[1] Masakɛ Oziasi sara san min na, ne ye Matigi sigilen ye masasigilan kan, o kɔrɔtalen bɛ san fɛ kosɛbɛ. A ka dulɔki senkɔrɔlanw ye Alabatosoba fa.
[2] Mɛlɛkɛ tasumama dɔw jɔlen tun bɛ a san fɛ, olu tɔgɔ ko serafen. Kamanfura wɔɔrɔ-wɔɔrɔ tun bɛ u bɛɛ kelen-kelen na. Kamanfura fila-fila kɛra ka u ɲɛda datugu. Kamanfura fila-fila kɛra ka u farikolo datugu. U tun bɛ pan ni kamanfura fila-fila ye.
[3] U tun bɛ pɛrɛn ɲɔgɔn fɛ ko: «Kɛlɛbolow Matigi ye Senuma, Senuma, Senuma de ye. Dugukolo yɔrɔw bɛɛ fara a nɔɔrɔ la.»
[4] Alabatosoba dondaw jusigilanw yuguyugura o kumakanw kosɔn. So kɔnɔna bɛɛ fara sisi la.
[5] O tuma la ne ko: «Ne ta tiɲɛnna. Ne halakira. K'a masɔrɔ ne ye mɔgɔ dawolo nɔgɔlen de ye. Ne sigilen bɛ mɔgɔ dawolo nɔgɔlenw cɛma, nka ne ye Masakɛ, Kɛlɛbolow Matigi ye ne ɲɛw la.»
[6] Serafen kelen ye takami ta ka bɔ saraka bɔlan na ni balan ye ka i pan ka na ne yɔrɔ ni o ye a bolo.
[7] A ye o takami maga ne da la k'a fɔ ko: «Nin magara i dawolow la, i ka tilenbaliya kow bɔra i kun, i ka jurumu yafara.»
[8] O kɔ, ne ye Matigi kan mɛn, a ko: «Ne na jɔni ci? Jɔn na taa an ka ci la?» Ne y'a jaabi ko: «Ne, i ka ne ci.»
[9] Matigi y'a fɔ ne ye ko: «I ka taa k'a fɔ nin mɔgɔw ye ko: ‹Aw na mɛnni kɛ nka aw tɛna faamuli kɛ, aw na filɛli kɛ nka aw tɛna a lasaa.›»
[10] A ko: «I ka nin mɔgɔw dusukun gɛlɛya ka u tulow geren ka u ɲɛw datugu, walisa u ɲɛw kana na yeli kɛ, u tulow kana na mɛnni kɛ, u dusukunw kana na fɛn faamu, walisa u kana na dannaya kɛ ka kisili sɔrɔ.»
[11] Ne y'a fɔ ko kura ko: «Matigi, o ko na to sen na fo tuma jumɛn?» A ye ne jaabi ko: «Fo duguw ka tiɲɛn ka kɛ tomon ye, fo mɔgɔw si tɛna sɔrɔ sow kɔnɔ, jamana na lankolonya ka kɛ kungokolon ye.
[12] Ɔwɔ, Matigi na o mɔgɔw gɛn ka bɔ o jamana la, ka jamana yɔrɔw bɛɛ lankolonya.
[13] Ni o jamana mɔgɔw tila tannan tora a kɔnɔ, olu fana na halaki. Nka hali ni terebente sun ni sensun tigɛra, u gungurunkun na nugu ko kura. O cogo la, o siya senuma bɔnsɔn ye o gungurunkun ɲɔgɔn ye.»