[1] Matigi y'a fɔ ne ye ko ne ka walaha kunbaba dɔ ɲini ka sɛbɛnni kɛ o kan ni kuma jɛlen ye ko: «Fɛn cɛ tuma sera, nafolo minɛ tuma surunyara.»
[2] Ko ne ka taa ni seere danna mɔgɔ dɔw ye ne fɛ. Olu ye sarakalasebaa Uri ni Jeberekiya denkɛ Zakari ye.
[3] O kɔ, ne donna ne muso, kiramusoma fɛ. O ye kɔnɔ ta ka denkɛ bange. Matigi y'a fɔ ne ye ko: «I ka o den tɔgɔ da ko: ‹Fɛn cɛ tuma sera, nafolo minɛ tuma surunyara.›
[4] K'a masɔrɔ sani den ka se k'a fɔ ko: ‹Baba› ni ‹Mama›, Asiri masakɛ na Damasi nafolow ni Samari bolo fɛnw cɛ ka taa ni u ye.»
[5] Matigi kumana ne fɛ ko kura ko:
[6] «Silo kɔji min bɛ woyo nɛmɛnɛmɛ, nin mɔgɔw ma sɔn o ma, nka Rezɛn ni Remalia denkɛ ko ka di u ye haali.
[7] O de kosɔn, Matigi na bajiba barikama lase u ma, o kɔrɔ ko Asiri masakɛ ni a ka kɛlɛbolo barikama, o baji na yɛlɛn ka bakɔnɔna yɔrɔw bɛɛ fa ka cɛrin yɔrɔw bɛɛ la.
[8] A woyo na bonya fo ka don Juda jamana kɔnɔ. A na kari ka tɛmɛn fo ka taa se a kan ma. A na kɛ i n'a fɔ a kamanfuraw na sɛɛnɛ ka i ka jamana yɔrɔw bɛɛ fa, Emanuɛl.»
[9] Siyaw, a' ye pɛrɛnkan bɔ kɛlɛ kama, aw na tiɲɛn. Mɔgɔ minw sigilen bɛ jamana janw na, a' ye aw tulo majɔ. A' ye aw ka kɛlɛkɛ minanw ta, aw na tiɲɛn. A' ye aw cɛ siri, aw na siran.
[10] A' ye dabaliw labɛn, u na tiɲɛn. Aw ka kuma nka aw ka kuma na kɛ fuu ye, k'a masɔrɔ Ala bɛ an fɛ.
[11] Matigi ye ne minɛ ni a bolo ye ka ci fɔ ne ye ko ne kana o mɔgɔw ka sira taama.
[12] A ko: «Nin mɔgɔw bɛ janfa min labɛn, aw kana aw sen don o la. Aw kana siran u ka siran fɛnw ɲɛ, aw ja kana tigɛ.
[13] Aw ka Kɛlɛbolow Matigi saniya. Aw ka siran ka jɔrɔ a ɲɛ.
[14] Dogo yɔrɔ senuma don, nka a na kɛ sen talon kabakurun ni mɔgɔ labi fara ye Israɛl ka so fila ye ani Jerusalɛmkaw minɛli jan ni minɛli juru ye.
[15] U la caman na talon ka bi ka karikari. U na minɛ juru la.»
[16] I ka nin seereya kuma datugu, i ka taamashyɛn da nin fɛn jiralen kuma kan ne ka kalandenw cɛma.
[17] Ne bɛ ne jigi da Matigi kan, o min bɛ a ɲɛda dogo Yakuba ka so la. Ne jigi bɛ ale kan.
[18] Matigi ye den minw di ne ma, ne ni olu filɛ. An kɛra taamashyɛnw ni kabakow ye Israɛl cɛma Kɛlɛbolow Matigi fɛ, o min sigilen bɛ Sion kulu kan.
[19] Ni u y'a fɔ aw ye ko aw ka su kililaw ni filɛlikɛlaw ɲininka ani minw bɛ file fyɛ ka nwununwunukan fɔ, aw ka u jaabi ko: «Mɔgɔw man kan ka u ka Ala ɲininka wa? Mun kosɔn mɔgɔ salenw ka ɲininka mɔgɔ ɲɛnama kun ko la?
[20] Aw ka kɔsegin sariya ni seereya kow ma. Ni mɔgɔ min ma kuma ka kɛɲɛ ni olu ye, o tigi tɛna dugujɛ ye.»
[21] U kɔlibaatɔ ɲɛnibaatɔ kɔngɔtɔ na yaalayaala jamana kɔnɔ. Ni kɔngɔ ye u minɛ tuma min na, u na dimin ka u ka masakɛ ni u ka Ala neni ka u ɲɛ kɔrɔta san fɛ.
[22] O kɔ, u na u ɲɛ majigin duguma, u tɛna foyi ye tɔɔrɔ ni dibi kolo girin kɔ. U na fili dibi la.
[23] Sɛgɛnba tun bɛ jamana min na, dibi tɛna to o kan tuma bɛɛ. Waati tɛmɛnnen na, Zabulɔn jamana ni Nefitali jamana ye mafiɲɛyali sɔrɔ, nka waati nata la, nɔɔrɔ na da a kan, kɔgɔji dala jamana kɔni, Jurdɛn ba kɔ fɛ, siya wɛrɛw ka jamana.