[1] Akaz fa tun ye Jotam ye, Jotam fa tun ye Oziasi ye. Juda ka masakɛ Akaz tile la, Siri masakɛ Rezɛn ani Israɛl bɔnsɔn ka masakɛ Remalia denkɛ Peka taara Jerusalɛm kama ka a kɛlɛ, nka u ma se ka a minɛ.
[2] A kibaru taara fɔ Dawuda ka so ye ko Sirikaw kamalilen bɛ Efrayim bɔnsɔn ka yɔrɔ la ka ban. O tuma la masakɛ Akaz ni a ka mɔgɔw dusu yɛrɛyɛrɛla i ko kungo kɔnɔ jiriw bɛ lamaga fiɲɛ fɛ cogo min na.
[3] O tuma la Matigi y'a fɔ Esayi ye ko: «E ni i denkɛ Sear-Jasub ka bɔ ka taa Akaz kunbɛn san fɛ bajalan sira dan na, fini ɲɛgɛn yɔrɔ sira la,
[4] k'a fɔ a ye ko: ‹I hakili sigi ka i ja gɛlɛya. I kana siran foyi ɲɛ, i ja kana tigɛ o dɔgɔ bolo fila sisi bɔtɔ ɲɛ, Siri masakɛ Rezɛn ni Remalia denkɛ ka dimiya kɔni.
[5] A jɛlen don ko Sirikaw ni Efrayim ni Remalia denkɛ ye dabali jugu labɛn i kama.
[6] U ko, u bɛ wuli Juda kama k'a gosi ni siran kow ye ka a dugu lamini kogow kari ka Tabeɛl denkɛ sigi yen ka kɛ masakɛ ye.›
[7] Nka ne, Matigi Ala ko: ‹O lasiranni kumaw kana i ja tigɛ, o tɛna kɛ.
[8] K'a masɔrɔ Sirikaw ka duguba ye Damasi ye, Damasi tigi ye Rezɛn ye. Efrayim ka duguba ye Samari ye, Samari tigi ye Remalia denkɛ ye. San biwɔɔrɔ ni duuru ɲinan kɔ, Efrayim tɛna kɛ siya ye tun. Ni aw ma da o la, aw tɛna sabati tun.›»
[10] Matigi ye ci wɛrɛ fɔ Akaz ye ko:
[11] «I ka Matigi, i ka Ala deli ko a ka taamashyɛn dɔ jira i la ka bɔ mɔgɔ suw cɛma dugukolo jukɔrɔ wala ka bɔ san fɛ sankolo la.»
[12] Akaz y'a jaabi ko: «Ne tɛna delili si kɛ, ne t'a fɛ ka Matigi kɔrɔbɔ.»
[13] O tuma la Esayi ko: «Dawuda ka so, aw ka lamɛnni kɛ. Aw ye nin mɔgɔw sɛgɛn, o ye fɛn fitinin ye aw ɲɛ na wa? Aw b'a fɛ ka ne ka Ala fana sɛgɛn wa?
[14] Ayiwa, Matigi yɛrɛ de na taamashyɛn dɔ jira aw la, o filɛ nin ye, ko npogotigi na kɔnɔ ta ka denkɛ bange. O tɔgɔ na da ko Emanuɛl.
[15] O na balo ni nare ni di ye fo ka taa se ko jugu ni ko ɲuman faranfasi dɔnni ma.
[16] Nka sani o den ka ko jugu dɔn ka o to yen ka ko ɲuman ɲɛnatɔmɔ, i bɛ siran jamana min ka masakɛ fila ɲɛ, o jamana na halaki.
[17] Matigi na tɔɔrɔba dɔ lase e ni i ka mɔgɔw ni masaya so ma min ka jugu ka tɛmɛn Efrayim ni Israɛl farali waati ta kan, a na Asiri masakɛ bila ka na o kɛ.»
[18] O don na, Matigi na dimɔgɔw wele ka bɔ Misira bajiw dan na ni a dala file ye. Dikisɛw bɛ na ka bɔ Asiri jamana la.
[19] Olu bɛ na ka u fɛnsɛ kungokolon jɛkɛnɛ yɔrɔw bɛɛ la ani faraw kan ani jirisunw ani tu nwɔnimaw bɛɛ ni bin nugu yɔrɔw bɛɛ la.
[20] O don na, Matigi na kundi muru dɔ ɲini ka bɔ Ufrate ba kɔ fɛ, o kundi muru ye Asiri masakɛ ye. Matigi na aw kunsigi di ka aw senkala si ni aw bonbonsi di.
[21] O don na, mɔgɔw bɛɛ kelen-kelen na misi geren kelen ni sagamuso fila balo.
[22] Olu na nɔnɔ caman bɔ, u marabaaw tɛna fɛn wɛrɛ dun nare dama kɔ, k'a masɔrɔ mɔgɔ tɔ tolen minw bɛ jamana kɔnɔ, olu na balo nare ni di la.
[23] O don na, rezɛn sun waa kelen na kɛ foro min na, ni o wari ye warijɛ sikle waa kelen ye, nɔnfɔnw ni nwɔniw na o yɔrɔ minɛ.
[24] Mɔgɔw bɛ taa ni biɲɛkisɛw ni kalaw ye yen, k'a masɔrɔ jamana yɔrɔw bɛɛ na kɛ nɔnfɔnw ni nwɔniw ye.
[25] Mɔgɔ tun bɛ kulu minw sɛnɛ, mɔgɔ si tɛna yɛlɛn olu la nɔnfɔnw ni nwɔniw ɲɛsiran kosɔn, nka u na kɛ misi gɛn yɔrɔw ni saga gɛn yɔrɔw ye.