[1] Matigi ko: «Bɔnɛ bɛ aw ye, denmisɛn murutilenw, aw bɛ kow ɲɛnabɔ, nka aw tɛ ne ɲininka. Aw bɛ layidu ta k'a sɔrɔ ne sen tɛ o la, ka jurumu fara jurumu kan.
[2] Aw bɛ taa Misira ka Faraon fanga kɛ aw jigisɛmɛ yɔrɔw ye, ka aw dogo Misira suma kɔrɔ, k'a sɔrɔ aw ma ne ɲininka.
[3] Faraon fanga na kɛ aw maloya ko ye. Aw b'a fɛ ka aw dogo Misira suma min kɔrɔ, o na yɛlɛma ka kɛ aw maloya sababu ye.
[4] Juda bɔnsɔn kuntigiw sera Zoan ka ban, u ka cidenw sera Hanes,
[5] nka Juda bɔnsɔn na maloya o siya nafantanw ɲɛ kɔrɔ. U tɛ dɛmɛni si di u ma, u tɛna nafa si don u la, nka u na kɛ u maloya ni u kunna siri sababu ye.»
[6] Kiraya kuma worodugu yanfan waraw ko la. Tɔɔrɔ ni degun bɛ yen. Waraba muso ni waraba cɛ ni fɔnfɔnnin ani sa pantaw bɛ jamana min na, u bɛ o cɛ tigɛ ka taa ni u bolo fɛn sɔngɔ gɛlɛnw ye faliw ni ɲaamɛw kan, ka taa ni u ka nafoloba ye ka o bɛɛ di mɔgɔ nafantanw ma.
[7] Misira jamana ka dɛmɛni tɛ foyi ye kuncɛbaya ni fɛn fuu kɔ. O de kosɔn ne y'a fɔ nin ko la ko: «Mankanba min tɛ foyi ɲɛ.»
[8] I ka taa ka nin kumaw sɛbɛn walaha kan u ɲɛ kɔrɔ sisan. I ka u sɛbɛn kitabu kɔnɔ, walisa u k'a sɔrɔ yen don nata la, i ko seereya banbali.
[9] K'a masɔrɔ nin siya ye siya murutilen ye. Denmisɛn nkalontigɛlaw don, denmisɛn minw t'a fɛ ka Matigi ka sariya lamɛn.
[10] U b'a fɔ yelikɛlaw ye ko: «Aw kana yeli kɛ,» k'a fɔ kiraw ye ko: «Aw kana kiraya kɛ an ko la ka tiɲɛ fɔ. Nka aw ka kuma nugulenw dama fɔ an ye, aw ka kuma dumanw dama fɔ an ye.
[11] Aw ka bɔ sira ɲuman kan, aw ka fara ka sira tilennen bila, ka Israɛl ka Senuma mabɔ an na.»
[12] O de kosɔn Israɛl ka Senuma ko: «Aw ye ne dɔgɔya ka aw jigi da fanga digili ni nanbara kan ka aw sinsin u kan.
[13] O de kosɔn aw ka tilenbaliya ko kɛra i ko kogo jamanjan cilen bitɔ, min bɛ tɛliya ka bi.
[14] A na ci, i ko bɔgɔ daga bɛ ci cogo min na. A na ɲɔɲɔ, a tɔ tɛna to yen. Hali ntɛgɛnɛ kelen tɛna sɔrɔ a la ka tasuma cɛ gwa kɔnɔ wala ka ji soli faa kɔnɔ.»
[15] O de kosɔn Matigi Ala, Israɛl ka Senuma ko: «Aw ka kɔsegin ne ma ka aw yɛrɛw majigin, aw na kisi. Sabali ni jigi sigileɲa ka kɛ aw barika ye, nka aw ma sɔn.»
[16] Aw ko ayi, ko aw na yɛlɛn sow kan ka boli. Ɔwɔ, aw na boli. Aw ko, aw na yɛlɛn so sen dumanw kan, o de y'a to minw bɛ aw nɔgɛn, olu ka sow sen na diya ka tɛmɛn aw taw kan.
[17] Mɔgɔ waa kelen na boli mɔgɔ kelen ka kangari dali ɲɛ. Aw na boli mɔgɔ duuru ka kangari dali kosɔn fo aw na kɛ i n'a fɔ jiri jan taamashyɛnma kulu kan, i n'a fɔ darapo min sirilen tora tintin kan.
[18] O bɛɛ n'a ta Matigi bɛ aw makɔnɔ, walisa a ka nɛɛma ka kɛ aw ye. A na wuli ka hinɛ aw la, k'a masɔrɔ Matigi ye Ala tilennen ye. Minw jigi dalen bɛ a kan, olu ye dubadenw ye.
[19] Siya min sigilen bɛ Sion, e min bɛ Jerusalɛm, i tɛna kasi tun. Ni a ye kulokan mɛn tuma min na, a na hinɛ i la. Ni i kan sera a tulo ma tuma min na, a na i jaabi.
[20] Matigi na dumuni di aw ma tɔɔrɔ waati la ka ji di aw ma minnɔgɔ waati la. Minw bɛ i kalan, olu tɛna u ɲɛ cɛ ka bɔ i la, i ɲɛ na i karamɔgɔw ye.
[21] Ni aw bɛ fara ka taa kinin wala numan fɛ, aw na a kan mɛn aw kɔ fɛ ko: «Sira filɛ nin ye, i ka taa nin fɛ.»
[22] Aw na aw ka sanu ni warijɛ boliw jate fɛn nɔgɔlenw ye ka u fili yɔrɔ jan, i ko mɔgɔ bɛ fɛn nɔgɔlen fili cogo min na. Aw n'a fɔ ko: «Bɔ ne kɔrɔ, fɛn nɔgɔlen.»
[23] Aw ye sumankisɛ minw dan dugu rɔ, Matigi na sanji lana olu kan. Dugukolo sɛnɛ suman na ɲɛ ka caya. Aw ka bagankuluw na gɛn bin nugu yɔrɔ ɲumanw la.
[24] Misiw ni fali minw bɛ sɛnɛ kɛ, olu na dumuni ɲuman sɔrɔ ka balo ko ɲuman, a fyɛlen ni lɛfɛ ni filen ye ka kɔgɔ kɛ a la.
[25] Juguw na faga don min na, ji na woyo ka bɔ kulu jamanjanw ni tintin janw bɛɛ kan. Kɛlɛ kunbɛn kogow na bi o juguw kan o don na.
[26] Ni Matigi ye a ka mɔgɔw jogindaw siri don min na, a ye u bugɔlidaw kɛnɛya don min na, kalo yeelen na bonya i ko tile yeelen. Tile yeelen na bonya siɲɛ wolonwula ka tɛmɛn sisan ta kan, a na kɛ i ko don wolonwula ta kɛnɛ.
[27] Min tɔgɔ ko Matigi, o natɔ filɛ ka bɔ yɔrɔ jan. A ka dimiya bɛ jenili kɛ ni fariya ye. A nɛnkun bɛ i ko tasuma jenili kɛtɔ.
[28] A dafiɲɛ bɛ i ko baji karilen min bɛ se fo mɔgɔ kan na. A bɛ na ka siyaw tɛntɛn ni a ka halakili tɛmɛ ye. A na karafɛ don siyaw da la walisa a ka u lafili.
[29] O tuma la aw na dɔnkili dakan bɔ i ko mɔgɔ bɛ ɲɛnajɛ su fɛ cogo min na. Aw dusukun na ɲagali i ko mɔgɔ minw bɛ yɛlɛn Matigi ka kulu kan Israɛl ka farakurun fan fɛ.
[30] Matigi kan nɔɔrɔma na mɛn. A n'a bolo barikama jira ni a ka dimiyaba ye, tasuma jenili kɛtɔ ani fiɲɛba ni sanjiba ani sanbɛlɛ farinma cɛma,
[31] k'a masɔrɔ Asiri na yɛrɛyɛrɛ Matigi kan kosɔn. A na u gosi ni a ka bere ye.
[32] Ka Ala to mɔgɔw gosili la, dunun ni nkɔni fɔkan na mɛn. O tuma la Matigi na kɛlɛ daminɛ,
[33] k'a masɔrɔ Tofɛt labɛnnen bɛ kabini tuma jan, a labɛnnen don ka Asiri masakɛ kɛlɛ. Dingɛ dunba belebele labɛnnen don, tasuma ni dɔgɔ caman b'a kɔnɔ. Matigi dafiɲɛ b'a mana i ko kiribi tasumama bɛ woyo cogo min na.