[1] Kiraya kuma kɔgɔji da la kungoba ko la. Worodugu yanfan fiɲɛba bɛ na ka tɛmɛn cogo min na, mɔgɔ bɛ siran jamana min ɲɛ, jugu bɛ bɔ o kungokolon na ka tiɲɛnni kɛ ten.
[2] Yeli fɛn siranfɛnba jirala ne la. Halakilikɛla bɛ halakili kɛ, tiɲɛnnikɛla bɛ tiɲɛnni kɛ. Elamkaw, aw ka yɛlɛn ka kɛlɛ kɛ. Medekaw, aw ka daga sigi. Ne na nwunan kow bɛɛ ban.
[3] O de kosɔn ne solo bɛ ne dimi kosɛbɛ. Ne tɔɔrɔlen bɛ i ko muso tintɔ. Ne kurulen bɛ fo ne tɛ se ka foyi mɛn. Ne ja tigɛra fo ne tɛ se ka foyi ye.
[4] Ne dusu kasilen don, siranba ye ne ja tigɛ. Ne ɲɛnajɛ su kɛra ne lasiran su ye.
[5] Dumuni bɛ labɛn k'a sɔrɔ kɔlɔsilikɛla b'a ɲɛ na. Dumuni bɛ kɛ, minni bɛ kɛ. Kɛlɛ kuntigiw, aw ka wuli ka tulu kɛ aw ka nɛgɛ bɛnnanw na.
[6] Matigi y'a fɔ ne ye ko ne ka taa kɔlɔsilikɛla sigi, ko a bɛ min ye, a ka o fɔ.
[7] Ni a ye kɛlɛkɛ sotigiw fila-fila ye ɲɔgɔn kɛrɛ fɛ ani mɔgɔ minw yɛlɛnna faliw kan ani minw yɛlɛnna ɲaamɛw kan, a ka kɔlɔsili kɛ kosɛbɛ ka a janto a la.
[8] Kɔlɔsilikɛla pɛrɛnna ko: «Matigi, ne ye tile bɛɛ kɛ ka kɔlɔsili kɛ kɛlɛ kunbɛn kogo san fɛ i ko waraba. Ne jɔlen ye su bɛɛ kɛ ne ka yɔrɔ la.»
[9] Sotigiw bɛ na, u fila-fila bɛ ɲɔgɔn kɛrɛ fɛ. U la kelen pɛrɛnna ko: «A bira, a bira. Babilonɛ bira. A ka bato fɛn jaw bɛɛ karikarila duguma.»
[10] Ne ka mɔgɔw, aw minw gosira gendekɛnɛ la i ko ɲɔ, ne ye min mɛn Kɛlɛbolow Matigi, Israɛl ka Ala da la, ne ye o fɔ aw ye.
[11] Kiraya kuma Duma ko la. Kulokan sera ne ma ka bɔ Seir, ko: «Kɔlɔsilikɛla, su tɔ ka bon wa? Kɔlɔsilikɛla, su tɔ ka bon wa?»
[12] Kɔlɔsilikɛla ko: «Dugu bɛ jɛ, nka su bɛ ko fana. Ni aw b'a fɛ ka ɲininkali kɛ, aw ka ne ɲininka. Aw ka na ko kura.»
[13] Kiraya kuma Arabi jamana ko la. Dedan taamabaaw jamaba, aw na si Arabi jamana kungo kɔnɔ.
[14] Tema jamana mɔgɔw, aw ka minnɔgɔtɔw kunbɛn ka ji di u ma. Aw ka taa mɔgɔ bolitɔw kunbɛn ni dumuni ye.
[15] K'a masɔrɔ u bɛ boli npan ɲɛ, u bɛ boli npankisɛ ni kala samalen ni kɛlɛ jugu ɲɛ.
[16] Matigi y'a fɔ ne ye ko kura ko: «San wɛrɛ ɲan tuma Kedar nɔɔrɔ na ban.
[17] Kedar bɔnsɔn kɛlɛkɛ cɛ bonnikɛ kalatigiw dama na dɔgɔya.» K'a masɔrɔ Matigi, Israɛl ka Ala ko ten.