[1] Aw minw tugulen bɛ tilennenya nɔ fɛ, ni aw bɛ Matigi ɲini, aw ka ne lamɛn. Aw walakira ka bɔ farakurun min na, aw bɔra dingɛ min kɔnɔ, aw ka o kɔnɔ filɛ.
[2] Aw ka aw fa Ibrahima filɛ, ani Saran min ye aw bange. K'a masɔrɔ ne y'a wele k'a kelen to, ne dubara a ye k'a bɔnsɔn caya.
[3] Ayiwa, Matigi na Sion dusu saalo, k'a dusu saalo a tiɲɛnni kow kosɔn. A na a kungokolon kɛ i ko Edɛn nakɔ, k'a yɔrɔ jintan kɛ i ko Matigi ka nakɔ. Ɲagalikan ni tanulikan ani dɔnkili dakan na mɛn a cɛma.
[4] Ne ka mɔgɔw, aw ka lamɛnni kɛ, e min ye ne ka siya ye, i ka i tulo majɔ. K'a masɔrɔ ne na ne ka sariya di u ma, ne ka ci fɔlenw na kɛ siyaw ka kɛnɛ ye.
[5] Ne ka tilennenya ka surun i la, ne ka kisili sera ka ban. Ne bolo na kiri tigɛ siyaw kan. Yɔrɔ jan na mɔgɔw na u jigi da ne kan, ka u sinsin ne bolo la.
[6] A' ye aw ɲɛ kɔrɔta ka sankolo filɛ, ka aw ɲɛ majigin ka dugukolo filɛ, k'a masɔrɔ sankolow na tɛmɛn i ko sisi, dugukolo na kɔrɔ i ko dulɔki, a kan mɔgɔw na halaki ka ban i ko dimɔgɔw. Nka ne ka kisili bɛ to badaa, ne ka tilennenya tɛna ban.
[7] Aw minw bɛ tilennenya dɔn, ne ka sariya bɛ mɔgɔ minw dusukun na, aw ka ne lamɛn. Aw kana siran mɔgɔw ka mafiɲɛyali ɲɛ, aw ja kana tigɛ u ka nenili kosɔn.
[8] K'a masɔrɔ u na ban i ko bubaga bɛ fini ɲimi cogo min na, u na kɛ i ko nkɔbɔ bɛ sagasi dun cogo min na. Ne ka tilennenya bɛ to badaa, ne ka kisili na to bɔnsɔn nataw bɛɛ ye.
[9] Matigi, i ka wuli, i ka wuli ka an dɛmɛ ni i bolo barikama ye. I ka wuli i ko i y'a kɛ don tɛmɛnnenw ni san tɛmɛnnen kɔrɔw la cogo min na. Min ye Misira tigɛtigɛ, o tɛ e ye wa? Min ye kɔgɔji la dakabana fɛn faga, o tɛ e ye wa?
[10] Min ye kɔgɔji ja ka dingɛba kɔnɔ ji ja, o tɛ e ye wa? Min ye sira bɔ kɔgɔji cɛma ka mɔgɔ kunmabɔlenw latɛmɛn, o tɛ e ye wa?
[11] Matigi ka mɔgɔ kunmabɔlenw na kɔsegin ka na Sion ni ɲagali dɔnkili ye, nisɔndiya banbali na kɛ u ka masafugula ye. Ɲagali ni nisɔndiya na kɛ u ciyɛn ye, ɲɛnasisi ni nwunan na boli ka taa.
[12] Ne kɔni, ne yɛrɛ ye aw dusu sumabaa ye. Mun y'a to aw bɛ siran mɔgɔ sata ɲɛ, Hadamaden, min bɛ tɛmɛn i ko bin?
[13] Aw ɲinɛna aw Matigi ni aw Dabaa kɔ, o min ye sankolo fɛnsɛ ka dugukolo da. Aw tun bɛ siran aw tɔɔrɔbaa ɲɛ tuma bɛɛ, ko a labɛnnen bɛ ka aw halaki. Ayiwa, aw tɔɔrɔbaa ka dimiya dun bɛ min sisan?
[14] Mɔgɔ minw bɛ kaso la, olu na hɔrɔnya sɔɔni, u tɛna faga o dingɛ kɔnɔ, dumuni tɛna dɛsɛ u la.
[15] Ne ye Matigi, i ka Ala ye min bɛ kɔgɔji lawuli ka jikuruw lamaga. Ne tɔgɔ ye Kɛlɛbolow Matigi ye.
[16] Ne ye ne ka kuma kɛ i da la, ka ne bolo biri i kan, walisa ne ka sankolo kura fɛnsɛ ka dugukolo kura ju sigi, k'a fɔ Sion ye ko: «I ye ne ka mɔgɔw ye.»
[17] Jerusalɛm, i ka kunun, i ka kunun ka wuli ka i jɔ. I ye Matigi ka dimiya jifilen ta i bolo ka minni kɛ a la. Fɛn min bɛ talontalonni bila mɔgɔ la, i ye o min fo ka a buruburu bɛɛ min.
[18] Sion denkɛ bangelenw bɛɛ la, mɔgɔ si tɛ yen ka a ɲɛ minɛ. A ye denkɛ minw lamɔ, o si tɛ yen ka a bolo minɛ.
[19] Bɔnɛ fila-fila bira i kan, mɔgɔ si ma hinɛ i la, halakili ni tiɲɛnni ani kɔngɔba ni npan. Ne dun bɛ se ka i dusu saalo o la cogo di?
[20] I denw bɛɛ kirinna, u dalen bɛ sira fara yɔrɔw la bɔlɔnw na, i ko mankalan minɛlenw juru la. O kɛra Matigi ka dimiya ni i ka Ala ka kɔrɔfɔli kosɔn.
[21] Nka i ka lamɛnni kɛ sisan, e Jerusalɛm ɲɛnibaatɔ. E min ɲɛnaminina k'a sɔrɔ dɔlɔ nɔ tɛ.
[22] Sebaayabɛɛtigi, Matigi, i ka Ala, ale min bɛ a ka mɔgɔw lafasa, a ko: «Jifilen min bɛ i bolo ni o kɔnɔ ji bɛ mɔgɔ ɲɛnamini, ne ye o minɛ i la. I tɛna minni kɛ ne ka dimiya jifilen na tun.
[23] Ne na o jifilen don i tɔɔrɔbaaw bolo, olu minw b'a fɔ ko: ‹I ka i biri duguma walisa an ka taama i kan.› I ye i kɔ kɛ i ko dugukolo, i ko taama sira, mɔgɔ bɛ taama min kan.»