[1] Kiraya kuma Misira ko la. A filɛ, Matigi sigilen bɛ sankaba tɛlima kan, a bɛ taa Misira. Misira jamana boliw na yɛrɛyɛrɛ a ɲɛ kɔrɔ, Misirakaw ja na tigɛ.
[2] Ne na Misirakaw bila ɲɔgɔn na, balimaw na ɲɔgɔn kɛlɛ, teriw na ɲɔgɔn kɛlɛ, duguw na wuli ɲɔgɔn kama, masayaw na wuli masaya kama.
[3] Misirakaw ja na tigɛ, ne na u ka ko latigɛlenw tiɲɛn. O tuma la Misirakaw na u ka boliw ni u ka dɔnbaaw ni u ka su kililaw ni u ka filɛlikɛlaw ɲininka.
[4] Ne na Misirakaw don kuntigi farinma bolo, masakɛ jugu farinma na u mara, Kɛlɛbolow Matigi ko ten.
[5] Kɔgɔji na dɛsɛ, bajiw na jigin ka ja.
[6] Bajiw kasa na bɔ, Misira bajalanw na jigin ka ja, burugu ni bin nugu na ban.
[7] Saga gɛn yɔrɔw ni foro sɛnɛ yɔrɔ minw bɛ ba da la, olu na fɔsɔnfɔsɔn ka ja ka kɛ buguri ye.
[8] Ba mɔnnaw na kasi, minw bɛ dɔlen fili Nil baji la, olu na ɲɛnasisi. Jila jɔ fililaw jigi na tigɛ.
[9] Minw bɛ lenfu fini dila ani minw bɛ fini mugu jɛ da, olu hakili na ɲaami.
[10] U ka samasenw na karikari, bolo la baarakɛlaw bɛɛ dusu na kasi.
[11] Zoan kuntigiw hakili tiɲɛnna. Faraon ka laadibaa hakilimanw kɛra hakilintanw ye. Aw dun b'a fɔ Faraon ye cogo di ko aw kɛra hakilitigi denkɛw ye, ko aw kɛra fɔlɔ masakɛw denkɛw ye?
[12] Faraon, i ka hakilitigiw bɛ min? Kɛlɛbolow Matigi ye min latigɛ Misira kama, olu ka o fɔ i ye ka o jira i la sisan.
[13] Zoan kuntigiw hakili tiɲɛnna, Nof kuntigiw lafilila. Kafotigiw ye Misira lafili.
[14] Matigi ye ɲɛnamini bila u la. U ye Misira lafili ni u ka ko kɛtaw ye, i ko dɔlɔtɔ bɛ talontalon ka fɔɔnɔ cogo min na.
[15] Kunkolo bɛ min kɛ, kukala bɛ min kɛ, ntamaro sun ni burugu bɛ min kɛ, Misirakaw tɛna se ka o si kɛ.
[16] O don na Misirakaw na kɛ i ko musow. U na yɛrɛyɛrɛ ka siran ni Kɛlɛbolow Matigi ye a bolo kɔrɔta k'a yigiyigi u kama.
[17] O tuma la Juda na kɛ siranfɛnba ye Misira ɲɛ na. Ni a tɔgɔ fɔra u ɲɛ na tuma o tuma, Misira na siran Kɛlɛbolow Matigi ka ko latigɛlenw kosɔn a kama.
[18] O don na Misira jamana dugu duuru na Kanan jamana kan fɔ ka u kali ko u na kɛ tilennenw ye Kɛlɛbolow Matigi ye. O duguw la kelen tɔgɔ na wele ko Halaki Dugu.
[19] O don na saraka bɔlan dɔ na bila Matigi ye Misirakaw cɛma. Samasen dɔ na jɔ Matigi ye a dancɛ la.
[20] Ni Misirakaw kasira Matigi nɔ fɛ u tɔɔrɔbaw kosɔn tuma min na, o na kɛ taamashyɛn ye Kɛlɛbolow Matigi ye. Matigi na kisibaa ni kuntigi ci ka u kisi.
[21] Matigi na a yɛrɛ jira Misirakaw la, o don na Misirakaw na Matigi dɔn. U na batoli kɛ a tɔgɔ la ka u ka sarakaw ni nili fɛnw lase a ɲɛ kɔrɔ. U na u dafale Matigi la ka o saraka bɔ.
[22] Matigi na Misirakaw gosi, a na u gosi ka u kɛnɛya. U na kɔsegin Matigi ma. A na sɔn u ka deliliw ma ka u kɛnɛya.
[23] O don na siraba dɔ na bɔ Misira ka taa Asiri jamana la. Asirikaw bɛ na Misira, Misirakaw na taa Asiri jamana la. Asirikaw ni Misirakaw na baara kɛ Matigi ye.
[24] O don na Israɛl na fara Misira ni Asiri kan. O jamana saba na kɛ dubadenw ye jamana tɔw cɛma.
[25] Kɛlɛbolow Matigi na duba u ye ko: «Hɛrɛ ka kɛ ne ka mɔgɔw Misirakaw ye ani ne bolo baara nɔ Asirikaw ani ne ka ciyɛn Israɛl bɔnsɔn.»