[1] Minnɔgɔtɔw, aw bɛɛ ka na ji boyi da la. Wari tɛ minw fɛ, a' ye na sanni kɛ ka dumuni kɛ. A' ye na diwɛn ni nɔnɔ san ni wari tɛ, sɔngɔ t'a la.
[2] Dumuni min tɛ aw balo, mun kosɔn aw bɛ aw ka wari don o la? Fɛn min tɛ aw fa, mun na aw bɛ baaraba kɛ o kosɔn? A' ye aw tulo majɔ ka ne lamɛn, fɛn min ka ɲi, aw na o dun. Aw na aw sagona dumuni sɔrɔ.
[3] A' ye aw tulo majɔ ka na ne ma. Aw ka lamɛnni kɛ, aw na ɲɛnamaya. Ne na layidu wulibali ta aw ye. Ne ye layidu min ta Dawuda ye, ne na o dafa aw ye.
[4] Ne ye ale sigi ka kɛ siyaw seere ye ani u ka kuntigi ni u ka ci fɔbaa.
[5] I ma siya minw dɔn, i na olu wele ka tugu i kɔ. Siya minw ma i dɔn, olu na boli ka na i ma. U bɛ na ne kosɔn, Matigi, i ka Ala, Israɛl ka Senuma, o min ye nin bonyaba di i ma.
[6] Aw ka Matigi ɲini a sɔrɔ tuma la, aw k'a tɔgɔ wele k'a to aw kɔrɔ.
[7] Mɔgɔ jugu ka a ka sira jugu bila, mɔgɔ tilenbali ka a ka miirili juguw bila. A ka kɔsegin Matigi, an ka Ala ma, o na makari a la, k'a masɔrɔ ale bɛ yafali kɛ ka caya.
[8] K'a masɔrɔ Matigi ko: «Ne ka miiriliw ni aw ka miiriliw tɛ kelen ye. Aw ka siraw ni ne ka siraw tɛ kelen ye.
[9] K'a masɔrɔ sankolow ni dugukolo yɔrɔ ka jan ɲɔgɔn na cogo min na, ne ka siraw ni aw ka siraw ka jan ɲɔgɔn na ten. Ne ka miiriliw ni aw ka miiriliw ka jan ɲɔgɔn na ten.
[10] «Sanji ni neje bɛ jigin ka bɔ san fɛ, u tɛ kɔsegin sani u ka dugukolo sɔn, ka sumankisɛ falen ka suman di sumantigɛla ma, ka balo di dumunikɛlaw ma cogo min na,
[11] ne ka kuma min bɛ bɔ ne da la, o na kɛ ten. O tɛna kɔsegin ne ma sani a ka ne sago kɛ k'a dafa, ka ne ka ci fɔlenw kɛ.
[12] «Ɔwɔ, aw ɲagalilenba na kɔsegin, aw na kɔsegin hɛrɛ la ka bɔ jɔnya la. Kuluw ni tintinw na dɔnkili dakan bɔ aw ɲɛ fɛ. Kungo kɔnɔ jiriw bɛɛ na tɛgɛrɛ fɔ.
[13] Sipere sun na falen nwɔni sun nɔ na. Mirte sun na falen nɔnfɔn nwɔnima nɔ na. O na Matigi tɔgɔ bonya, ka kɛ taamashyɛn banbali ye min bɛ to badaa.»