[1] Matigi ko: «Ne ye furusa sɛbɛn min di i ba Jerusalɛm ma ka a furu sa, o sɛbɛn bɛ min? Mɔgɔ jumɛn ka juru tun bɛ ne la, ni ne ye aw di o tigi ma ka kɛ jɔnw ye ka o juru sara? Aw k'a dɔn ko aw feerela aw ka tilenbaliya kow kosɔn, aw ba labilara aw ni ale ka murutili kosɔn.
[2] Ne nalen, mun kosɔn mɔgɔ si ma sɔrɔ ka ne ladon? Ne ye aw wele tuma min na, mun y'a to aw si ma ne jaabi? Yala ne bolo ka surun fo a tɛ se ka aw tila wa? Yala barika tɛ ne fɛ ka aw kisi wa? Kɔgɔji bɛ ja ne ka kɔrɔfɔli kosɔn, ne bɛ bajiw yɔrɔw yɛlɛma ka kɛ gwele ye. A kɔnɔ jɛgɛw bɛ sa minnɔgɔ fɛ, u bɛ toli jintaɲa kosɔn.
[3] Ne bɛ sanfin yɔrɔw bɛɛ la, ka sankolow datugu ni cafu fini finman ye.»
[4] Matigi Ala ye ne kalan kuma cogo la, walisa ne ka se ka kuma ka barika di mɔgɔ dɛsɛlenw ma. A bɛ ne lakunun sɔgɔma o sɔgɔma, ka ne tulo diya walisa ne ka lamɛnni kɛ, i ko kalanden bɛ lamɛnni kɛ cogo min na.
[5] Ɔwɔ, Matigi Ala ye ne tulo dayɛlɛ, ne ma ban, ne ma segin kɔ.
[6] Ne ye ne kɔ di ne gosibaa ma, ka ne tama jɔ ne bonbonsi tufabaaw ye. Minw ye ne mafiɲɛya ka u daji tu ne kan, ne ma ne ɲɛda cɛ ka bɔ olu kɔrɔ.
[7] Matigi Ala na ne dɛmɛ, o de kosɔn ne tɛna maloya. O de y'a to ne ye ne ɲɛkolo gɛlɛya i ko kɛrɛbɔ fara, k'a masɔrɔ ne y'a dɔn ko ne tɛna maloya.
[8] Min bɛ jo di ne ma, o ka surun ne la. Jɔn bɛ se ka ne kiri? An ka taa ɲɔgɔn fɛ kiritigɛla yɔrɔ. Ne jugu ye jɔn ye? O ka gɛrɛ ne la.
[9] Ɔwɔ, Matigi Ala bɛ ne dɛmɛ. Jɔn dun bɛ se ka ne jalaki? U bɛɛ na kɔrɔ ka koloɲa i ko dulɔki, ntumu na u ɲimi ka u ban.
[10] Aw la jumɛn bɛ siran Matigi ɲɛ k'a ka jɔnkɛ kan minɛ? Mɔgɔ min bɛ taama dibi la ni kɛnɛ tɛ a ka sira la, o ka a jigi da Matigi kan, ka a jigi da a ka Ala kan.
[11] Nka aw minw bɛ tasuma mana, ka aw fan bɛɛ kɛ kɛnɛ ye ka taama yeelen na, aw yɛrɛ na bi aw ka yeelenw cɛma. Ne bolo na o ko jugu bɛɛ lase aw ma, o de y'a to aw laban ko na juguya.