[1] Ayiwa Matigi ko: «Ko min bɛnnen bɛ, aw ka o kɛ. Ko min tilennen bɛ, aw ka o sira taama k'a masɔrɔ ne ka kisili bɛ na sɔɔni. Ne ka tilennenya na a yɛrɛ jira.
[2] Mɔgɔ min bɛ ne sago kɛ, Hadamaden min bɛ ne ka sira taama ni kantigiya ye ka ne ka lafiɲɛ don bila, ni a tɛ o tiɲɛn, ni a bɛ a bolo kɔlɔsi ko jugu sifa bɛɛ kɛli ma, o tigi ye dubaden ye.»
[3] Jamana wɛrɛ mɔgɔ min nɔrɔlen bɛ Matigi la, o kan'a fɔ ko: «Matigi tɛ sɔn ne ka gɛrɛ a ka mɔgɔw la.» Cɛ kɔbɔlen kan'a fɔ ko: «Ne ye jiri jalen ye,»
[4] k'a masɔrɔ Matigi ko: «Cɛ kɔbɔlen minw bɛ ne ka lafiɲɛ don bila ka ne sago ɲɛnatɔmɔ ka sɔn ne ka layidu ma, ne na olu kɛ taamashyɛn ye ne ka so kɔnɔ ani ne ka lamini kogow la,
[5] ka tɔgɔ di u ma min ka fisa ni denkɛ ni denmuso caman ye. Ne na tɔgɔ banbali di u ma min tɛ tunun.»
[6] Jamana wɛrɛ mɔgɔ minw bɛ u nɔrɔ Matigi la ka baara kɛ a ye ka Matigi kanu walisa ka kɛ a ka baaradenw ye, Matigi b'a fɔ olu ye ko: «Minw bɛ lafiɲɛ don bila ka ne ka layidu mara,
[7] ne na taa ni olu ye ne ka kulu senuma kan, ka olu fa ɲagali la ne delili so kɔnɔ. U ka saraka jenitaw ni u ka saraka fagataw na minɛ ne ka saraka bɔlan kan, katuguni ne ka so na wele ko: ‹Siyaw bɛɛ ka Ala deli so.›»
[8] Matigi, Ala yɛrɛ, min bɛ Israɛl jɛnsɛnnenw bɛɛ lajɛ yɔrɔ kelen na, o ko: «Ne na dɔ wɛrɛw lajɛ ka fara ne yɛrɛ ka mɔgɔ lajɛlenw kan.»
[9] Aw kungo sogow, aw bɛɛ ka gɛrɛ yan na. Kungo waraw, aw bɛɛ ka na ka dumuni kɛ.
[10] Israɛl bɔnsɔn ka kɔlɔsilikɛlaw bɛɛ kɛra fiyentɔw ye, u tɛ foyi kɔlɔsi. U bɛɛ bɛ i ko wulu bobo min tɛ se ka kasi. U dalen bɛ sunɔgɔ ka sugo. Sunɔgɔ ka di u ye.
[11] U ye wulu nuguma fabaliw ye. Saga gɛnna hakilintanw don. U bɛɛ bɛ taa u yɛrɛw sagona yɔrɔw la ka u yɛrɛw nafa ɲini. U bɛɛ ka kan.
[12] U b'a fɔ ko: «A' ye na an ka dɔlɔ min ka an fa minni fɛn farinmaw la. An na dumuni ɲuman kɛ sini ka tɛmɛn bi ta kan.»