[1] Ko min fɔra an ye, jɔn dara o la? Jɔn y'a dɔn ko Matigi ka sebaaya ye nin kɛ?
[2] A bonyara Matigi ɲɛ kɔrɔ i ko jiribolo nugulen kura, a bɛ i ko jiri falennen kura, min bɔra dugukolo jalen na. Cɛɲɛ yɔrɔ t'a la, nɔɔrɔ t'a la fo mɔgɔ ɲɛ bɛ bɔ a fɛ. A ye cogo si man ɲi an ɲɛ na.
[3] Mɔgɔw y'a mafiɲɛya ka ban a la. Mɔgɔ ɲɛnasisilen tun don, a ye tɔɔrɔ kow dɔn. A mangoyara mɔgɔw ye, u ma a jate.
[4] O bɛɛ n'a ta, a ye an ka banaw ta, ka an ka tɔɔrɔ kow doni ta. Nka an y'a jate ko a ɲankatalen bɛ, ko a gosilen bɛ Ala fɛ k'a majigin.
[5] Nka a joginna an ka jurumu kosɔn, a ɲɔɲɔna an ka tilenbaliya kow kosɔn. Tɔɔrɔ min bɛ hɛrɛ lase an ma, o bira ale kan. An kɛnɛyara a birindili fɛ.
[6] An bɛɛ filila i ko saga tununnenw, an bɛɛ kelen-kelen tun bɛ taa an yɛrɛw kun fɛ. Nka Matigi ye an bɛɛ ka tilenbaliya doni da ale kan.
[7] U y'a minɛ ko juguya k'a tɔɔrɔ, nka a ma a da yɛlɛ. A kɛra i ko sagaden min bɛ taa faga yɔrɔ la, i ko saga min tɛ kasi a si kanbaaw bolo, a ma a da yɛlɛ.
[8] U y'a karaba ka taa n'a ye kiri la. O waati mɔgɔ jumɛn tun bɛ miiri ko a si tigɛra ka bɔ dugukolo kan, ko a fagara a ka mɔgɔw ka jurumu kosɔn.
[9] U ye a ni mɔgɔ juguw su don ɲɔgɔn fɛ, a salen, a ni nafolotigiw tun bɛ ɲɔgɔn fɛ, hali ni a tun ma fariya ko si kɛ, nanbara kuma si ma bɔ a da la fana.
[10] Nka a diyara Matigi ye k'a tɔɔrɔ, k'a ɲɔɲɔ kosɛbɛ. A ye a yɛrɛ ni di ka kɛ jurumu yafa saraka ye. O de kosɔn a bɔnsɔn na caya, a ɲɛnama na to ka san caman kɛ. Matigi ka baara na jiidi a bolo.
[11] A na a dusu tɔɔrɔba nafa ye, o na a wasa. Ne ka jɔn tilennen na jo di mɔgɔ caman ma a yɛrɛ dɔnniya fɛ, a na a kun don u ka jurumuw kɔrɔ.
[12] O de kosɔn, ne na a niyɔrɔ di a ma mɔgɔbaw cɛma, a ni mɔgɔ tɔgɔbaw na fɛn cɛlenw tilatila, k'a masɔrɔ a y'a yɛrɛ di ka sa. A jatera kojugukɛlaw dɔ ye. A y'a kun don jurumukɛlaw caman ka jurumu doni kɔrɔ ka delili kɛ jurumukɛlaw ye.