[1] Aw ka Ala ko: «Aw ka ne ka mɔgɔw dusu saalo, aw ka ne ka mɔgɔw dusu saalo.
[2] Aw ka kuma Jerusalɛmkaw fɛ k'a fɔ u ye ko, u ka tɔɔrɔ waati dafara, ko u ka tilenbaliya kow yafara u ma, ko ne ye u ka jurumu kafari siɲɛ fila.»
[3] Pɛrɛnkan bɔra ko: «Aw ka sira labɛn Matigi ye kungokolon kɔnɔ, ka siraba dakɛɲɛ an ka Ala ye jamana jalen na.
[4] Kulu furancɛw na lafa, kuluw ni tintinw bɛɛ na dalakɛɲɛ. Yɔrɔ kɔrɔtalenw na dalakɛɲɛ, jiginjigin juguw na dakɛɲɛ.
[5] O tuma la Matigi nɔɔrɔ na jigin, Hadamadenw bɛɛ na o ye ɲɔgɔn fɛ, k'a masɔrɔ Matigi da ye o fɔ.»
[6] Ne ye kumakan dɔ mɛn ko: «I ka welewele da.» Ne y'a jaabi ko: «Ne ka mun fɔ?» A ko, i ka pɛrɛn ko: «Hadamaden bɛɛ bɛ i ko bin, u nɔɔrɔ bɛɛ bɛ i ko kungo kɔnɔ baga feere.
[7] Ni Matigi ye bin fyɛ ni a dafiɲɛ ye tuma min na, a bɛ ja, a feere bɛ fɔsɔnfɔsɔn. Ɔwɔ, mɔgɔ bɛɛ bɛ i ko bin feere.
[8] Bin bɛ ja, a feere bɛ fɔsɔnfɔsɔn, nka an ka Ala ka kuma bɛ to badaa.»
[9] Sion, i ka yɛlɛn kulu jan san fɛ ka kibaru duman fɔ. Jerusalɛm, i ka pɛrɛn ni kanba ye ka kibaru duman fɔ. I kana siran, i ka i kan bonya, k'a fɔ Juda bɔnsɔn ye ko: «Aw ka Ala filɛ.»
[10] Matigi Ala natɔ filɛ ni sebaayaba ye. A na kuntigiya kɛ ni a bolo barikama ye. A bɛ na ni a ka baraji ye, a ka tɔɔrɔ nafa bɛ a bolo.
[11] A na a ka sagaw balo i ko saga gɛnna. A na sagadenw minɛ a bolo la ka u ta a kɔnkɔn na. A na saga denbatigiw ɲɛ minɛ nɛmɛnɛmɛ.
[12] Jɔn ye kɔgɔjiw cɛ a tɛgɛ kɔnɔ, ka sankolow suma ni a sibiri ye? Jɔn ye dugukolo buguri suma ni mure ye, jɔn ye kuluw pese ni sumanikɛlan ye ka tintinw pese kilo la?
[13] Jɔn ye Matigi Ni sɛgɛsɛgɛ, wala k'a kalan ka laadili di a ma?
[14] A ye laadili sɔrɔ jɔn fɛ, jɔn ye hakili di a ma k'a kalan tilennenya sira la? Jɔn ye a kalan dɔnniya la, ka hakilitigiya sira jira a la?
[15] Aw k'a dɔn ko siyaw bɛɛ bɛ i ko jifilen kɔnɔ ji toni ko kelen, i ko bugurikisɛ kelen bɛ sumanikɛ ja kan cogo min na. Kɔgɔji dala jamanaw bɛ ale ɲɛ na i ko gwangwan.
[16] Liban jiri bɛɛ tɛ saraka jeni dɔgɔ bɔ, a baganw bɛɛ tɛ a ka saraka jenitaw bɔ.
[17] Siyaw bɛɛ bɛ Matigi ɲɛ na i ko fuu, u tɛ foyi ye a ɲɛ na.
[18] Jɔn ni Ala bɛ suma ɲɔgɔn na? Bato fɛn jumɛn bɔlen bɛ a fɛ?
[19] Walekɛla bɛ nɛgɛ yeele ka boli dila. Sanu faga numu bɛ sanu da a kan ka warijɛ jɔlɔkɔ nɔrɔ a la.
[20] Faantan min tɛ se ka o ɲɔgɔn sɔrɔ, o bɛ jiri tolibali dɔ ɲini, ka maɲɛrɛ dɔnna dɔ ɲini, o ka bato fɛn dɔ dila min bɛ jɔ ko ɲuman.
[21] Aw tɛ faamuli kɛ wa? Aw tɛ mɛnni kɛ wa? Aw ma o ko mɛn kabini fɔlɔfɔlɔ wa? Aw ma miiri dugukolo ju sigi ko la wa?
[22] Min sigilen bɛ dugukolo koolilen san fɛ, dugukolo kan fɛnw bɛɛ bɛ o ɲɛ na i ko ntɔnw. Ale ye sankolo fɛnsɛ i ko finiba ka a kɛ i ko finiso, ka sigi a kɔnɔ.
[23] A bɛ faamaw kɛ fɛn fufafu ye, ka dugukolo kan kiritigɛlaw kɛ fuu ye.
[24] U turula sisan, u danna sisan, u dili ma don kosɛbɛ. Matigi ye a dafiɲɛ kɛ ka u fyɛ, u jara. Fiɲɛba bɛ na u ta i ko bin ɲaga.
[25] Senuma ko: «Aw dun bɛ ne ni mun kɛɲɛ? Aw bɛ ne ni fɛn jumɛn suma ɲɔgɔn na?
[26] A' ye aw ɲɛ kɔrɔta ka sanfɛlan filɛ, jɔn dun ye dolow da? Ale de b'a to o kɛlɛbolow bɛ taama ɲɔgɔn fɛ, a bɛ u bɛɛ kelen-kelen wele u tɔgɔw la. A ka sebaayaba ni a fangaba kosɔn, hali kelen tɛ u jɛ.»
[27] Yakuba, mun kosɔn i bɛ kuma? Israɛl, mun kosɔn i b'a fɔ ko: «Ko minw bɛ kɛ ne la, Matigi ɲɛ tɛ olu la, ne ka kan ka jo sɔrɔ sira min fɛ, a tɛ o jate?»
[28] I ma a dɔn wa? I ma a mɛn wa? Matigi ye Badaa Fa ye, ale de ye dugukolo yɔrɔw bɛɛ da. A barika tɛ ban, a tɛ sɛgɛn, dan tɛ a hakili la.
[29] A bɛ se di mɔgɔ barika bannen ma, ka barikantanw barika bonya.
[30] Kamalen misɛnw barika bɛ dɛsɛ, u bɛ sɛgɛn. Kamalen kɔrɔw bɛ talon, u bɛ bi.
[31] Nka mɔgɔ minw bɛ u jigi da Matigi kan, olu bɛ barika kura sɔrɔ. U bɛ pan ka taa san fɛ ni kamanfuraw ye i ko bɔn, u bɛ boli, u tɛ sɛgɛn, u bɛ taama, u barika te ban.