni Misira jamana ani Patros ani Kus ni Elam ni Sinear ni Hamat ani kɔgɔji gunw kan.
[12] A na darapo dɔ kɔrɔta siyaw ye ka Israɛl mɔgɔw bɔ jɔnya la. Juda bɔnsɔn minw jɛnsɛnnen bɛ dugukolo yɔrɔw bɛɛ la, a na olu bɛɛ lajɛ yɔrɔ kelen na.
[13] O tuma la Efrayim ka keleya na ban, Juda juguw na halaki. Efrayim tɛna keleya Juda la tun, Juda tɛna Efrayim koniya tun.
[14] U na jɛ ka Filisitikaw kɛlɛ tilebi yanfan fɛ, u na kɔrɔn fɛ mɔgɔw ka bolo fɛnw cɛ. U na u bolow se Edɔmkaw ni Moab bɔnsɔn ma. Amɔn bɔnsɔn na kolo u ye.
[15] Matigi na Misira Kɔgɔji Bilen ja, a na a bolo yankan baji kun na, a dafiɲɛ na o tila ka kɛ kɔji misɛn wolonwula ye fo mɔgɔ b'a tigɛ n'a ka sabara ye.
[16] A ka mɔgɔ tɔ tolen minw bɛ kisi ka bɔ Asiri bolo, siraba na dila olu ye, i ko min kɛra Israɛl bɔnsɔn ye u bɔ don na Misira jamana la.