[1] E min bɛ tiɲɛnni kɛ k'a sɔrɔ u ma i tiɲɛn, e min bɛ janfali kɛ k'a sɔrɔ u ma i janfa, bɔnɛ bɛ i ye. Ni i tilara tiɲɛnni la tuma min na, i yɛrɛ na tiɲɛn. Ni i tilara janfali la, i fana na janfa.
[2] E Matigi, i ka makari an na. An jigi bɛ i kan. I ka kɛ an barika ye sɔgɔma o sɔgɔma ka an kisi an ka tɔɔrɔ kow ma.
[3] I pɛrɛnna tuma min na, mɔgɔw bolila, i wulila tuma min na, siyaw jɛnsɛnna.
[4] Aw bolo fɛn na cɛ i ko ntɔnw bɛ foro dun cogo min na. Mɔgɔw na firi a kan i ko ntɔnw bɛ jigin foro kɔnɔ cogo min na.
[5] Matigi ye masaba ye sabu a sigilen bɛ san fɛ. A na Sion fa tiɲɛ ni tilennenya la.
[6] Lafiya na sɔrɔ i si tilew la. I ka kisili ji boyi na kɛ hakilitigiya ni dɔnniya ye. Matigi ɲɛsiran na kɛ i ka nafoloba ye.
[7] A filɛ, cɛ ja gɛlɛnw bɛ kasi dugu bɔlɔnw na. Hɛrɛ cidenw bɛ kasi kosɛbɛ haali.
[8] Siraw bɛɛ lankoloɲara, mɔgɔ si tɛ tɛmɛn o siraw fɛ tun. Jugu ye layidu tiɲɛn, a ye dugubaw mafiɲɛya, a tɛ mɔgɔ si jate tun.
[9] Dugukolo bɛɛ bɛ ɲɛnasisi ka nwunankan bɔ. Liban maloyara, a jiritu fɔsɔnfɔsɔnna, Saron jɛkɛnɛ kɛra i ko kungokolon jalan. Basan jamana ni Karmɛl kulu kan jiri furaw bɔnna.
[10] Matigi ko: «Ne na wuli sisan, ne na bonya sisan. Ne ka masaya na kɔrɔta sisan.
[11] Aw ye bin kɔnɔ ta, aw na bin ɲaga bange. Aw dafiɲɛ na kɛ jenili tasuma ye.
[12] Mɔgɔw na jeni ka kɛ laso ye. U na kɛ i ko nwɔni tigɛlen min bɛ jeni tasuma la.
[13] «Aw minw yɔrɔ ka jan, ne ye min kɛ, aw ka o lamɛn. Aw minw yɔrɔ ka surun, aw ka ne ka sebaaya dɔn.»
[14] Sion jurumukɛlaw bɛ yɛrɛyɛrɛ, Ala ɲɛsiranbaliw ja tigɛra. U b'a fɔ ko: «An la jumɛn ɲɛnama bɛ se ka to nin tiɲɛnni tasumaba kɔrɔ? An la jumɛn bɛ se ka jɔ nin tasuma mana banbali kɔrɔ?»
[15] Mɔgɔ min bɛ tilennenya sira taama ka kuma ni jɛlenya ye, min mago tɛ tɔnɔ jugu la, min bɛ a bolo firifiri walisa a kana surɔ fɛn minɛ, min bɛ a tulo tugu walisa a kana mɔgɔ fagali kuma mɛn, ani min bɛ a ɲɛ tugu walisa a kana ko jugu ye,
[16] o tigi na sigi yɔrɔ kɔrɔtalen na. Farakurun jamanjanw na kɛ a ka kɛlɛ kunbɛn kogo ye. Dumuni na di a ma, a ka minni ji tɛna dɛsɛ.
[17] I ɲɛ na masakɛ ni a cɛɲɛ ye, i ɲɛ na jamana bonya ni a janya bɛɛ ye.
[18] I hakili na jigin sira ko tɛmɛnnenw na. Sɛbɛnnikɛla min tun bɛ an ka nisɔngɔ ko fɔ, o bɛ min? Min bɛ nisɔngɔ wari minɛ, o bɛ min? Min bɛ Jerusalɛm kɛlɛ kunbɛn sow jate, o bɛ min?
[19] I tɛna o mɔgɔ kuncɛba farinmaw ye tun, olu minw bɛ kan wɛrɛ fɔ, ni i tɛ u kumakan faamu, minw ka kuma ma jɛya, ni i tɛ u faamu.
[20] I ka Sion filɛ, an ka ɲɛnajɛ dugu. I ɲɛ ka Jerusalɛm filɛ, sigiyɔrɔ lakanalen don, finiso min tɛ se ka wuli, o don. A bɔlɔw tɛ se ka bɔ, a juruw tɛ se ka tigɛ.
[21] Matigi na a ka sebaayaba jira an na yen. Bajiw ni kɔbaw na kɛ yen. Kɛlɛkɛ kurunbaw tɛna tɛmɛn yen, kurunba tɛna jikan taama kɛ yen.
[22] Ɔwɔ, Matigi ye an ka kiritigɛla ye, Matigi ye an ka sariya sigibaa ye. Matigi ye an ka masakɛ ye, ale na an kisi.
[23] I ka jurukisɛw fonina, sanfɛ jiri bɛ lamaga. U ma se ka kurun fini walanwalan. Ayiwa, an na fɛn cɛlenw tilatila. Sen kelenw fana na taa fɛnw cɛ.
[24] Jerusalɛmka si tɛna a fɔ ko: «Ne man kɛnɛ.» Sion kɔnɔ mɔgɔw ka tilenbaliya kow na yafa u ma.